«Časam prychodzicca navat załazić u śmietnicu». Vałanciory ź Minska raskazali, jak ratujuć z vulicy chatnich pacukoŭ
Kali kažuć pra vyratavańnie biazdomnych žyvioł, pierad vačyma paŭstaje vobraz vałancioraŭ ź miłymi kotkami i sabačkami. Ale Maryja Cichamirava i Anastasija Ašychmina dapamahajuć tym, kaho mnohija bajacca — pacukam i myšam, a taksama trusam, marskim śvinkam i inšym hryzunam, jakija trapili ŭ biadu.
Maryja Cichamirava i Anastasija Ašychmina ź Minska zajmajucca ratavańniem chatnich hryzunoŭ — ad pacukoŭ da nutryj. Jany abjadnalisia ŭ vałanciorskuju inicyjatyvu «RATuj!» i ciapier kłapociacca pra sotni žyvioł, jakija trapili ŭ biadu, piša «Smartpres».
Maryja i Anastasija žyvuć ź dziasiatkami svaich padapiečnych. Paśla niadaŭniaha vykliku jany zabrali z kvatery ŭ Zasłaŭi 82 pacučaniat, a paźniej — jašče 195 pacukoŭ roznaha ŭzrostu. Hryzuny biehali pa pakojach i razmnažalisia, pieratvaryŭšysia ŭ sapraŭdnuju katastrofu. Ciapier dziaŭčaty žyvuć pa raskładzie: karmić, lačyć, čyścić kletki.
U zvyčajnaj haradskoj kvatery jany stvaryli sapraŭdny pacučyny «horad» z šmat'uzroŭnievymi kletkami, dzie žyvioły atrymlivajuć dohlad, charčavańnie i kłopat. Kali pacuki padychodziać da dźvierak kletak — heta vyhladaje jak čarha ŭ stałovuju: usie čakajuć pačastunku.
Prajekt «RATuj!» abjadnoŭvaje vosiem vałancioraŭ z usioj Biełarusi.
U ich kłopacie — nie tolki chatnija pacuki, ale i inšyja hryzuny: trusy, myšy, marskija śvinki, chamiaki. Adnaho razu jany navat prytulili nutryju, jakuju niechta spačatku zavioŭ, a potym kinuŭ. Žyviołu pieradali ludziam, što žyvuć za horadam.
Časta vałanciory atrymlivajuć zvanki ad ludziej, što zaŭvažyli na vulicy chatniaha hryzuna. Zatym — pastki, pieranoski, ježa. Nie zaŭsiody žyvioła dajecca ŭ ruki — davodzicca leźci pad mašyny, u kantejniery sa śmiećciem. Byvaje, pacuki kusajuć — ad strachu.
Anastasija i Marija z bolem kažuć, što pacukoŭ časta nie ŭsprymajuć jak chatnich žyvioł — u adroźnieńnie ad kotak i sabak. Ale chatnija pacuki nie mohuć vyžyć na vulicy. Jany — ručnyja i zvykłyja da čałavieka.
Siarod prablem — nie stolki charčavańnie, bo ludzi achvotna dapamahajuć, prynosiać korm, sušanyja jabłyki, napaŭnialniki, — kolki prastora i čas. Paśla «pacučynaha desantu» z Zasłaŭla kvatera pieratvaryłasia ŭ mini-prytułak: asobnyja kletki dla samcoŭ, samak, ciažarnych, małych i «łazareta».
Ciapier čytajuć
Kolki biełarusaŭ hałasavała za Łukašenku na raniejšych vybarach? Apublikavanyja zakrytyja ličby dziaržaŭnych apytańniaŭ18
Kolki biełarusaŭ hałasavała za Łukašenku na raniejšych vybarach? Apublikavanyja zakrytyja ličby dziaržaŭnych apytańniaŭ
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1111
Kamientary