Nieanacysty, hvałtaŭniki dziaciej i nienaviśniki žančyn: niebiaśpiečny trend, jaki pryjšoŭ z ZŠA, dabraŭsia da Jeŭropy

Na pieršy pohlad, 21‑hadovy Tea (imia źmieniena)— zvyčajny chłopiec z francuzskaj pravincyi: žyvie z baćkami, pracuje ŭ miascovym supiermarkiecie. Zdavałasia, ničym nie vyłučajecca. Ale adnojčy śpiakotnym žnivieńskim dniom u jaho dźviery pahrukali palicejskija.

Praz dva dni Tea apynuŭsia ŭ turmie pa abvinavačvańniach u złačynstvach, jakija šakujuć svajoj žorstkaściu. Śpiecsłužby zacikavilisia aktyŭnaściu Tea ŭ internecie jašče ŭ pačatku leta. Jak akazałasia, chłopiec byŭ nie prosta karystalnikam sieciva, jaki litaralna prahłynaŭ vielizarnuju kolkaść dziciačaj parnahrafii i videa z kadrami krajniaj žorstkaści.

Śledčyja natknulisia na skrynšoty videa, ad jakich navat u daśviedčanych apieratyŭnikaŭ pachaładzieła kroŭ. Na ich zusim junyja dziaŭčynki na kamieru ŭtykali sabie ŭ ściohny i hrudzi nažy. Niekatoryja vyrazali na svaim ciele kryvavyja litary — imia «Tea» i tajamničy ličbavy kod: «764».

Što aznačaje hety numar? Miascovaja palicyja nie viedała. Ale dla FBR i jeŭrapiejskich śpiecsłužbaŭ hetyja ličby byli dobra znajomyja.

«764» — heta nazva zakrytaj anłajn-supolnaści ŭ Discord, jakuju ŭ 2021 hodzie stvaryŭ 17‑hadovy amierykaniec z Techasa Bredli Kadenched. Chłopiec, jaki nazyvaŭ siabie huru novaj siekty, byŭ asudžany ŭ 2023 hodzie na 80 hadoŭ turmy — vyklučna surovy prysud dla niepaŭnaletniaha navat u ZŠA.

Pavialičyć

Jon byŭ majstram anłajn-manipulacyj. Z dapamohaj pahroz i šantažu Kadenched prymušaŭ niepaŭnaletnich dziaŭčat (małodšaj było 9 hadoŭ) nanosić sabie rany. Kadenched zaachvočvaŭ inšych udzielnikaŭ supołki rabić toje ž samaje, što ŭ vyniku pryviało da taho, što FBR raspačało kala 250 rasśledavańniaŭ, źviazanych ź dziejnaściu «764».

Virtualny hvałt chutka vyjšaŭ u realny śviet: adzin z udzielnikaŭ siekty, 17‑hadovy niemiec Nina Chaŭzier, jaki žyŭ u Rumynii, zarezaŭ na vulicy vypadkovuju žančynu, viedučy anłajn-tranślacyju ŭ Discord. Kali palicyja pravieryła jaho kampjutar, to znajšła toj ža samy nabor, što ŭ Tea: nieźličonuju kolkaść dziciačaj parnahrafii i videa, dzie dziaŭčynki vyrazali na sabie ŭžo jahony nik — «Tobbz».

Ideałahičny viniehret: što ŭ hałovach u hetych ludziej?

Jak pišuć aŭtary, takija hrupoŭki, jak «764», što dziejničajuć u zakrytych čatach Discord i Telegram, — heta sapraŭdny ideałahičny viniehret. U im źmiešvajecca ŭsio samaje ciomnaje: rasizm, antysiemityzm, nieanacyzm, radykalny mužčynski šavinizm, satanizm i, viadoma, seksualny hvałt nad dziećmi.

Udzielniki hetych supołak — pieravažna vielmi maładyja mužčyny, časta niepaŭnaletnija, sa značnymi psichałahičnymi prablemami. Jany znachodziać uraźlivych dziaŭčat-padletkaŭ i z dapamohaj šantažu prymušajuć ich nanosić sabie rany abo ździajśniać na veb-kamieru žorstkija i źnievažalnyja seksualnyja akty.

Cikava, što padčas dopytu Tea (toj samy chłopiec z francuzskaj pravincyi) śćviardžaŭ, što nie prytrymlivajecca nijakaj ideałohii — jon nie nieanacyst i nie satanist. Pavodle jaho słoŭ, u supołku «764» jaho pryviała vyklučna chvaravitaja cikavaść da śmierci i hvałtu, jakuju padahravali šmatlikija videa z zabojstvami, teraktami i avaryjami ŭ ciomnych kutkach internetu.

Jak Tea patłumačyŭ palicyi, kab dałučycca da hetaj hrupy, treba było vykanać adnu z troch umoŭ: zabić čałavieka ci žyviołu abo prymusić inšaha da samapaškodžańnia. Pry hetym treba było pryvieści dokazy ździejśnienaha.

Kab stać členam hrupy «764», chłopiec zadušyŭ u pakiecie dvuch trusoŭ i źniaŭ na videa ich pakuty. Paźniej jon źviazaŭsia prykładna z 50 dziaŭčatami na forumach dla padletkaŭ, jakija pakutavali ad depresii i mieli suicydalnyja dumki, i schilaŭ ich kalečyć siabie.

Ciapier Tea pahražaje da 10 hadoŭ turmy za ceły bukiet złačynstvaŭ: zachoŭvańnie i raspaŭsiud dziciačaj parnahrafii ŭ składzie arhanizavanaj hrupy, žorstkaje abychodžańnie z žyviołami i vykarystańnie ŭraźlivaha stanu niepaŭnaletnich.

Pavialičyć

«Nianaviść da čałaviectva»

Ale historyja Tea — heta tolki viaršynia ajśbierha. Francuzskaje pravasudździe rasśleduje jašče bolš maštabnuju i tryvožnuju spravu 22‑hadovaha Rachana R.

Hety małady čałaviek z zabiaśpiečanaj indyjskaj siamji vučyŭsia ŭ prestyžnaj biznes-škole na Łazurnym bierazie Francyi i paralelna kiravaŭ ułasnaj supołkaj u Discord pad nazvaj «CVLT» (čytajecca jak «kult»). Mienavita z «Kulta» paźniej vyjšli zasnavalniki hrupoŭki «764».

Unutry CVLT isnavała strohaja ijerarchija: ad šarahovych «złačyncaŭ» da «vajavodaŭ» («warlords») i viarchoŭnaha statusu «BOH» («GOD»). Čym bolš žorstkaje videa ty publikavaŭ, tym vyšej padymaŭsia.

Sprava Rachana akazałasia nastolki hłabalnaj, što dla jaje rasśledavańnia była stvorana mižnarodnaja apieratyŭnaja hrupa z udziełam śpiecsłužbaŭ ZŠA, Kanady, Vialikabrytanii i inšych krain. Byli vyjaŭleny dziasiatki złačyncaŭ i kala sotni achviar pa ŭsim śviecie. Śpis złačynstvaŭ, u jakich jaho abvinavačvajuć, žachlivy: katavańni niepaŭnaletnich, daviadzieńnie da samahubstva, saŭdzieł u zhvałtavańni. Jamu pahražaje pažyćciovaje źniavoleńnie.

Sam Rachan, spartyŭnaha ciełaskładu chłopiec, jaki adkryta zajaŭlaje pra svaju nianaviść da čałaviectva, pavodziŭ siabie na dopytach z ašałamlalnaj abyjakavaściu.

Kali śledčy spytaŭ jaho: «Vy prasili ludziej vyrazać vaša imia na svajoj skury?», Rachan spakojna adkazaŭ: «Tak, viadoma». I dadaŭ, tłumačačy svaju fiłasofiju: «Mnohija mianie bajacca. A strach — heta adziny sposab mieć kantrol nad inšymi».

Paradoks u tym, što sam Rachan — indyjec, ale heta nie pieraškodziła jamu z 16 hadoŭ zachapicca idejami pieravahi biełaj rasy. Jaho vabiła nie stolki rasavaja teoryja, kolki ŭłada — ułada adnaho čałavieka nad usimi.

Jak i ŭ mnohich členaŭ padobnych supołak, klučavuju rolu ŭ jaho śvietapohladzie adyhryvała pačućcio, što jaho mužnaść znachodzicca pad pahrozaj. Jon vieryŭ u teoryju «novaha suśvietnaha paradku», jaki nibyta imkniecca «fieminizavać mužčyn».

«Ja vyrašyŭ, što treba zmahacca z hetymi idejami. Ja vielmi kansiervatyŭny, — tłumačyŭ jon śledčym. — Takimi ž byli Musalini, Pucin i Hitler, jakija vystupali suprać ŁHBTK+ ruchu. Jany taksama byli suprać fieminizmu».

Rachan nazyvaje siabie psichapatam i narcysam, śćviardžaje, što nie atrymlivaŭ ad katavańniaŭ seksualnaha zadavalnieńnia. Jaho zavodziła nie samo dziejańnie, a pačućcio poŭnaha kantrolu i ŭłady nad pakutami inšaha čałavieka. Jak jon sam kaža: «Ja — narcys, a narcys lubić, kali kormiać jaho eha».

Rachan navat napisaŭ cełuju instrukcyju pa manipulacyi dziaŭčatami, zasnavanuju na pryncypach Makijavieli, dzie apisvaŭ, jak zavajavać davier, a potym vykarystoŭvać jaho dla poŭnaha padparadkavańnia.

Pavialičyć

Jak pracuje siekta: ad achviary da kata

Što ruchaje hetymi maładymi ludźmi? Časta — historyja ŭłasnaj traŭmy. Rachan tłumačyć svaju žorstkaść tym, što ŭ dziacinstvie byŭ achviaraj hvałtu ŭ siamji i ckavańnia ŭ škole. Kab abaranicca, jon, pavodle jaho słoŭ, zadušyŭ u sabie ŭsie emocyi: «Ja padumaŭ, što kali ŭ mianie nie budzie emocyj, mnie bolš nie zmohuć zrabić baluča».

Hety achoŭny miechanizm sustrakajecca i ŭ inšych členaŭ hetych supołak: zasnavalnik «764» Bredli Kadenched i francuz Tea taksama zajaŭlali, što byli achviarami školnaha bulinhu.

Ale samaje strašnaje, što hetaja sistema, jak u sapraŭdnaj siekcie, pieratvaraje ŭžo svaich achviar u kataŭ. Jak analizuje krynica vydańnia ŭ palicyi:

«Ideja ŭ tym, kab radykalizavać achviar i pieratvaryć ich u złačyncaŭ, pakazvajučy im žorstki kantent i źnievažajučy ich, pakul jany nie pierastanuć što-niebudź adčuvać».

Spryjalnyja ŭmovy dla hetaha stvaryła pandemija COVID-19. Jak tłumačyć inšaja krynica, blizkaja da śledstva:

«ŭjavicie sabie padletkaŭ, začynienych doma, jakim sumna. Jany zachodziać u Discord, kab pahulać. Niekatoryja dziaŭčaty čujuć pra «Kult», pra hulni ŭ daminavańnie. Źjaŭlajecca svajho rodu cikaŭnaść, jany pačynajuć hulać u strach, uklučajucca ŭ razmovy. I mienavita ŭ hety momant pastka pačynaje začyniacca…»

Kali taksičnaja pastka začyniajecca, niekatoryja achviary sami pieratvarajucca ŭ kataŭ. Adzin z samych žachlivych prykładaŭ — kali 15‑hadovaja dziaŭčyna z Uschodniaj Jeŭropy, jakaja dałučyłasia da «764», u žyvym efiry daviała 25‑hadovaha amierykanca da samahubstva praz samaspaleńnie pad rohat i ŭchvalnyja vokličy dvuch dziasiatkaŭ hledačoŭ.

Pavialičyć

Novaja terarystyčnaja pahroza

Śpiecsłužby pa ŭsim śviecie bjuć tryvohu. Jany bačać, što adbyvajecca niebiaśpiečny praces: na pieršy płan vychodzić nie ideałohija, a hvałt dziela samoha hvałtu. Hety nihilizm robić maładych ludziej idealnymi kandydatami dla vierbavańnia. FBR užo nazvała hetyja sietki «ŭnutranaj terarystyčnaj pahrozaj».

Hałoŭnaja niebiaśpieka ŭ tym, što hetyja supołki maładych, psichałahična złamanych i hatovych na ŭsio ludziej mohuć stać hatovym vojskam pad kluč dla sapraŭdnych terarystyčnych arhanizacyj, jakim navat nie treba płacić.

I hetyja strachi ŭžo spraŭdžvajucca. Pamiatajecie toje samaje zabojstva ŭ Rumynii? Jak vyśvietliłasia, heta byŭ nie prosta spantanny akt žorstkaści padletka.

Pavodle śledstva, jano było zamoŭlena lidaram bujnoj nieanacysckaj hrupoŭki MKU («Kult mańjakaŭ-zabojcaŭ»), jakaja dziejničaje na terytoryi Rasii i Ukrainy i ličycca terarystyčnaj.

Ale heta byŭ tolki pačatak. Inšy lidar MKU («Mańjaki. Kult zabojstva») — 21‑hadovy Michaił Čchikvišvili pa mianušcy «Kamandzir Miaśnik» («Commander Butcher»), byŭ aryštavany ŭ mai hetaha hoda za toje, što vierbavaŭ členaŭ «764» dla ździajśnieńnia teraktaŭ u Ńju-Jorku.

Jon płanavaŭ, što jany buduć vykarystoŭvać bomby i aŭtamaty, a taksama razdavać na Novy hod atručanyja cukierki dzieciam z nacyjanalnych mienšaściej, u tym liku kala jaŭrejskaj škoły. Jaho meta, jak jon sam pisaŭ, — «raspaŭsiudzić połymia Lucyfiera i praciahnuć misiju etničnaj čystki».

Toje, što pačynałasia jak ananimny anłajn-ekstremizm u zakrytych supołkach, vyjšła za miežy virtualnaści i pieratvaryłasia ŭ realnuju, hłabalnuju i vielmi niepradkazalnuju terarystyčnuju pahrozu.

• 0
• 0
• 1
• 4
• 8
• 1
• 6
• 0