Maładyja baćki ŭ 100 hadoŭ. U pary hałapahoskich čarapach upieršyniu naradzilisia dzieci
Para hałapahoskich čarapach, jakija znachodziacca pad pahrozaj źniknieńnia i žyvuć u zaaparku amierykanskaha horada Fiładelfija, upieršyniu ŭ žyćci stała baćkami. Paviedamleńni pra heta asabliva radujuć navukoŭcaŭ jašče i tamu, što ŭzrost abiedźviuch čarapach — kala 100 hadoŭ, paviedamlaje Bi-bi-si.
Zaapark paviedamiŭ, što 27 lutaha z adkładzienych samkaj ź mianuškaj Mamačka jajek vyłupiłasia pieršaje dziciania, zatym chutka źjavilisia astatnija. Ich vaha składała ad 70 da 80 hramaŭ.
Supracoŭniki zaaparka sočać za stanam inšych jajek, ź jakich u najbližejšyja tydni mohuć źjavicca novyja čarapachi.
Navukoŭcy ličać, što Mamačcy 97 hadoŭ. «[Jana] źjaviłasia ŭ zaaparku ŭ 1932 hodzie, a heta aznačaje, što luby, chto naviedvaŭ zaapark za apošnija 92 hady, jaje, vierahodna, bačyŭ», — kaža kiraŭnica zaaparka Fiładelfii Džo-Eli Mahierman.
Pryjaciel Mamački i baćka dzicianiat pa imieni Abracca pierajechaŭ u Fiładelfiju adnosna niadaŭna, u 2020 hodzie (da hetaha jon žyŭ u zaaparku Paŭdniovaj Karaliny). Navukoŭcy miarkujuć, što svajoj partniorcy jon prychodzicca amal što adnahodkam: jamu spoŭniłasia 96 hadoŭ. Ciapier novanarodžanych čarapach trymajuć udalečyni ad naviedvalnikaŭ, i jany «narmalna jaduć i rastuć», piša zaapark.
Płanujecca, što jany ŭpieršyniu buduć prademanstravanyja šyrokaj publicy 23 krasavika, kali «spoŭnicca 93 hady z momantu prybyćcia Mamački ŭ zaapark» Fiładelfii.
Pavodle paviedamleńnia Fiładelfijskaha zaaparka, naradžeńnie dzicianiat hałapahoskaj čarapachi — pieršaja padobnaja padzieja ŭ jaho 150-hadovaj historyi, a Mamačka stała samym pažyłym pradstaŭnikom svajho vidu, jaki ŭpieršyniu ŭ svaim žyćci staŭ maci.
«Heta važny etap u historyi zaaparka Fiładelfii, i my vielmi rady paviedamić pra hetuju navinu žycharam našaha horada, rehijona i ŭsiaho śvietu», — piša Mohierman.
Hałapahoskija čarapachi adniesieny da vidaŭ žyvioł, što znachodziacca na miažy źniknieńnia ŭ žyvoj pryrodzie. U amierykanskich zaaparkach utrymlivajecca mienš za 50 takich čarapach.
Jak piša na svaim sajcie zaapark San-Dyjeha, hałapahoskija čarapachi zachoŭvajuć zdolnaść da razmnažeńnia na praciahu ŭsiaho žyćcia. Dakładnaja praciahłaść ich žyćcia nieviadomaja, adnak adzin z pradstaŭnikoŭ hetaha vidu zdoleŭ dažyć da 171-hadovaha ŭzrostu.
Ciapier čytajuć
BNTU: Vykładčyk, jaki ŭciakaŭ ad milicyi, pamior ad sardečnaha prystupu3
Kamientary