Samyja rannija prykmiety demiencyi i chvaroby Alchiejmiera: na što źviarnuć uvahu
Jak raspaznać pieršyja tryvožnyja sihnały, chto ŭ zonie ryzyki i ci možna papiaredzić raźvićcio demiencyi i chvaroby Alchiejmiera — tłumačyć doktar-psichijatr Uładzimir Pikirenia ŭ intervju «Jeŭraradyjo».
Jašče da taho, jak demiencyju možna dyjahnastavać, u čałavieka źjaŭlajucca jaje rannija simptomy. Pra toje, što ŭ pracy mozhu pačynajucca źmieny, śviedčyć šerah charakternych parušeńniaŭ u kahnityŭnaj śfiery i štodzionnych pavodzinach.
«Kožny z nas sutykajecca z tym, što nie moža zhadać niejkaje słova, ale [pavinna naściarožyć], kali heta stała adbyvacca čaściej. Kali čałaviek pačynaje hublacca ŭ novych miescach. Kali jamu byvaje ciažka znajści šlach, zaryjentavacca. Heta vielmi istotnaja prykmieta.
Vielmi časta razłady snu. Jość daśledavańni, jakija pakazvajuć, što parušeńni snu źjaŭlajucca prykładna na paru hadoŭ raniej za dyjahnastavańnie demiencyi», — tłumačyć Pikirenia.
Jak adznačaje doktar, ryzyka raźvićcia niejradehienieratyŭnych zachvorvańniaŭ (da ich adnosiacca demiencyja i chvaroba Alchiejmiera) istotna pavyšajecca pry najaŭnaści mietabaličnaha sindromu — pavyšanaj masy cieła, arteryjalnaj hipiertenzii i parušeńniaŭ abmienu rečyvaŭ. U hrupie pavyšanaj ryzyki taksama znachodziacca ludzi, jakija kurać, mała ruchajucca i nie atrymlivajuć dastatkovaj fizičnaj nahruzki.
«Jość istotnyja daśledavańni, jakija pakazvajuć — kali likvidavać hetyja madyfikavanyja faktary, to kolkaść vypadkaŭ chvaroby Alchiejmiera mahła b źmienšycca amal udvaja», — davodzić śpiecyjalist.
Kali havorka zachodzić pra prafiłaktyku, Pikirenia źviartaje ŭvahu na značeńnie intelektualnaj aktyŭnaści i raźvićcia tak zvanaha kanhnityŭnaha reziervu — zdolnaści mozhu kampiensavać paškodžańni dziakujučy raniej nazapašanym viedam, dośviedu i aktyŭnamu vykarystańniu razumovych funkcyj na praciahu žyćcia.
«Čym bolšy ŭ čałavieka zapas, bufier kahnityŭnych mahčymaściaŭ, tym bolš ustojlivaja sistema. Čym bolš reziervaŭ jość u hałaŭnym mozhu, tym paźniej stanoviacca vidavočnymi simptomy niejradehienieratyŭnych razładaŭ. Tamu nahruzka na mozh — heta toje, što sapraŭdy dazvalaje adciahnuć raźvićcio hetych chvarobaŭ».
Na žal, padkreślivaje ekśpiert, na siońnia nielha śćviardžać, što chvaroba Alchiejmiera paddajecca poŭnamu lačeńniu. Adnak navukovyja daśledavańni ŭ hetym kirunku aktyŭna praciahvajucca, i jość nadzieja, što ciaham piaci—dziesiaci hadoŭ adbudziecca značny praryŭ u raspracoŭcy efiektyŭnych mietadaŭ terapii.
Try hałoŭnyja chvaroby, jakija mohuć pryvieści da demiencyi
Šeść sposabaŭ abaranić siabie ad demiencyi
Nie zafiksavana ni adnaho vypadku, kab čałavieka vylečyli: chvaroba Alchiejmiera
Pamiać pažyłych ludziej moža značna palepšyć terapija pachami
Śniacca kašmary pa načach? Heta moža być rańniaj prykmietaj demiencyi
Kamientary