Žychary Hrušaŭki i Michałova zastajucca biez deputatki: čempijonka Mirončyk-Ivanova źbirajecca ŭ dekret
Deputatka Nastaśsia Mirončyk-Ivanova budzie vymušana zrabić pierapynak u svajoj pracy ŭ Pałacie pradstaŭnikoŭ. Pryčyna banalnaja: nieŭzabavie jana ŭ druhi raz stanie maci. A što ž budzie ź jaje «vybarcami» ź Dziaržynskaj akruhi №98?
Nahadajem: u 2020 hodzie skakucha Nastaśsia Mirončyk-Ivanova padpisała praŭładny list u padtrymku Łukašenki. Padziaki nie pryjšłosia čakać doŭha: čempijonku — a jana šeść razoŭ vyjhravała čempijanat Biełarusi, maje bronzavy miedal čempijanata śvietu — paklikali na tajemnuju inaŭhuracyju palityka, potym na zapis jaho navahodniaha zvarotu. A zatym pasadzili ŭ prezidyum Usiebiełaruskaha narodnaha schodu.
Raniej Nastaśsia chacieła zajmacca muzykaj i modaj. U 2020 jana sprabavała zaskočyć u šou-biznes i zapisvała pieśni razam ź Vitalem Varanko — bajanistam i aktyŭnym prychilnikam Łukašenki. Kazała i pra stvareńnie ŭłasnaha brenda adzieńnia.
Ale ŭsio heta zastałosia ŭ minułym. U vyniku Nastaśsia pajšła atrymlivać jurydyčnuju adukacyju ŭ Akademii kiravańnia, a taksama nie spyniajučysia chvaliła ŭłady.
Vynik pradkazalny: letaś byłoj spartsmiency vydali deputacki mandat. Mirončyk-Ivanova bałatavałasia pa Dziaržynskaj vybarčaj akruzie №98 u Minsku, jakaja ŭklučaje ŭ siabie Hrušaŭku, Michałova i častku Brylevičaŭ. Na vybarach joj namalavali 52% hałasoŭ.
Na staronku Nastaśsi ŭ instahramie padpisana bolš za 51 tysiaču čałaviek. Tam jana ŭpieramiešku pościć zdymki z aficyjnych mierapryjemstvaŭ i seksualnyja fota ŭ kupalnikach z šykoŭnaha adpačynku ŭ Dubai. U storys možna pabačyć, jak kožny miesiac jana ciohajecca pa kramach i pierapisvaje ceny — kaža, ułada ŭsio kantraluje.
Dniami deputatka padzialiłasia z padpisčykami radasnaj navinoj: u jaje siamji budzie papaŭnieńnie.
Nastaśsia ŭ šlubie ź lohkaatletam Siarhiejem Ivanovym, u ich jość 11‑hadovy syn. Samych blizkich ludziej muž z žonkaj zaprasili na hiendar-paci. Zrabili ŭsio tradycyjna: błakitnyja i ružovyja šaryki, tort i pirožnyja ŭ takich ža kolerach.
Zapisvajučy videa dla budučaha dziciaci, Nastaśsia z mužam skazali, što čakajuć dziaŭčynku, za chłopčyka vystupiŭ tolki ich pieršy syn Hleb. U vyniku vyśvietliłasia, što ŭ deputatki sapraŭdy maje naradzicca dačka.
Atrymlivajecca, što chacia b na niekatory čas Mirončyk-Ivanovaj pryjdziecca pastavić deputackuju pracu na paŭzu. Što z budzie ź jaje «vybarcami»?
U vyniku, kali deputatka Pałaty pradstaŭnikoŭ sychodzić u dekretny adpačynak, za joj zachoŭvajecca mandat, dadatkovyja vybary nie pryznačajucca. Tearetyčna rašeńni prymajucca kalehijalna, tamu časovaja adsutnaść adnaho deputata nie zaminaje pracy Pałaty pradstaŭnikoŭ.
«Jana ŭ štanach vyjdzie, rubanie». Łukašenka prapanavaŭ u prezidenty niečakanuju kandydaturu
Deputatka Mirončyk-Ivanova raskazała, ci možna joj vykładać u instahramie foty ŭ kupalniku
«Nadzieć na šyju stužku ŁHBT — dla mianie heta prosta kraj». Lohkaatletka Mirončyk-Ivanova raskazała pra svaje kalarovyja fobii
Ciapier čytajuć
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary