Ukrainskaja žurnalistka: Zdajecca, Tramp uśviadomiŭ canu, jakuju maja siamja płacić za hetu vajnu
Žurnalistka Bi-bi-si Mirasłava Pieca padzialiłasia ŭražańniami ad razmovy z Donaldam Trampam na samicie ŭ Haazie, dzie na pres-kanfierencyi prezident ZŠA pieradaŭ pryvitańnie jaje mužu.
«Nikoli ŭ žyćci ja nie čakała, što Donald Tramp budzie pieradavać pryvitańnie majmu mužu. Ale heta adbyłosia na samicie NATA ŭ Haazie.
Śmiechu varta, ale pierad pres-kanfierencyjaj Trampa ja była sapraŭdy zasmučanaja, bo nie zmahła akredytavacca na sustreču amierykanskaha prezidenta, jakuju jon pavinien byŭ pravieści z Uładzimiram Zialenskim.
Tady ja nie viedała, što akredytavanaja presa nie budzie mieć mahčymaści źniać sustreču na videa ci ŭvohule ŭbačyć lidaraŭ.
Dyk ja paśpiašałasia da miesca, dzie Donald Tramp pavinien byŭ dać pres-kanfierencyju paźniej taho ž dnia. Tam jaho čakali sotni žurnalistaŭ z usiaho śvietu. U mianie ŭ hałavie było hatovaje pytańnie, nasamreč, dva pytańni. Ale ja viedała, što maju vielmi maleńki šaniec ich zadać.
Nie toje kab heta było niemahčyma. Jašče ŭ lutym, padčas jaho sustrečy z prezidentam Zialenskim u Avalnym kabiniecie, ja zadała prezidentu Trampu dva pytańni. Pra jaho hatoŭnaść praciahvać pastaŭki zbroi Ukrainie, kali nie budzie chutkaha miru (adkaz byŭ «tak»), i što budzie, kali Pucin parušyć spynieńnie ahniu, što tady zrobiać ZŠA. Na heta jon adkazaŭ: «A što, kali niešta zdarycca, što, kali vam zaraz na hałavu zvalicca bomba?».
Tamu spačatku ja źniała ź siabie svoj čorny pinžak, kab Donald Tramp zmoh mianie ŭbačyć u mory ciomnych kaściumaŭ, što zapoŭnili zału. Potym ja padstupiła bližej da sceny. Paśla hetaha ja padniała ruku, spadziejučysia, što jon mianie zaŭvažyć. I ŭ niejki momant jon heta zrabiŭ.
Ja zadała svajo pytańnie nakont sistem SPA Patriot i pra toje, ci hatovyja ZŠA pradać ich Ukrainie ŭ toj čas, kali Rasija ŭzmacniła bambardziroŭki ŭkrainskich haradoŭ.
Srodki supraćpavietranaj abarony — heta pryjarytet numar adzin dla Ukrainy, asabliva ciapier, kali za ličanyja dni Rasija zabiła dziasiatki mirnych žycharoŭ u Kijevie, Dniapry i Adesie.
Ja nie była hatovaja adkrycca pra svaje asabistyja prablemy camamu ŭpłyvovamu mužčynu ŭ śviecie, heta nikoli nie ŭvachodziła ŭ maje płany.
Ale padčas našaj razmovy prezident Tramp byŭ vielmi ŭdumlivy i pryjazny. Było bačna, što jon kranuty.
I jon praciahvaŭ zadavać pytańni pra mianie i maju siamju, byccam upieršyniu ŭbačyŭ zvyčajnuju ŭkrainku, na žyćcio jakoj paŭpłyvała vajna, i mieŭ mahčymaść adkryta pahavaryć.
Kali naprykancy Donald Tramp paprasiŭ mianie pieradać pryvitańnie majmu mužu, jaki abaraniaje Ukrainu z druhoha dnia poŭnamaštabnaha ŭvarvańnia, ja była ašałomlenaja.
Zdavałasia, što jon uśviadomiŭ asabistuju canu, jakuju maja siamja płacić u hetaj vajnie, i chacieŭ mianie suciešyć.
I ja viedaju, što heta razmova šmat značyła nie tolki dla mianie, ale i dla ŭsiaho ŭkrainskaha naroda.
Šmat chto va Ukrainie spadziajecca, što jana niešta značyła i dla Donalda Trampa», — napisała Mirasłava Pieca.
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu16
Kamientary