Pavieł Astroŭski — viadomy rasijski śviatar z 278 tysiačami padpisčykaŭ na YouTube, ułasnymi knihami i mierčam. Biełarusaŭ u sacsietkach aburyŭ jaho ździeklivy kamientar.
Śviatar Pavieł Astroŭski słužyć u miastečku Nachabina, što ŭ Maskoŭskaj vobłaści, a zaadno aktyŭna zajmajecca błohierstvam. Aproč YouTube-kanała, jon piša knihi i pieryjadyčna chodzić na teleprajekty i internet-šou.
Viadzie jon i Threads, tam u Astroŭskaha 158 tysiač padpisčykaŭ. 4 lipienia Pavieł adreahavaŭ na post z zaklikam da rasijan nie nazyvać Biełaruś Biełarusijaj:
«Nie ździŭlusia, kali akažacca, što vy ličycie, što pieršapačatkova ŭsie ludzi byli biełarusami i havaryli vyklučna na adzina pravilnaj vašaj movie ź idealnym vymaŭleńniem, pažoŭvajučy adzina sapraŭdnuju ježu — draniki.
Kali chto nie viedaje, Adam i Jeva byli biełarusami».
Astroŭski pieranios na biełaruskuju hlebu padychod, jaki jašče ŭ 2010‑ia vykarystoŭvała rasijskaja prapahanda. Jany vyśmiejvali teoryi niekatorych radykalnych ukrainskich aŭtaraŭ pra nadzvyčaj staražytnaje pachodžańnie ŭkraincaŭ, padajučy ich jak mejnstrymnuju navuku, kab tym samym vystavić ukrainskuju identyčnaść ahułam jak vydumku. Naprykład, byŭ fejk 2014‑ha hoda, zhodna ź jakim ukrainskija historyki nibyta ličać, što Čornaje mora vykapali ŭkraincy.
Biełarusy nie zmaŭčali:
«Imknučysia być razumnym, nielha zabyvacca zastavacca čałaviekam. Takoha kryndžu ja daŭno nie čytaŭ».
«Moža chopić užo źnievažać ludziej, cełaja nacyja vam nie dahadziła?»
Adna kamientatarka pieradrukavała kamientar Astroŭskaha, vykazała svajo abureńnie i paprasiła jaho pa-rusku nazyvać žycharoŭ Biełarusi «biełorusy», a nie «biełarusy», jak napisaŭ Astroŭski. Spadabałasia navat prapahandystu Iharu Turu.
I tolki adzinki vyrašyli apraŭdać Astroŭskaha:
«Kolki biełarusaŭ brydoty pra Rasiju tut pišuć, usio ŭsim ok, nichto nie admianiaje biełarusaŭ. A tut pažartavaŭ čałaviek z ulikam praktyki, jakaja ŭžo jość u susiedniaj krainie, dyk adrazu biełarusy pakryŭdzilisia».
Ale bolš papularnymi byli inšyja acenki — voś samy załajkany kamientar:
«Ščyra kažučy, ja ŭ šoku. Baciuška, pa sutnaści, ahułam nas źniavažyŭ, abvinavaciŭšy ŭ fanaberystaści».
U 2024‑m Astroŭski pryznavaŭsia, što padčas spoviedzi nie zadaje lišnich pytańniaŭ udzielnikam ahresii suprać Ukrainy:
«Voś jon prychodzić i jon kaža: «Baciuška, adpuści mnie hrachi». Voś jon pryjšoŭ u ratacyju. I ja baču, što ŭ jaho ŭ vačach ślozy, i ja jaho ni pra što nie spytaju. «Adpuskaješ?» — «Tak, viadoma».
Ja prosta viedaju vypadki, kali pačynajuć pytacca, ci maradzioryŭ, ci maciukaŭsia. Ja nie viedaju, jak inšyja baciuški, nie chaču ich asudžać», — kazaŭ Astroŭski.
«Naša Niva» — bastyjon biełaruščyny
PADTRYMAĆ«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak
Rasijskaja błohierka-miljońnica, jakaja zhańbiłasia ź biełaruskaj movaj, zapisała videa z tłumačeńniami — ale tak i nie vybačyłasia
Hość z Rasii ŭ Minsku ŭziaŭ u arendu mašynu — haniaŭ tak, što štrafaŭ pakinuŭ ažno na 1215 rubloŭ
Kamientary
Taki da. Astroŭskija pieršapačatkova i byli biełarusami.
Tolki voś hety mankurt daŭno zabyŭ, što niechta ź jaho dziadoŭ kaliści byŭ biełarusam. I pluje ŭ bok biełarusaŭ.