Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»
U 2023 hodzie da žychara Homiela pryjšli za kamientary z asudžeńniem rasijskaj ahresii. Jamu prysudzili piać hadoŭ źniavoleńnia i adpravili ŭ škłoŭskuju kałoniju — tuju samuju, dzie pry niavyśvietlenych abstavinach pamior Vitold Ašurak.
«Našaj Nivie» stała viadoma pra śmierć palitviaźnia Valancina Štermiera. Infarmacyja atrymanaja ad nadziejnych krynic, adnak abstaviny trahiedyi niezrazumiełyja. Dakładna nieviadoma data śmierci — tolki toje, što heta adbyłosia ŭ pačatku 2025 hoda. Taksama niama peŭnaści, ci Štermier pamior u kałonii, ci byŭ vyviezieny ŭ balnicu — turemnuju albo cyvilnuju. U realijach łukašenkaŭskaj dyktatury ŭsia padobnaja infarmacyja chavajecca.
Na momant śmierci Valancinu Štermieru było 61 ci 62 hady. Jon hamialčuk. Pa źviestkach Digital Intelligence Team, Valancin naradziŭsia ŭ Chmialnickaj vobłaści Ukrainy, u horadzie Pałonnaje. Jon pierajechaŭ u Homiel nie paźniej za 2002 hod.
Viadoma, što ŭ jaho jość syn ad pieršaha šlubu i dačka ad druhoha šlubu.
Da źniavoleńnia Štermier pracavaŭ šmat dzie. Z 2002 pa 2009 hady jon mieŭ status indyvidualnaha pradprymalnika, pracavaŭ načalnikam prajektna-techničnaha adździeła ŭ pryvatnym pradpryjemstvie, kiravaŭ budaŭničaj firmaj «Avanhardbiznesresurs». Apošniaje miesca jahonaj pracy — dziaržaŭnaje pradpryjemstva «Čyrvonyja hvaździki», jakoje zajmajecca azielanieńniem i dobraŭparadkavańniem u Homieli i Homielskaj vobłaści.
Valancina Štermiera aryštavali ŭ červieni 2023 hoda. Jaho abvinavacili ŭ tym, što jon pakinuŭ vosiem kamientaroŭ suprać rasijskaj ahresii, u jakich nibyta abražaŭ rasijskich vajskoŭcaŭ i raspalvaŭ da ich varožaść. Taksama jaho abvinavacili ŭ abrazie Łukašenki, a taksama ŭ datyčnaści da niejkaha «ekstremisckaha farmavańnia».
U vyniku 4 kastryčnika 2023 hoda Siarhiej Bahinski z Homielskaha abłasnoha suda prysudziŭ jamu 5 hadoŭ kałonii. Prykładna praz dva miesiacy apielacyjny sud zaćvierdziŭ prysud. Štermiera ŭklučyli ŭ śpis «ekstremistaŭ» i «terarystaŭ».
Paśla hetaha Štermiera etapavali ŭ Škłoŭ, u kałoniju №17. U adnym atradzie ź im byŭ palitviazień Dźmitryj Łukša, jaki letam 2024 hoda vyjšaŭ na svabodu pa pamiłavańni. Jon raskazaŭ «Našaj Nivie», što adbyvałasia z Štermieram:
«Valancin byŭ vielmi słaby. U kałoniju jon pryjechaŭ paśla insultu. Nie viedaju, moža, u SIZA dzie jaho skruciła. Jaho z karancinu padniali ŭžo ŭ takim stanie. Pry hetym pry mnie jaho kinuli ŭ ŠIZA.
Ź im vielmi ciažka było ŭ adnym atradzie mienavita tamu, što jamu było ŭžo vielmi składana žyć, a mianty ŭsio jaho na pracu adpraŭlali.
Valancin vielmi zapavolena kazaŭ, dyj i chadziŭ ź ciažkaściu — kali my išli z pracy, jon zaŭsiody adstavaŭ, tamu što nie paśpiavaŭ. Plus zimoj paśliznuŭsia i ŭpaŭ. U jaho byŭ ci to pierałom ruki, ci to vyvich».
Ciapierašni načalnik škłoŭskaj kałonii — Alaksandr Karnijenka. Heta były mahiloŭski amapaviec, jaki na niejki čas zvalniaŭsia z orhanaŭ, ale paśla adnaviŭsia na słužbie. Kałonijaj jon kiruje z 2018 hoda. Mienavita ŭ Škłovie pry niezrazumiełych abstavinach 21 maja 2021 hoda zahinuŭ palitźniavoleny Vitold Ašurak.
«Naša Niva» — bastyjon biełaruščyny
PADTRYMAĆPamierła 39-hadovaja eks-palitźniavolenaja Hanna Kandracienka. U kałonii ŭ jaje znajšli rak, ale nie vyzvalili
Pamierła 45-hadovaja eks-palitźniavolenaja Tamara Karavaj. Letaś jaje vyzvalili pa pamiłavańni
«Była hałodnaj, uzimku akazałasia bieź ciopłych rečaŭ». Susiedki raskazvajuć pra pamierłuju eks-palitźniavolenuju Hannu Kandracienka
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud22
Kamientary
Kak i sieḿji vyrodkov izdievajuŝichsia nad političieskimi (nievinovnymi) biełarusami v kołonijach.
5 hod za kamientary! Ździeki i lutaje nianaviść da palityčnych. Ja žadaju karnikam łukafašystam dažyć da suda, kab jany nikoli nie zmahli vyjści na volu.