U jakim vypadku Kijeŭ budzie ličyć, što maje prava nanieści ŭdar pa biełaruskich NPZ? Ukrainski ekśpiert nazvaŭ hałoŭnuju ŭmovu

Za apošnija dva hady Ukraina nieadnarazova nanosiła ŭdary pa rasijskich naftapierapracoŭčych zavodach, tłumačačy heta tym, što jany źjaŭlajucca častkaj vajennaj łahistyki i zabiaśpiečvajuć palivam rasijskuju armiju. U Kijevie nie raz padkreślivali: kali cyvilny abjekt pačynaje pracavać na patreby ahresii, jon robicca zakonnaj cellu.

Na hetym fonie apošnim časam uźnikaje tema pra biełaruskija naftapierapracoŭčyja zavody — Mazyrski NPZ i «Naftan». Ciesny vajskovy sajuz pamiž Minskam i Maskvoj i apošnija zajavy Kijeva pra vykarystańnie biełaruskaj terytoryi dla padtrymki rasijskich atak vyklikajuć pytańnie, ci mohuć hetyja pradpryjemstvy razhladacca Kijevam jak vajennyja celi.

Ekśpiert kijeŭskaha Mižnarodnaha centra supraćdziejańnia rasijskaj ahresii Dźmitryj Hramakoŭ u razmovie z «Našaj Nivaj» śćviardžaje: z punktu hledžańnia Ukrainy takaja mahčymaść isnuje ŭžo ciapier. Ale, pavodle jaho, jość adna pryncypovaja ŭmova.

«Jak tolki pieršy litr paliva budzie zality ŭ rasijski tank»

Pavodle ekśpierta, vyznačalnym źjaŭlajecca toje, ci vykarystoŭvajecca pradukcyja biełaruskich NPZ dla patreb rasijskaj armii.

«Kali pradukcyja biełaruskich NPZ vykarystoŭvajecca dla zapraŭki rasijskaj vajskovaj techniki, jakaja ŭdzielničaje ŭ ahresii suprać Ukrainy, hetyja abjekty stanoviacca lehitymnymi vajennymi celami», — ličyć Hramakoŭ.

Jon padkreślivaje, što havorka idzie jak pra techniku, jakaja moža dziejničać z terytoryi Biełarusi, tak i pra techniku na sumiežnych učastkach frontu.

«Biełaruś siońnia vykarystoŭvajecca Rasijaj jak ekanamičny bustar i płacdarm dla zabieśpiačeńnia ahresii suprać Ukrainy. Jak tolki pieršy litr paliva budzie zality ŭ rasijski tank — heta ŭžo padstava razhladać NPZ jak zakonnuju vajennuju cel», — kaža ekśpiert.

Jon udakładniaje, što heta moža paćviardžacca kamiercyjnymi kantraktami.

«Kali buduć zaklučanyja kantrakty niepasredna ź Ministerstvam abarony Rasii, budzie vidavočna, što heta paliva zakuplajecca nie dla mirnych patreb», — kaža Dźmitryj Hramakoŭ.

Biełaruś — užo častka frontu

Adnym z hałoŭnych arhumientaŭ suprać udaraŭ pa biełaruskaj terytoryi časta nazyvajuć ryzyku adkryćcia druhoha frontu.

Adnak Hramakoŭ ličyć, što dla Ukrainy hety arhumient nie aktualny.

«Dla Ukrainy niama pieršaha i druhoha frontu. Front isnuje z 24 lutaha 2022 hoda, i biełaruskaja miaža ŭžo daŭno stała jaho častkaj. Pytańnie tolki ŭ intensiŭnaści bajavych dziejańniaŭ na roznych učastkach», — kaža jon.

Pavodle ekśpierta, Ukraina sapraŭdy nie zacikaŭlenaja ŭ pašyreńni bajavych dziejańniaŭ na biełaruskim kirunku. Ale heta nie moža być strymlivajučym faktaram, kali praź Biełaruś praciahvajecca padtrymka rasijskaj armii.

«Pahroza ad ekanamičnaj padtrymki rasijskich vojskaŭ moža być bolšaj, čym ryzyki, źviazanyja z udarami pa hetych abjektach», — ličyć jon.

«Heta nie ŭdary pa Biełarusi, a pa rasijskich intaresach»

Pry hetym ekśpiert padkreślivaje, što hałoŭnuju pahrozu dla Ukrainy stvaraje nie biełaruskaje vojska.

Na jaho dumku, biełaruskaja armija siońnia nie hatovaja da maštabnych nastupalnych dziejańniaŭ praź niedachop bajavoha dośviedu, techniki i čałaviečych resursaŭ.

«My nie razhladajem samu Biełaruś jak hałoŭnuju pahrozu. Dla nas pahroza — heta rasijskaja prysutnaść na terytoryi Biełarusi i rasijskija intaresy, jakija tut realizujucca», — tłumačyć Hramakoŭ.

Mienavita tamu mahčymyja ŭdary pa biełaruskich NPZ jon nazyvaje ŭdarami nie pa Biełarusi jak dziaržavie, a pa rasijskaj vajennaj infrastruktury.

«Luboje pradpryjemstva, jakoje padtrymlivaje rasijskuju ahresiju suprać Ukrainy, razhladajecca jak lehitymnaja vajennaja cel», — śćviardžaje ekśpiert.

Pavialičyć

Ci dazvalaje heta mižnarodnaje prava?

Pavodle Hramakova, ź jurydyčnaha punktu hledžańnia takija dziejańni mohuć być abhruntavanyja. Paśla taho jak Biełaruś na pačatku vajny dała Rasii svaju terytoryju dla napadu na Ukrainu, jaje status u kanflikcie źmianiŭsia.

«24 lutaha 2022 hoda faktyčna vyznačyła Biełaruś jak saŭdzielnika ahresii. Kali padtrymka praciahvajecca, adpaviednyja abjekty mohuć ličycca zakonnymi vajennymi celami. Z punktu hledžańnia mižnarodnaha prava heta lehitymna», — zapeŭnivaje ekśpiert.

Jon taksama nie čakaje pryncypovych piarečańniaŭ z boku zachodnich partnioraŭ Ukrainy.

«Biełaruś jak płacdarm rasijskaj ahresii nie patrebnaja nikomu ź jaje susiedziaŭ. Tamu ja nie dumaju, što niechta budzie suprać likvidacyi hetaj pahrozy dastupnymi srodkami», — kaža jon.

Što moža pryvieści da eskałacyi?

Na dumku Hramakova, pytańnie ŭdaraŭ pa biełaruskich abjektach zaležyć ad palityki Minska. Jon padkreślivaje, što dla samoj Ukrainy havaryć pra novuju eskałacyju ŭžo biessensoŭna.

«My ŭžo znachodzimsia ŭ stanie vajny. Nam užo niama kudy eskałavać», — kaža ekśpiert.

Pavodle jaho, Biełaruś udzielničaje ŭ vajnie nie tolki praz pradastaŭleńnie svajoj terytoryi Rasii. Jon pieraličvaje niekalki vymiareńniaŭ hetaha ŭdziełu: ekanamičnaje supracoŭnictva, infarmacyjnaje supraćstajańnie, kibierataki, jakija, pavodle ŭkrainskaha boku, ažyćciaŭlalisia ź biełaruskaj terytoryi, a taksama dypłamatyčnuju padtrymku Maskvy.

«Biełaruś nie asudziła rasijskuju ahresiju na mižnarodnym uzroŭni. U ekanamičnym, infarmacyjnym, kibiernietyčnym i dypłamatyčnym vymiareńniach jana ŭžo ŭdzielničaje ŭ hetaj vajnie. Tamu havorka nie pra novuju eskałacyju, a pra toje, ci adkryjecca jašče adno vymiareńnie hetaj vajny», — padsumoŭvaje ekśpiert.

Ułady Biełarusi paśladoŭna adkidvajuć abvinavačańni ŭ niepasrednym udziele ŭ vajnie suprać Ukrainy. Alaksandr Łukašenka padkreślivaŭ, što biełaruskija vajskoŭcy nie ŭdzielničajuć u bajavych dziejańniach, i zajaŭlaŭ, što Biełaruś imkniecca nie dapuścić dalejšaj eskałacyi kanfliktu. Pavodle jaho, Minsk nie maje namieru «ŭciahvacca ŭ čužuju vajnu», a ŭsie dziejańni krainy nosiać vyklučna abarončy charaktar i źviazanyja ź nieabchodnaściu harantavać ułasnuju biaśpieku. Łukašenka taksama śćviardžaŭ, što papiaredžvaŭ ukrainski bok nie sprabavać «uciahnuć Biełaruś u vajnu», i zapeŭnivaŭ, što «nijakich vajennych dziejańniaŭ z boku Biełarusi čakać nie varta». 

Razam z tym biełaruskija ŭłady nie admaŭlajuć ciesnaha vajennaha supracoŭnictva z Rasijaj u ramkach tak zvanaj Sajuznaj dziaržavy, pravodziać sumiesnyja vučeńni, nazyvajuć raźmiaščeńnie rasijskaj vajskovaj infrastruktury elemientam strymlivańnia i abarony i rehularna zajaŭlajuć pra kaardynacyju dziejańniaŭ z Maskvoj.

Takim čynam, pazicyi Minska i Kijeva ŭ acency roli Biełarusi ŭ vajnie pryncypova razychodziacca.

• 22
• 2
• 2
• 1
• 1
• 0
• 2
• 0