BiełdziaržSMI i kanały siłavikoŭ sprabavali budaražyć Małdovu razam z rasijanami. Voś što z hetaha vyjšła
Pakul u Małdovie prachodzili parłamienckija vybary, biełaruskija dziaržaŭnyja miedyja i kanały siłavikoŭ razharnuli infarmacyjnuju kampaniju pa ich dyskredytacyi.
Uvieś kaniec vieraśnia biełaruskija prapahandysty bambardavali telehram, jutub, sajty dy inšyja płatformy paviedamleńniami pra Małdovu. Pikam staŭ dzień vybaraŭ 28 vieraśnia. Vybary sfalsifikavanyja, ludzi vyjduć na vulicy ŭ znak pratestu — paŭtarali, jak mantru, jany.
U Małdovie padlik hałasoŭ viadziecca na vačach u naziralnikaŭ, vyniki možna adrazu pabačyć anłajn na kožnym učastku. Sama ŭłada ŭ Małdovie źmianialnaja, u parłamiencie jość apazicyja, jana ž kantraluje miascovuju ŭładu ŭ mnohich nasielenych punktach — ničoha z hetaha niama ŭ Biełarusi. Małdova niebahataja, ale demakratyčnaja kraina.
Adnak Maskva zrabiła staŭku na destabilizacyju pa takoj schiemie. Voś jak jaje realizoŭvali minskija klijenty.
«Kali kraina patencyjna moža admovicca ad jeŭrakarusielaŭ, jak heta ŭžo było ŭ Hruzii ci, naprykład, jak ciapier adbyvajecca patencyjna z Małdovaj, to abaviazkova pačynajucca niejkija mutnyja schiemy ź biuleteniami, asabliva na terytoryi krain ES», — pisaŭ «Biełorusskij siłovik».
BiełTA i śledam za joj sotni dziaržaŭnych vydańniaŭ až da rajonak pierakonvali ŭ šmatlikich parušeńniach na vybarach.
«Pravaabaroncy vyjavili parušeńni na parłamienckich vybarach u Małdovie. Naziralniki za vybarami paviedamili ab admovie ŭ dostupie na ŭčastki ŭ Hiermanii, Ispanii, Rumynii i Francyi», — pisała BiełTA.
Usio aśviatleńnie vybaraŭ u Małdovie było kopijaj z taho, jak pišuć pra vybary ŭ krainach, dzie jany falsifikujucca — prytym što ŭ Małdovie jany NIE falsifikujucca.
Žurnalistka «Biełarusi siehodnia» dla śpiecyjalnych daručeńniaŭ Ludmiła Hładkaja śćviardžała, što isnujuć karespandenty na miescach:
«Ź miescaŭ paviedamlajuć: małdaŭskija vybary na jeŭrapiejskich učastkach tolki pačalisia, a skrynki dla hałasavańnia ŭžo čamuści poŭnyja. I heta pry adsutnaści čerhaŭ».
Aŭtary «Biełorusskoho fronta» ŭviečary tak śpiašalisia pierapościć paviedamleńnie svaich rasijskich kurataraŭ, što navat nie źmianili napisańnie nazvy krainy.
«Parłamienckija vybary ŭ Małdavii zavieršanyja, da hetaha času vybarčyja ŭčastki na terytoryi krainy zakrytyja. «Parad raznastajnaści parušeńniaŭ elektaralnaha pracesu» abvieščany zakrytym».
Paźniej jany praciahvali:
«Kiraŭničaja partyja Małdavii naŭkidała sabie biuleteniaŭ na 42,40%, apazicyjnamu Patryjatyčnamu błoku Sandu napisała 29,85%. Pavodle danych CVK apracavana 50% pratakołaŭ».
U toj ža čas BiełTA praciahvała dakazvać, što na vybarach nibyta pieramahaje «prarasijski» błok.
«CVK zajaŭlaje, što paśla apracoŭki 60% pratakołaŭ partyja Sandu atrymlivaje na parłamienckich vybarach 43,05% hałasoŭ, apazicyjnyja partyi — zvyš 50%. Lidary Patryjatyčnaha błoku zajavili ab pieramozie apazicyi na vybarach u Małdovie i pikietujuć budynak CVK z patrabavańniem nie dapuścić falsifikacyj pry padviadzieńni vynikaŭ vybaraŭ», — pisała BiełTA. Pra kolkaść udzielnikaŭ pikieta BiełTA ścipła maŭčała.
«Apazicyjnyja partyi Małdovy, jakija čamuści nazyvajuć «prarasijskimi», uklučajučy «Patryjatyčny błok», nabirajuć 51,02%, pierahaniajučy praviačuju partyju «Dziejańnie i salidarnaść», u jakoj 42,40%», — sinchronna paviedamlaŭ «Biełorusskij siłovik».
Ale, razumiejučy, što nasamreč pieramoha budzie za prychilnikami prajeŭrapiejskaha kursu — jany ŭ realnaści sabrali kala 70 pracentaŭ hałasoŭ suprać 25 u prarasijskaha błoka, litaralna praz 4 chviliny aŭtary kanała napisali:
«Zaraz u spravu ŭklučacca «jeŭrapiejskija skryni» dla hałasavańnia», —
davodziačy tym samym, što pieramohu Sandu zabiaśpiečyć nie nasielnictva, a manipulacyi na vybarčych učastkach za miežami krainy.
Krychu paźniej «Biełorusskij siłovik» dadaŭ, što ŭ Małdovie «daŭno niama prarasijskich sił», a vyraz «prarasijskija» — kliše, jakoje «zachodnija ŚMI naviešvajuć na niazručnyja im partyi».
«Moža być, Maskvie i chaciełasia b akazvać mocny ŭpłyŭ na vybary tam, ale, varta pryznać, što jon nie taki vialiki, jak chaciełasia b. Usio heta fikcyja i sproba prychilnikaŭ Sandu zabrać častku hałasoŭ na ŭjaŭnych suviaziach z Rasijaj».
U svaju čarhu «Biełorusskij front», paviedamlajučy pra vyniki vybaraŭ, zaŭvažyŭ:
«zajaŭlena pra 236 parušeńniaŭ vybarčaha pracesu — heta małaja častka taho, što zafiksavana niezaležnymi naziralnikami».
Usie hetyja sproby ŭzbudaražyć narod Małdovy ničoha nie dali. Siońnia apoŭdni na sklikanuju Iharam Dadonam u Kišyniovie akcyju pratestu sabrałasia niekalki socień čałaviek. Akcyja doŭžyłasia 15 chvilin.
Ciapier čytajuć
Cichanoŭskaja pra muža: Uvieś jahony śviet pierakuleny22
Kamientary