«Vy ž razumiejecie, što my ad vas nie adčepimsia». Jak ułady prymušajuć pryvatnyja kampanii zavieści ideołahaŭ

Adzin z takich listoŭ 4 žniŭnia pryjšoŭ u kampaniju, dzie pracuje Siarhiej (imia źmienienaje). U im — patrabavańnie dać infarmacyju pra supracoŭnika, jaki kuryruje ŭ arhanizacyi pytańni ideałahičnaj raboty: charaktarystyka, daviedka-abjektyŭka, kantaktnyja źviestki. Adkaz treba nakiravać va ŭpraŭleńnie pa ideałahičnaj rabocie vykankama rajona Minska. Charakterna, što ŭ dakumiencie paznačany termin — da 1 žniŭnia 2025 hoda.

«Pa-pieršaje, dziŭna, što list atrymany siońnia, a dać spravazdaču pra vykanańnie pavinny byli jašče ŭ minułuju piatnicu, — śmiajecca Siarhiej. — Pa-druhoje, zusim nie možam zrazumieć, što heta naohuł takoje — rabotnik, jaki kuryruje pytańni ideałohii».

Miž tym u liście havorycca, što heta patrabavańnie dyrektyvy № 12 Alaksandra Łukašenki «Ab realizacyi asnoŭ biełaruskaj dziaržavy». Dakumient palityk padpisaŭ jašče ŭ krasaviku, ale niekatoryja jaho pałažeńni ŭstupili ŭ siłu tolki 9 lipienia hetaha hoda.

Adno ź ich — heta punkt ab nieabchodnaści ideołahaŭ navat u pryvatnych arhanizacyjach. Uzhadniać kandydatury treba ŭ vykankamach (kali ŭ kampanii pracuje bolš za 600 čałaviek) i rajonnych administracyjach (kali mienš za 600).

«Pakul našy jurysty dumajuć, što z hetym rabić, ale idej u nas zusim mała, — pryznajecca Siarhiej. — Nichto ź dziejnych supracoŭnikaŭ stać ideołaham nie choča, a naniać asobnaha čałavieka dla takoj pracy my nie možam — prosta niama lišnich hrošaj na jašče adzin zarobak».

Što kažuć čynoŭniki?

Žurnalist «Lusterka» pad vyhladam kiraŭnika pryvatnaha pradpryjemstva patelefanavaŭ va ŭpraŭleńnie ideałahičnaj raboty administracyi Centralnaha rajona Minska. Tam paćvierdzili, što takija listy rassyłajuć pa pryvatnych arhanizacyjach stalicy.

— My atrymali list tolki siońnia, ale adkazać pavinny byli da 1 žniŭnia. Nas pakarajuć? — spytaŭ žurnalist.

— Ničoha strašnaha, možacie dasłać adkaz na hetym tydni, — adkazała hałoŭnaja śpiecyjalistka ŭpraŭleńnia Alaksandra Rahuckaja.

— Kali niama kaho pryznačać z našaha štata, to my pavinny naniać novaha supracoŭnika?

— Nu čamu? Heta moža być dyrektar, chtości ź jaho namieśnikaŭ. Načalnik kadraŭ taksama moža być.

— A kali jany nie chočuć?

— Vy sam kiraŭnik ci kadravik?

— Ja kiraŭnik.

— Voś siabie i prapanujcie, značyć. Jość takija arhanizacyi, u jakich u roli ideołaha vystupaje niepasredna sam kiraŭnik.

— Potym mnie treba budzie pierad vami trymać spravazdaču ab praviedzienaj ideałahičnaj raboty?

— Hladzicie, vy nam padajecie dakumienty, my vas zaprašajem na sumoŭje z namieśnikam kiraŭnika administracyi, jaki niepasredna kuryruje sacyjalnuju śfieru. Paśla hetaha pačynajem z vami pracavać adnosna mierapryjemstvaŭ, sustreč vašaha pracoŭnaha kalektyvu z kiraŭnictvam administracyi i hetak dalej.

— Skažycie, heta abaviazkova? Vy spasyłajeciesia na dyrektyvu, ale heta ž nie ŭkaz.

— Tak, dyrektyva — heta nie ŭkaz. Jana nie abaviazkovaja da vykanańnia. Ale ŭ lubym vypadku, dziejničaje ŭkaz № 111 (nasamreč jon straciŭ siłu paśla taho, jak zapracavała dyrektyva № 12 «Ab realizacyi asnoŭ biełaruskaj dziaržavy». — Zaŭv. «Lusterka»). U joj vyrazna paznačana, što za ideałahičnuju rabotu ŭ pracoŭnym kalektyvie adkazvaje niepasredna sam jaho kiraŭnik. Heta značyć u lubym vypadku taki supracoŭnik u vas pavinien być.

— Jakaja adkaznaść za admovu?

— Štrafu nie praduhledžana, ale, tym nie mienš, vy ž razumiejecie, što my ad vas nie adčepimsia, — reziumavała čynoŭnica.

• 0
• 1
• 5
• 22
• 1
• 0
• 17
• 0