Nočču Rasija masiravana ŭdaryła pa Kijevie: zahareŭsia ŭradavy budynak
Nočču adbyłasia čarhovaja masiravanaja rakietna-dronavaja ataka na Kijeŭ. Paškodžany šmatpaviarchoviki, zahinuŭ adzin čałaviek, dziasiatki paranieny. Taksama zahareŭsia administracyjny budynkak ŭ Piačerskim rajonie, dzie mieścicca Kabiniet ministraŭ Ukrainy.
Mer Kijeva Vital Kličko paviedamiŭ u telehram-kanale: «U Piačerskim rajonie ŭ vyniku vierahodnaha źbićcia BPŁA adbyłosia ŭzharańnie va ŭradavym budynku. Na miescy pracujuć ratavalniki».
U siecivie źjavilisia videa, jak nad budynkam urada Ukrainy padymajecca husty dym.
Heta pieršy vypadak, kali ŭ vyniku rasijskaj ataki paškodžany budynak urada.
Taksama, pavodle infarmacyi miascovych uładaŭ, siońnia nočču ŭ Kijevie ŭ vyniku masiravanaha abstrełu zahinuŭ adzin čałaviek, jašče 18 atrymali ranieńni.
U Śviatošynskim rajonie paškodžana niekalki šmatpaviarchovych damoŭ. U adnym ź dzieviacipaviarchovikaŭ adbyŭsia pažar pamiž šostym i dziaviatym pavierchami. U inšym budynku zaharelisia vierchnija pavierchi, jašče ŭ adnym — pažar na trecim paviersie. U Darnickim rajonie zafiksavana traplańnie ŭ čatyrochpaviarchovy žyły dom: zaharelisia dva pavierchi, častkova razburana kanstrukcyja budynka.
Taksama nočču byli atakovany Kryvy Roh, Kramiančuh, Adesa, Zaparožža, Charkaŭ, Dnieprapiatroŭskaja vobłaść.
Kamientary