Stała viadoma, chto lotaŭ na Šry-Łanku razam z Anžalikaj Mielnikavaj i jaje ahientam

Tak, u studzieni 2024 hoda sumiesna z Łabiejevym na Šry-Łanku prybyŭ taksama ahient KDB z pašpartam prykryćcia z falšyvymi danymi. Jaho asoba pakul nie raskryvajecca, umoŭna «Kibierpartyzany» nazyvajuć jaho «Vasil».

Akramia taho, u adzin čas z Łabiejevym na Šry-Łanku ź Biełarusi prybyli były śledčy Andrej Andrejeŭ z žonkaj Irynaj Andrejevaj (Macuraj), u minułym — supracoŭnicaj Barysaŭskaha RUUS.

Pavialičyć

Pavialičyć

U kantekście hetaj historyi asabliva cikava, što ŭ KDB pryznačyli mienavita Andreja Andrejeva ŭ jakaści supravadžajučaha dla Łabiejeva. Bo farmalna słužba ŭ siłavych strukturach skončyłasia dla hetaha byłoha śledčaha Departamienta finansavych rasśledavańniaŭ pa Minskaj vobłaści ŭ 2010 hodzie. Tady Andrejeva prysudzili da źniavoleńnia ŭ papraŭčaj kałonii №3 za atrymańnie chabaru sumaj 5 tysiač dalaraŭ pry vykanańni słužbovych abaviazkaŭ.

Paśla vyzvaleńnia Andrejeŭ nie byŭ adnoŭleny na słužbie i na momant pajezdki na Šry-Łanku aficyjna pracavaŭ u TAA «Elironbud» jak inžynier pa materyjalna-techničnym zabieśpiačeńni.

Jahonaja žonka Iryna Andrejeva taksama z 2020 hoda nie znachodzicca na słužbie ŭ MUS, dzie raniej pracavała na pasadzie štatnaha inžyniera-prahramista. Jaje aficyjnaje miesca pracy — TAA «Alef Łajf».

Mahčyma, praca mienavita hetych ludziej spatrebiłasia KDB padčas sustrečy ŭ adpačynku ź Mielnikavaj praź śpiecyfičnyja navyki jak minimum adnaho ź ich.

A pakolki farmalna Andrejevy nie źjaŭlajucca supracoŭnikami raźviedki, to ich vierahodnaje pryciahnieńnie da padobnych pajezdak vyhladaje niezvyčajna.

Usie troje, muž i žonka Andrejevy i ahient «Vasil», praviali ŭvieś čas sumiesnaha «adpačynku» ŭ tyja ž samyja daty, kali na vostravie znachodziłasia Anžalika Mielnikava, a zatym razam z Łabiejevym viarnulisia ŭ Biełaruś.

Ź mierkavańniaŭ biaśpieki «Kibierpartyzany» nie nazyvajuć krynicu hetaj infarmacyi, adnak śćviardžajuć, što dakładnaść jaje imi pravierana i nie padlahaje sumnievu.

Asobna źviartajecca ŭvaha na toje, što ŭ toj ža dzień, kali Łabiejeŭ ź inšymi supracoŭnikami KDB lacieŭ u Maskvu, na tym ža samym rejsie byli i 9 supracoŭnikaŭ kampanii «Koka-Koła Bievrydžyz Biełaruś», u tym liku jaje dyrektar Alaksandr Dzianisaŭ — stary znajomy Mielnikavaj. Adnak u Šry-Łanku jany nie palacieli, a zastalisia ŭ Maskvie. Mahčyma, ich pajezdka była źviazanaja z padaŭžeńniem licenzijnaha pahadnieńnia z Coca-Cola da 2033 hoda, ale «Kibierpartyzanam» padajecca dziŭnym supadzieńnie daty i maršrutu.

***

Pra toje, što Anžalika Mielnikava prapała, stała viadoma 28 sakavika paśla zajavy Paŭła Łatuški.

Razam z tym viadoma, što jana pakinuła terytoryju Polščy i Jeŭrasajuza 26 lutaha 2025 hoda. Pavodle rasśledavalnikaŭ, za dzień da vyletu jana zabraniravała pražyvańnie ŭ piacizorkavym hateli na Šry-Łancy, dzie ŭžo byvała raniej. Z 28 lutaha pa 7 sakavika Mielnikava žyła ŭ tym hateli ź dziećmi. 7 sakavika Mielnikava ź dziećmi palacieła ŭ Dubaj, tam jejny śled hublajecca.

Pavodle «Kibierpartyzanaŭ», u sakaviku z rachunku fondu Mielnikavaj byli vyviedzienyja vialikija sumy hrošaj, što pryznačalisia dla «Kibierpartyzanaŭ» i Kaardynacyjnaj rady — ahułam z rachunku vyvieli 150 tysiač dalaraŭ.

Paśla hetaha kantaktavała z paplečnikami z Kaardynacyjnaj rady praź videasuviaź, ale nie praz asabistyja sustrečy: kazała, što chvareje. 25 sakavika pierastała vychodzić na suviaź. 13 sakavika jejny telefon vykarystoŭvali dla dostupu da fajłaŭ Kaardynacyjnaj rady ź biełaruskaha IP-adrasu — imavierna, telefon byŭ na terytoryi Biełarusi.

Dzie žančyna znachodzicca ciapier — nieviadoma.

• 4
• 1
• 7
• 5
• 9
• 2
• 11
• 0