U Kitai — užo bolš za 7000 vypadkaŭ zaražeńnia virusam Čykunhuńja

U kitajskaj pravincyi Huandun ź lipienia zarehistravali ŭžo bolš za 7000 vypadkaŭ zaražeńnia virusam Čykunhuńja, i ŭłady pravincyi robiać zachady, padobnyja da tych, što byli pryniaty padčas pandemii kavidu, piša Bi-bi-si.

U ačahu novaj infiekcyi, dziesiacimiljonnym horadzie Fašań, chvorych trymajuć u balnicy na łožkach, zaviešanych maskitnymi sietkami, ciaham tydnia — abo da taho času, pakul virus nie pierastanie vyjaŭlacca ŭ ich analizach.

Virus Čykunhuńja pieranosiać kamary. Jon vyklikaje lichamanku i mocny bol u sustavach, pryčym simptomy časam mohuć zastavacca na hady. Pry hetym pamiž ludźmi virus nie pieradajecca — jaho pieranosiać tolki kamary.

To-bok, kab zarazicca, treba, kab ciabie ŭkusiŭ kamar, jaki da hetaha ŭkusiŭ zaražanaha čałavieka.

Pavodle paviedamleńniaŭ kitajskich uładaŭ, pakul va ŭsich zaražanych Čykunhuńjaj nazirajucca simptomy ŭ lohkaj formie, i 95% pacyjentaŭ vypisvajuć ciaham tydnia. I tym nie mienš, źjaŭleńnie mała viadomaha ŭ krainie virusa vyklikała ŭ Kitai nievialikuju paniku.

Uspyški Čykunhuńji byvajuć davoli časta ŭ Paŭdniovaj i Paŭdniova-Uschodniaj Azii, a taksama ŭ Afrycy, ale ŭ Kitai hety virus sustrakajecca redka.

Upieršyniu jon byŭ vyjaŭleny ŭ Tanzanii 70 hadoŭ tamu, i nazvali jaho pavodle vyrazu ź miascovaj movy makonde, jaki prykładna aznačaje «skrucicca».

Akramia Fašania, zaražeńni Čykunhuńjaj zarehistravany jašče jak minimum u 12 haradach Huanduna. Za minuły tydzień zarehistravali amal 3000 vypadkaŭ.

U paniadziełak pieršaje zaražeńnie było zafiksavana ŭ susiednim Hankonhu: u 12-hadovaha chłopčyka, jaki pabyvaŭ u lipieni ŭ Fašanie, pačalisia lichamanka, syp i boli ŭ sustavach. Ułady Huanduna zajavili, što prymuć rašučyja miery, kab spynić raspaŭsiudžańnie novaj infiekcyi.

Hramadzian zaklikajuć pry źjaŭleńni padobnych simptomaŭ nieadkładna pajści ŭ bližejšuju balnicu i pravierycca na najaŭnaść virusa.

Ułady apracoŭvajuć vadajomy, zahadali pazbaŭlacca ad zastojnaj vady ŭ damach — naprykład, u kvietkavych harškach abo kavamašynach — i pryhrazili štrafami da 10 tysiač juaniaŭ (1400 dalaraŭ) tym, chto hetaha nie robić. U stajačaj vadzie žyvuć ličynki kamaroŭ.

Akramia taho, śpiecyjalisty vypuskajuć «słanovych kamaroŭ» — kamaroŭ-daŭhanožak, jakija nie pjuć kroŭ mlekakormiačych, ale jaduć zvyčajnych kamaroŭ, što pieranosiać Čykunhuńju. U vadajomy ž zapuskajuć ryb, jakija jaduć ličynak: na minułym tydni ŭ Fašanie byli vypuščanyja 5000 takich ryb.

Niekatoryja z susiednich haradoŭ uvodzili 14-dzionny chatni karancin dla tych, chto jeździŭ u Fašań, ale ciapier jaho ŭžo admianili. Niekatoryja paraŭnoŭvajuć usie hetyja miery z tymi, što prymalisia padčas kavidu, i zadajucca pytańniem, ci patrebnyja jany.

«Usio tak znajoma. Ale ci treba heta ŭsio na samoj spravie?» — piša adzin karystalnik kitajskaj sacsietki Weibo.

«Jaki sens u karancinie? — pytajecca inšy. — Nie pojdzie ž zaražany kusać ludziej vakoł!»

Adnak padčas pandemii kavidu ŭ Kitai prymalisia značna bolš žorstkija miery: ludziej zamykali ŭ šmatkvaternych damach, na doŭhi karancin sadžali cełyja harady i h. d.

Što takoje Čykunhuńja

U bolšaści vypadkaŭ simptomy chvaroby Čykunhuńja prajaŭlajucca ciaham troch-siem dzion paśla ŭkusu kamara-pieranosčyka adnajmiennaha virusa.

Aprača harački i bolu ŭ sustavach, chvaroba moža supravadžacca sypam, hałaŭnym bolem, bolem u ciahlicach i apuchłaściu sustavaŭ.

Čaściej za ŭsio chvoryja pačynajuć papraŭlacca ciaham tydnia, ale ŭ ciažkich vypadkach bol u sustavach moža turbavać miesiacami ci navat hadami.

U ciažkaj formie Čykunhuńja čaściej za ŭsio dzivić novanarodžanych, pažyłych i ludziej ź inšymi zachvorvańniami, naprykład, z chvarobami serca ci dyjabietam.

Lačeńnia ad Čykunhuńji niama, ale i śmiarotnyja vypadki nadzvyčaj redkija.

Upieršyniu hety virus byŭ vyjaŭleny ŭ Tanzanii ŭ 1952 hodzie, paśla čaho raspaŭsiudziŭsia pa inšych rehijonach Afryki i Paŭdniova-Uschodniaj Azii. Usiaho jon zarehistravany ŭ 110 krainach.

• 0
• 0
• 0
• 0
• 0
• 0
• 0
• 0