Astranomy znajšli «druhi Miesiac», jaki krucicca vakoł Ziamli ŭžo 60 hadoŭ
U našaj płaniety na praciahu niekalkich dziesiacihodździaŭ jość jašče adzin spadarožnik, adnak vyjavić jaho atrymałasia tolki niadaŭna. Čamu niabiesnaje cieła tak doŭha zastavałasia nieadkrytym i na jakija pytańni ciapier treba adkazać daśledčykam?
Jak piša EarthSky, astranomy absiervatoryi Pan-STARRS, jakaja znachodzicca na Havajach, 29 žniŭnia 2025 hoda zaŭvažyli nievialiki kaśmičny abjekt, jaki atrymaŭ nazvu «2025 PN7».
Samaje cikavaje, što, praanalizavaŭšy archiŭnyja zdymki, navukoŭcy vyśvietlili: «2025 PN7» užo 60 hadoŭ znachodzicca na stabilnaj arbicie pobač ź Ziamloj. Jon zastavaŭsia niezaŭvažanym, tamu što vielmi mały i ruchajecca pa asablivaj arbicie.
«Heta vielmi składany dla nazirańnia abjekt. Jaho možna zaŭvažyć tolki tady, kali jon maksimalna nabližajecca da našaj płaniety, jak heta adbyłosia hetym letam. Takija «vokny bačnaści» zdarajucca redka», —
cytuje CNN słovy Karłasa de ła Fuente Markasa, daśledčyka z Madrydskaha ŭniviersiteta i aŭtara daśledavańnia, apublikavanaha ŭ Research Notes of the American Astronomical Society.
Što takoje «kvazispadarožnik»?
U adroźnieńnie ad Miesiaca, jaki krucicca vakoł Ziamli, kvazispadarožniki nasamreč kruciacca vakoł Sonca. Adnak ich arbita nastolki padobnaja da ziamnoj, što jany ŭvieś čas zastajucca niepadalok ad našaj płaniety, niby pryviazanyja da jaje hravitacyjaj.
Pa danych NASA, «2025 PN7» znachodzicca ad nas na siaredniaj adlehłaści 384 400 km (amal jak Miesiac), a časam moža nabližacca na adlehłaść da 299 337 km.
Pavodle acenak, «2025 PN7» — samy maleńki ź viadomych kvazispadarožnikaŭ Ziamli. Jaho dyjamietr składaje ŭsiaho ad 19 da 30 mietraŭ. Zhodna z raźlikami, jon prabudzie na svajoj ciapierašniaj arbicie jašče kala 60 hadoŭ, paśla čaho hravitacyja Sonca znoŭ adciahnie jaho na bolš dalokuju trajektoryju.
«2025 PN7» — adzin ź niamnohich viadomych kvazispadarožnikaŭ. Samy znakamity ź ich — Kamoaleva, jaki ličycca mahčymym frahmientam našaha Miesiaca. Da jaho ŭ 2025 hodzie Kitaj płanuje zapuścić misiju Tianwen-2, kab dastavić na Ziamlu ŭzory parody.
Heta kamień ci kaśmičnaje śmiećcie?
Dakładny skład abjekta pakul nieviadomy, ale navukoŭcy amal upeŭnienyja, što heta nie stary spadarožnik ci častka rakiety.
«Zychodziačy z taho, što my viedajem, heta, chutčej za ŭsio, naturalny skalisty abjekt. My zvyčajna možam lohka adroźnić pryrodnyja abjekty ad štučnych», — zapeŭnivaje astrafizik Tedzi Kareta ŭ intervju CNN.
Kab kančatkova paćvierdzić pachodžańnie i skład tajemnaha spadarožnika, spatrebiacca dadatkovyja daśledavańni.
Ciapier čytajuć
Addanaha jabaćku, jaki abražaŭ Śviatłanu Cichanoŭskuju ŭ Threads, kinuli za kraty7
Kamientary