«Prapanavaŭ hrošy». Biełaruska raspaviała, jak KDB sprabavaŭ jaje vierbavać
Pravaabarončy centr «Viasna» 11 červienia raskazaŭ pra sproby Kamiteta dziaržaŭnaj biaśpieki vierbavać biełarusaŭ za miažoj praz Facebook. Paviedamlałasia, što nie mienš jak piać pradstaŭnikoŭ dyjaspary atrymali paviedamleńni ad karystalnika Maria Pulkovskay z prapanovaj supracoŭnictva.
«Lusterka» znajšło biełarusku, jakuju KDB sprabavaŭ zavierbavać užo paśla taho, jak pravaabaroncy apublikavali infarmacyju.
Volha žyvie ŭ adnoj z krain Jeŭrapiejskaha sajuza. Ź Biełarusi žančyna źjechała paśla 2020 hoda z-za pahrozy kryminalnaha pieraśledu, źviazanaha z udziełam u pratestach. Niadaŭna ŭ Facebook jana atrymała paviedamleńnie ad niejkaj Maria Pulkovskay.
— Paviedamleńnie pryjšło ŭžo paśla taho, jak «Viasna» paviedamiła pra suviaź hetaha akaŭnta z KDB, — raspaviadaje biełaruska. — Ja pacikaviłasia, što ad mianie treba. Surazmoŭca (ci surazmoŭnica — składana skazać) adrazu ž paviedamiŭ, što piša mnie z budynka pa praśpiekcie Niezaležnaści, 17, u Minsku.
Pa zhadanym adrasie ŭ biełaruskaj stalicy znachodzicca Kamitet dziaržaŭnaj biaśpieki. Volha nie spałochałasia i praciahnuła razmovu.
— Mnie pieraličyli «zasłuhi» pierad režymam, nazvali niekalki maich balavych miescaŭ i prapanavali supracoŭnictva, — śćviardžaje jana. — Prasili paviedamlać pra ŭsie aktyŭnaści dyjaspary i mierapryjemstvy demakratyčnych sił, što adbyvajucca ŭ horadzie, dzie ja žyvu.
Volha kaža, što supracoŭnik KDB joj nie pahražaŭ, ale namiakaŭ, što ŭ vypadku admovy pasprabuje stvaryć prablemy. Jakija — nie ŭdakładniŭ. Za zhodu prapanavaŭ hrošy.
— Dakładnuju sumu nie nazvaŭ, skazaŭ, što heta zaležyć ad kaštoŭnaści atrymanaj infarmacyi, — raspaviała žančyna. — Paabiacaŭ, što hanarar ja mahu atrymać u kryptavalucie abo biaśpiečnym pieravodam na moj bankaŭski rachunak.
Pa słovach Volhi, ad supracoŭnictva jana admoviłasia.
Nahadajem, pravaabarončy centr «Viasna» paviedamlaŭ prynamsi pra piać niadaŭnich vypadkaŭ viarboŭki biełarusaŭ z-za miažy praz Facebook. Usie paviedamleńni zafiksavany z adnaho akaŭnta — Maria Pulkovskay. U im dźvie fatahrafii dziaŭčyny, na jakich nie bačna tvaru. Napisana, što žyvie ŭ Prazie. Niekatorym z tych, chto atrymlivaŭ prapanovy, abiacali biaśpieku ichnych rodnych u Biełarusi ŭ abmien na supracoŭnictva ź biełaruskimi śpiecsłužbami.
Kamientary