Zabity pałkaj voŭk nie byŭ šalonym: praciah historyi ź Ivacevickaha rajona

Hetaja historyja zdaryłasia ŭ samym kancy žniŭnia 2025 hoda. Supracoŭnik zakaźnika išoŭ pa lesie razam sa svaimi dziećmi, kali da ich vyjšaŭ kulhavy voŭk. Mužčyna pałkaj zabiŭ žyviołu, a chtości ź dziaciej źniaŭ na videa.

Zatym heta videa niejak trapiła ŭ internet i vyklikała chvalu abureńnia abaroncaŭ žyvioł. Zoaabaroncy śćviardžajuć, što heta byŭ nie maciory voŭk, a vaŭčania ź pierabitaj łapaj. Tamu nie treba było ŭžyvać takija žorstkija miery, ličać ludzi. A kiraŭnictva zakaźnika ŭ kamientarach presie kazała, što voŭk užo ledź nie dvuchhadovy, prosta na videa byŭ niezrazumieły jaho ŭzrost.

Jašče adnym z hałoŭnych arhumientaŭ suprać zoaabaroncaŭ było toje, što voŭk moh być šalonym. Tyja paryravali pytańniem: a dzie vyniki ekśpiertyzy? I čamu, u takim vypadku, nie ŭvodzicca karancin na miascovaści? Ciapier da hetaj dyskusii dałučyŭsia adkaz ad vieterynaraŭ.

Voŭk nie byŭ šalonym

Ivacevickaja rajonnaja vieterynarnaja stancyja dasłała adkaz na zvarot adnaho z zoaabaroncaŭ pa pytańni ab šalenstvie vaŭka.

Pavodle infarmacyi vieterynaraŭ, 1 vieraśnia im ź Ivacevickaha RAUS pastupiła paviedamleńnie «ab napadzie vaŭka na čałavieka i vyjaŭleńni trupa vaŭka». U hety ž dzień vieterynarnyja śpiecyjalisty kanfiskavali trup vaŭka na terytoryi Vyhanaščanskaha zakaźnika pamiž vioskami Vyhanaščy i Babrovičy.

Vieterynary adabrali bijamateryjał dla virusałahičnaha daśledavańnia z metaj vyklučeńnia dyjahnazu šalenstva žyvioł. Trup vaŭka ŭtylizavali ŭ žyviolnym mohilniku. A adabrany materyjał u hety ž dzień adpravili ŭ Bresckuju abłasnuju vieterynarnuju łabaratoryju.

Adkaz ivacevickija vieterynary atrymali 2 kastryčnika.

«Luminiscentnaja mikraskapija mazkoŭ adbitkaŭ hałaŭnoha mozhu admoŭnaja, bijałahičnaja sproba na biełych myšach admoŭnaja», — havorycca ŭ adkazie.

Heta značyć, voŭk nie byŭ šalonym.

Akramia taho, Ivacevickaja rajvietstancyja paviedamlaje, što terytoryja Ivacevickaha rajona nie źjaŭlajecca prablemnaj pa šalenstvie.

Pavialičyć

Zoaabaroncy patrabujuć bolš surovaha pakarańnia

Paśla rezanansu hetaha vypadku stała viadoma, što supracoŭnik zakaźnika byŭ pakarany pa administracyjnym artykule i atrymaŭ štraf. Adnak vałancioraŭ i abaroncaŭ žyvioł taki raskład nie zadavalniaje — jany patrabujuć pakarańnia pavodle kryminalnaha artykuła.

Paśla pryznańnia taho, što voŭk nie byŭ šalonym, jany ličać vybitym z ruk dyrektara zakaźnika važki arhumient u abaronu svajho supracoŭnika. Voś niekatoryja mierkavańni zoaabaroncaŭ.

«U repartažy ANT apošniaja fraza była niešta kštałtu «ciapier usio ŭ čakańni vynikaŭ ekśpiertyzy na šalenstva». Nu voś. Šalenstva niama. I što ciapier skažuć Ivanoŭ i Habiec? Vielmi b chaciełasia pasłuchać. Akazvajecca, nie «ŭsio pravilna» zrabiŭ Ivanoŭ, jak śćviardžałasia pieršapačatkova. Zahubiŭ nie chvoraha na šalenstva maładoha vaŭka. Dy jašče tak žorstka. I pry dzieciach», — aburajecca Taćciana ŭ čacie zoaabaroncaŭ.

«Habiec (dyrektar zakaźnika) pavinien skončyć pracu ŭ zapaviedniku, raz jon nie zdolny adroźnić šalonuju žyviołu ad nie šalonaj. I zamiest praduhledžanaha zakonam adłovu i karancinu adrazu daje kamandu na źniščeńnie. Nasupierak vyniesienamu rašeńniu, praciahvaje pakryvać supracoŭnika i skažać fakty.

Pa Ivanovu važna pravodzić pravierku hłyboka i abjektyŭna, i abaviazkova pravieści ekśpiertyzu mientalnaha statusu, biez raskazaŭ pra «šmatdzietnaha baćku i relihijnaha čałavieka». Heta nijak nie pierasiakajecca i nie viažacca z tym, što trapiła na kamieru.

Pa abodvuch ŭpeŭnienaja: toje, što my ŭbačyli, heta tolki vierchavina ajśbierha. Zabić pałkami paranienuju davierlivuju maładuju žyviolinu — podła, hniusna, patrabuje adkaznaści», — ličyć jašče adna abaronca žyvioł.

• 7
• 2
• 0
• 3
• 0
• 4
• 7
• 0