Ankołah Karanik vystupiŭ z dakładam ab zachavańni bujnoj rahataj žyvioły

Na naradzie ź niečakanym dakładam vystupiŭ były ankołah-chirurh, a ciapier staršynia Prezidyuma Nacyjanalnaj akademii navuk Uładzimir Karanik.

Jon raskazaŭ «ab kompleksnym padychodzie da pavyšeńnia zachavanaści bujnoj rahataj žyvioły i zabieśpiačeńniu rostu jaje praduktyŭnaści».

Pavodle Karanika, za piać miesiacaŭ 2025 hoda padziež bydła vyras na 1,7%. Situacyja, jak adznačyŭ Karanik, «nie raduje». 

U jakaści vyrašeńnia prablemy jon prapanavaŭ, jak u balnicy, — «načnyja dziažurstvy z dapłatami», kab pry rodach cialat «chtości prysutničaŭ». 

Kiraŭnik NAN padkreśliŭ, što vakcyny «čaściakom užyvajucca nieadekvatna», u vyniku — vakcyny «nie pracujuć».

«Kožnaja haspadarka pavinna mieć ułasny płan vakcynacyi, ale časta hetaha niama», — zajaviŭ Karanik. Jon prapanavaŭ centralizavać zakupki vietvakcyn. 

Asobnaja ŭvaha była nadadziena prafiłaktycy i lačeńniu infiekcyjnych patałohij žyvioł.

Karanik prapanavaŭ pryciahnuć PCR-łabaratoryi sa śfiery achovy zdaroŭja ludziej dla dyjahnostyki chvarob u skaciny. «My pavinny zaraz stvaryć sistemu PCR-dyjahnostyki, jakaja daje vynik nie za miesiac, a za dzień-dva», — nazvaŭ pryjarytety Karanik. 

Jon tak heta patłumačyŭ: «Na žal, łabaratornaja dyjahnostyka infiekcyjnych zachvorvańniaŭ na siońniašni momant nie ŭ poŭnaj miery zabiaśpiečvaje vieterynarnuju słužbu nieabchodnaj infarmacyjaj. Častka mietodyk albo sastareła, albo vałodaje niedastatkovaj dakładnaściu», — rastłumačyŭ jon. Naprykład, u tym vypadku, «kali proba na takoje zachvorvańnie, jak bruceloz, daje stanoŭčy vynik, to na vyznačeńnie dakładnaha dyjahnazu idzie kala miesiaca, i na praciahu hetaha pieryjadu zachoŭvajecca niavyznačanaść z nahody dziejańniaŭ na dadzienaj fiermie i z atrymanym małakom (jaho treba pasteryzavać)», tłumačyć kiraŭnik NAN. 

Tamu, zajaviŭ jon, nieabchodna zadziejničać PCR-łabaratoryi sa śfiery achovy zdaroŭja ŭ intaresach vieterynaryi.

«Ciapier my pavinny stvarać sistemu PCR-dyjahnostyki, jakaja dazvalaje atrymlivać adkaz nie na praciahu miesiaca, a adnaho — maksimum dvuch dzion», — rastłumačyŭ kiraŭnik NAN.

Asobna abmiarkoŭvałasia pytańnie efiektyŭnaści vyroščvańnia niekatorych parod bujnoj rahataj žyvioły.

Admysłoviec pa ankachirurhii praanalizavaŭ hienietyčny patencyjał parod karoŭ. Hałštynskaja paroda — vysokapraduktyŭnaja, ale patrabuje strohich technałohij. «Dla słabych haspadarak» — lepš dackaja čyrvonaja, «karovy hetaj parody choć krychu mienš praduktyŭnyja, ale bolš ustojlivyja i ciahavityja», patłumačyŭ jon prysutnym. 

Alaksandr Łukašenka zaklikaŭ chutčej pierachodzić da spraŭ, pierastać «prosta słuchać navukoŭcaŭ», a pačać dziejničać: «Nie prosta słuchać lekcyi vučonych… Kali Karanik kaža padklučyć sistemu achovy zdaroŭja da vieterynaryi — davajcie padklučać!» 

• 1
• 0
• 10
• 6
• 1
• 0
• 0
• 0