Supracoŭnik zakaźnika na vačach dziaciej žorstka zabiŭ dubinaj vaŭka. Vypadkam zacikavilisia ŭ Minpryrody
Viedamstva pačało pravierku pa fakcie žorstkaha abychodžańnia z žyviołaj u respublikanskim zakaźniku «Vyhanaščanskaje».
Na dniach u sacsietkach źjaviłasia videa na jakim u ciomny čas sutak nasustrač hrupie ludziej vychodzić chudy i kulhavy voŭk, bolš padobny da vaŭčaniaci. Nijakaj ahresii paranienaja žyvioła nie prajaŭlała.
Kali jon nabližajecca da mužčyny, toj z razmachu nanosić jamu ŭdar pa hałavie vialikaj dubinaj, paśla čaho žyvioła adrazu padaje na ziamlu. Mužčyna nanosić jašče niekalki dziasiatkaŭ udaraŭ, kab dabić voŭka. Na fonie čutny dziciačy śmiech.
«Pryjechali jehiery. Ludzi paŭtary hadziny siadzieli na dachu — bajalisia vaŭkoŭ. Pryjechaŭ Ivanoŭ — pałkaj zabiŭ. Tolki nikomu nie kažycie. Usio, vyklikajcie achovu pryrody, niachaj biaruć ekśpiertyzu», — havoryć mužčyna ŭ kancy.
Mužčynam, jaki žorstka zabiŭ vaŭka, akazaŭsia supracoŭnik respublikanskaha zakaźnika «Vyhanaščanskaje» Alaksandr Alaksandravič Ivanoŭ.
U sacsietkach patrabujuć zvolnić supracoŭnika, jaki zabiŭ žyviołu «na vačach i pad śmiech dziaciej».
Paśla publikacyi videa Ministerstva pryrodnych resursaŭ i achovy navakolnaha asiarodździa Biełarusi raspačała pravierku pa fakcie žorstkaha abychodžańnia z žyviołaj na terytoryi respublikanskaha zakaźnika «Vyhanaščanskaje».
U viedamstvie adznačajuć, što padzieja znachodzicca na kantroli, a «dziejańniam supracoŭnika zakaźnika budzie dadziena adpaviednaja pravavaja acenka».
Paśla heta źjaviłasia videa, u jakim dyrektar zakaźnika Siarhiej Habiec tłumačyć pavodziny svajho padnačalenaha, jaki zabiŭ vaŭka.
Pa słovach Habca, 30 žniŭnia naviedavalniki paviedamili jehierskaj słužbie pra dzikaha źviera, što «nieadekvatna siabie pavodziŭ»: biehaŭ pa ahrasiadzibie, hryz łodku, pieraviarnuŭ vulej. Kali supracoŭniki vyjechali, źviera nie znajšli, ale paźniej adzin ź ich paviedamiŭ, što voŭk nibyta napaŭ na jaho i ŭ vyniku žyviołu zabili.
«Supracoŭnik pastupiŭ vielmi pravilna i vielmi hramatna, bo hety voŭk moh prynieści vielmi šmat škody, faktyčna škody nie tolki ludziam, ale i zarazić usiu miascovaść hetym šalenstvam. Nie kožny čałaviek moh być takim śmiełym, kab napaści na vaŭka, tamu nie tak prosta heta ŭsio. Ale kali voŭk hałodny i šalony, to tolki takim šlacham jaho možna likvidavać», — zajaviŭ kiraŭnik zakaźnika.
Zakaźnik «Vyhanaščanskaje» — najbujniejšy ŭ Biełarusi bałotny kompleks płoščaj bolš za 55 tysiač hiektaraŭ. Jon byŭ stvorany ŭ 1968 hodzie dziela zachavańnia aziorna-bałotnych ekasistem i achovy redkich vidaŭ fłory i faŭny, zaniesienych u Čyrvonuju knihu.
Ciapier čytajuć
Biełaruska adnačasova mieła dva hramadzianstvy — ale daviedałasia pra heta tolki ŭ 21 hod. Jak tak vyjšła?9
Biełaruska adnačasova mieła dva hramadzianstvy — ale daviedałasia pra heta tolki ŭ 21 hod. Jak tak vyjšła?
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2222
Kamientary