Kavaleŭski prapanuje zdymać sankcyi dziela vyzvaleńnia palitviaźniaŭ
Kiraŭnik Ahienctva jeŭraatłantyčnaj supracy Valer Kavaleŭski ŭ efiry «Biełsata» zajaviŭ pra nieabchodnaść źmianiać stratehiju demakratyčnych siłaŭ adnosna vyzvaleńnia palitviaźniaŭ. U svaju čarhu Źmicier Jahoraŭ raskazaŭ, jak možna padtrymlivać źniavolenych užo ciapier.
Valer Kavaleŭski zaklikaŭ admovicca ad padychodu, što niemahčyma damahčysia vyzvaleńnia palitviaźniaŭ da taho, jak padzie siońniašniaja ŭłada ŭ Biełarusi. Jon padkreśliŭ, što demakratyčnyja źmieny ŭ krainie — heta zadača «nie siońniašniaha i nie zaŭtrašniaha dnia», tamu čakać źmieny ŭładaŭ dla vyzvaleńnia źniavolenych nielha.
Kavaleŭski adznačyŭ, što ź lipienia 2024 hoda na voli pavodle pamiłavańnia vyjšli bolš jak 300 palitviaźniaŭ, a bolš jak 2000 palityčnych źniavolenych całkam adbyli svoj termin.
«Na siońniašni dzień my bačym, što aktyŭnyja namahańni ŭ hetaj suviazi robiać Złučanyja Štaty, što jany zaviali dyjałoh z režymam. Zroblenaja kankretnaja prapanova pra toje, jak źniać sankcyi ŭ abmien na vyzvaleńnie značnaj kolkaści ludziej. I ja asabista padtrymlivaju hety padychod», — zajaviŭ jon.
Taksama, dadaŭ Kavaleŭski, jon razam z Taćcianaj Chomič i Volhaj Harbunovaj šukajuć «i inšyja mahčymaści, inšyja treki dziela taho, kab vyzvalać ludziej užo siońnia».
«Ale treba dla hetaha karektavać palityčnuju pazicyju, admaŭlacca ad takoj ustanoŭki, što nie mahčyma ničoha zrabić, akramia taho, kab zrynuć režym i tolki tady budzie mahčyma vyzvalać ludziej», — skazaŭ jon, nazvaŭšy svoj padychod «kanstruktyŭnym» i «realistyčnym».
Pavodle Kavaleŭskaha, sankcyi nie dasiahnuli mety, «kab źmianić pavodziny Alaksandra Łukašenki, jon nie vyzvalaje ludziej mienavita praz sankcyi, ale jon moža ich vyzvalać, kali sankcyi buduć zdymacca». Taksama, zajaviŭ jon, sankcyi robiać «značna bolš škody na siońniašni dzień zvyčajnym biełarusam, čym Alaksandru Łukašenku».
«Tamu my havorym pra toje, što treba prajaŭlać hnutkaść i realistyčnaść u našych padychodach da pytańnia vyzvaleńnia ludziej, bo heta jość našym absalutnym pryjarytetam. Heta naš maralny abaviazak vyratoŭvać ludziej z turmaŭ», — skazaŭ kiraŭnik Ahienctva jeŭraatłantyčnaj supracy.
Pradstaŭnik fondu «BYSOL» Źmicier Jahoraŭ u svaju čarhu zajaviŭ, što «kožny z nas moža ŭvieści peŭnyja sankcyi suprać režymu» — prajavić salidarnaść z palitviaźniami:
«Režym baicca salidarnaści. Našyja sankcyi — heta dapamoha palitviaźniam. Našyja sankcyi — padtrymać dzietak palitviaźniam».
Jahoraŭ adznačyŭ, što jość mahčymaść padtrymać finansava jak kankretnych ludziej, hetak i ahulny zbor. U apošnim siarod inšaha źbirajucca hrošy, jakija iduć na dapamohu palitviaźniam, jakija vyzvalajucca. U tym liku tym, chto vyzvalajecca pavodle pamiłavańnia.
«Čałavieku nie treba ničoha dakazvać, raspaviadać svaju historyju. My tolki vieryfikujem, što jon sapraŭdy siadzieŭ pavodle palityčnaha artykułu, za palityčnuju dziejnaść, adrazu maksimalna chutka, vydajom jamu hrošy, jakija dapamahajuć kupić leki, abśledavacca, źniać minimalnaje žyllo abo častku hetaha apłacić. Heta toje, što moža zrabić kožny», — skazaŭ Jahoraŭ.
Ciapier čytajuć
Kalekcyju karcin Viktara Babaryki raspradajuć ź vialikimi źnižkami. Ale biez samaha darahoha dla jaho tvora4
Kamientary