«Biełaruski apantanyja svaim vyhladam». Hrek-kipryjot pra žančyn u Minsku
Kiryjakas Kiryjaku naradziŭsia na Kipry, paśpieŭ pažyć u Łondanie, Afinach i Amsterdamie, a apošnija 12 hadoŭ trymaje ŭ Minsku na Kastryčnickaj hrecki restarančyk Go Greek. Ź im pahavaryli žurnalisty «Anłajniera».
U Biełaruś 55‑hadovy Kiryjakas Kiryjaku trapiŭ praz kachańnie — žonka Alaŭcina rodam ź Minska.
«Ja nikoli nie płanavaŭ žyć u Biełarusi. Ale na Kipry paznajomiŭsia z Alaŭcinaj — i zakachaŭsia», — pryznajecca Kiryjakas.
Adzinaje, da čaho niemahčyma pryzvyčaicca, — heta adsutnaść mora i šeraja, doŭhaja biełaruskaja zima: «Mnie zdajecca, biełaruskaja zima ciahniecca šeść miesiacaŭ na hod», — kaža Kiryjakas.
Minsk ździviŭ hreka svajoj biaśpiekaj i cišynioj: «U carkvie ŭ Minsku moža siadzieć 60 čałaviek — i vy ich nie pačujecie».
Dzieviacihadovamu synu jon spakojna dazvalaje jechać u škołu na rovary — na Kipry pra takoje nie mahło być i havorki. A čyścinia haradskich vulic uvohule vyklikała ŭ jaho ščyry šok: «Ja nie pavieryŭ žoncy: što ty maješ na ŭvazie, jany myjuć vulicy? Vaŭ!»
Razam z tym Kiryjakas zaŭvažaje, što biełarusy značna strymaniejšyja za hrekaŭ u vyjaŭleńni emocyj.
«My abaviazkova abdymiemsia, pacałujemsia, jak byccam nie bačylisia ceły hod, choć, chutčej za ŭsio, sustrakalisia ŭčora ŭviečary», — raskazvaje jon, uzhadvajučy, jak jaho žonka prosta pamachała rukoj siabroŭcy praz vulicu zamiest taho, kab pabiehčy nasustrač.
Urazili jaho i ścipłaściu i biełaruskija śviaty ŭ paraŭnańni z hreckimi: kali ŭ Biełarusi na viasielle kličuć maksimum 300 haściej, to na viasielli jaho brata hulała 3500 čałaviek — i heta jašče nie rekord.
Nie abyšłosia i biez krytyčnych zaŭvah: «Biełarusy bolš apantanyja vyhladam, pryhažościu i chudarlavaściu, asabliva žančyny», — padkreślivaje Kiryjakas, dadajučy, što ŭ Hrecyi bolš addajuć pieravahu stylu kežuał praź śpiakotu.
Zaŭvažyŭ jon i słabaje viedańnie biełarusami anhlijskaj movy — maŭlaŭ, dla hrekaŭ Kipra heta pytańnie vyžyvańnia praz turyzm.
Słabaje viedańnie anhlijskaje movy tłumačycca tym, što dla biełarusaŭ jana nieabaviazkovaja, bo ŭłady krainy ŭsio pryviazali da Rasii i zaviazali na Rasiju, što, adnak, stvaraje vialikija niebiaśpieki dla niezaležnaści.
Zatoje Kiryjakas chvalić biełaruskuju miedycynu: «Daktary ŭ Biełarusi vielmi dobryja, heta praŭda», — i navat ździviŭ svajho kiprskaha doktara jakaściu minskaha MRT.
Za dvanaccać hadoŭ u Minsku Kiryjakas paśpieŭ, jak sam žartuje, pryvučyć biełarusaŭ da frape — chałodnaj hrečaskaj kavy, jakuju na radzimie pjuć ceły hod.
A paraŭnoŭvajučy zarobki, jon nahadvaje: siaredniaja zarpłata ŭ Hrecyi kala 1100 jeŭra, na Kipry — kala 2000 jeŭra, ale i košt žylla, kamunałki dy praduktaŭ tam prykładna ŭtraja vyšejšyja, čym u Biełarusi. Tamu, choć hreki atrymlivajuć 13 zarobkaŭ na hod zamiest biełaruskich dvanaccaci, ale ŭzrovień žyćcia ciapier u Biełarusi istotna vyšejšy, čym u Hrecyi, i zdahaniaje ŭžo i kiprski.
«Tak, siaredniaja zarpłata ŭ Hrecyi sapraŭdy kala €1000, — kaža Kiryjakas. — Ale treba ŭličvać, što heta mienavita siarednija ličby. Usio zaležyć ad taho, čym kankretna ty zajmaješsia. Dapuścim, prybiralščyca ŭ restaranie budzie atrymlivać €900, aficyjant — €1000, kuchar — €1500, a šef-kuchar — €2000—4000. Šmat što zaležyć ad samaaddačy, adukacyi, vopytu. Važny niuans: asnoŭnyja vydatki (arenda i kupla žylla, kamunalnyja pasłuhi, niekatoryja pradukty, internet, mabilnaja suviaź) u Hrecyi razy ŭ try daražejšyja, čym u Biełarusi», — dadaje jon.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud31
Kamientary