Knyrovič raskazaŭ, što treba rabić Cichanoŭskamu, kab vyzvalić palitviaźniaŭ
Alaksandr Knyrovič ličyć, što padnimać dyjasparu na akcyi i zdymać roliki pra toje, jak tam u Biełarusi, biessensoŭna.
Biznesmien Alaksandr Knyrovič daŭ Siarhieju Cichanoŭskamu paradu, što treba rabić, kab vyzvalić palitviaźniaŭ.
Knyrovič napisaŭ u fejsbuku, što Cichanoŭskamu treba ŭ ZŠA.
«Siońnia kluč ad dźviarej biełaruskich turmaŭ lažyć tam. I kali heta jaho «pieršaja meta» — dyk jamu tudy. U miascovyja, u pieršuju čarhu respublikanskija (tyja, što padtrymlivajuć Trampa) ŚMI.
Hetuju dumku publična vykazaŭ moj tavaryš pa frakcyi Vadzim Prakopjeŭ, i heta toj redki vypadak, kali ja ź im całkam zhodny», — piša Knyrovič.
Jon ličyć, što Cichanoŭskamu ciapier biessensoŭna padymać biełaruskuju dyjasparu na akcyi, samastojna zdymać roliki pra toje, «jak tam u Biełarusi», i sustrakacca ź jeŭrapiejskimi palitykami, jakija vielmi dobra viedajuć Łukašenku. Niama sensu i ŭ tym, kab prasić biełaruskija ŚMI źviarnucca da Trampa.
«U siłach Siarhieja, u hety vielmi karotki pieryjad paznavalnaści ŭ ZŠA, pasprabavać stać tym tryhieram, jaki źviernie ŭvahu prezidenta ZŠA na mahčymaść «lohkich pieramoh» u Biełarusi, zrabić temu biełaruskich palitviaźniaŭ zaŭvažnaj TAM.
Dla hetaha, viadoma, treba jašče surjozna padumać, jakoje pasłańnie musić być zakładzienaje ŭ takuju publičnuju aktyŭnaść», — adznačaje Knyrovič.
Na jaho dumku, taki šaniec tolki tearetyčny. Ale inšych, miarkuje Knyrovič, prosta ciapier i nie zastałosia.
Minhandlu vypadkova źliło dakumient, u jakim pakazała, jak i za što naličvaje premii11
Kamientary