«Jany byli macniejšyja za artyleryju». Zialenskaha paraŭnoŭvajuć z Čerčylem, ale kaho na samaj spravie jon ličyć kumiram
Prezidenta Ukrainy Uładzimira Zialenskaha časta paraŭnoŭvajuć z Uinstanam Čerčylem — kiraŭnikom Vialikabrytanii, jaki ŭ ciažkija časy Druhoj suśvietnaj vajny kinuŭ vyklik nacysckaj Hiermanii. Takija anałohii ŭźnikajuć pa zrazumiełych pryčynach: Zialenski taksama apynuŭsia na čale dziaržavy padčas vajny i staŭ simvałam supracivu. Adnak sam Zialenski nie ŭ zachapleńni ad paraŭnańnia z Čerčylem. Heta stała viadoma z knihi amierykanskaha žurnalista Sajmana Šustera «Šoŭmien» pra Uładzimira Zialenskaha.
Paraŭnańnie prezidenta Ukrainy Uładzimira Zialenskaha z brytanskim premjer-ministram časoŭ Druhoj suśvietnaj vajny Uinstanam Čerčylem vyhladaje naturalnym dla mnohich. Jak i Čerčyl, Zialenski apynuŭsia na čale dziaržavy ŭ momant histaryčnaj navały i nie pabajaŭsia kinuć vyklik vorahu. Ale sam Zialenski ŭchilajecca ad hetaj anałohii i navat nazyvaje jaje sumnieŭnaj — z-za impierskich pohladaŭ, jakich trymaŭsia Čerčyl.
«Heta nie maja rola. Mnie bližej inšyja hieroi taho času», — tak možna pierakazać nastroj ukrainskaha prezidenta, jaki ŭ razmovie z žurnalistam Sajmanam Šusteram nazyvaje svaimi sapraŭdnymi aryjencirami fihury zusim inšaha kštałtu — nie palitykaŭ, a mastakoŭ.
Siarod ich — piśmieńnik Džordž Orueł, viadomy svaimi antytatalitarnymi tvorami, i asabliva — Čarlz Čaplin, akcior i komik, jaki navažyŭsia adkryta vyśmiejać Hitlera ŭ filmie «Vialiki dyktatar».
«Byli takija ludzi, takija artysty, jakija dapamahali hramadstvu, i ich upłyŭ časta akazvaŭsia macniejšym za artyleryju», — tak Zialenski ŭ razmovie z Šusteram adazvaŭsia pra Čaplina i mienavita tak, vyhladaje, chacieŭ bačyć i ŭłasnuju rolu.
Kamientary