U ZŠA mietearyt upaŭ na dom. Navukoŭcy śćviardžajuć, što jon starejšy za Ziamlu
NASA paćvierdziła, što 26 červienia nad štatam Džordžyja mietearyt pralacieŭ u śvietły čas sutak, a paśla vybuchnuŭ. Daśledčyki z Univiersiteta Džordžyi vyvučyli frahmient kamienia, jaki prabiŭ dach doma ŭ horadzie Makdona, i vyznačyli, što jon utvaryŭsia kala 4,56 miljarda hadoŭ tamu — heta prykładna na 20 miljonaŭ hadoŭ starej za našu płanietu, piša Bi-bi-si.
Palot mietearyta i jaho vybuch bačyli sotni žycharoŭ Džordžyi i najbližejšych štataŭ. Padčas palotu mietearyt chutka pamianšaŭsia ŭ pamierach i chutkaści, ale kali jon udaryŭsia ab dach doma ŭ hrafstvie Hienry, jahonaja chutkaść usio ž taki składała nie mienš za 1 kiłamietr u siekundu.
Mnostva frahmientaŭ, jakija trapili ŭ budynak, pieradali navukoŭcam dla daśledavańnia. Z dapamohaj aptyčnaha i elektronnaha mikraskopaŭ hieołah Skot Charys i jahonaja kamanda vyznačyli typ mietearyta — heta byŭ chandryt, samy raspaŭsiudžany typ kamiennych mietearytaŭ. Heta paćviardžaje ŭzrost prykładna 4,56 miljarda hadoŭ.
Žychar doma pryznaŭsia, što dahetul znachodzić kala svajho domu čaścinki kaśmičnaha pyłu. Abjekt atrymaŭ nazvu «Mietearyt Makdona» i staŭ užo 27-m mietearytam, znojdzienym u Džordžyi.
Skot Charys adznačaje, što raniej padobnaje zdareńnie adbyvałasia raz u niekalki dziesiacihodździaŭ, a ciapier — niekalki razoŭ za 20 hadoŭ, dziakujučy sučasnym technałohijam i ŭvazie hramadskaści.
Vučony spadziajecca apublikavać svaje vyniki adnosna składu i chutkaści asteroida, što dapamoža lepš zrazumieć pahrozy ad inšych niabiesnych ciełaŭ. Jon padkreślivaje: «Adnojčy niešta vialikaje ŭpadzie i vykliča katastrofu. Kali my možam ad hetaha abaranicca, my chočam heta zrabić».
Pa ŭłaśniku «Softkłuba» Sirotku, jaki siadzić u SIZA KDB, prylacieła i ad Polščy — na jaho kryptabiržu Bynex nakłali sankcyi2
Kamientary