Stała viadoma, dzie zaraz budzie pracavać čynoŭnica, jakaja spała na inaŭhuracyi Łukašenki
Błohier Andrej Pavuk, daviedaŭšysia pra zvalnieńnie kiraŭnicy spraŭ Homielskaha abłvykankama Aleny Kličkoŭskaj, datelefanavaŭsia ŭ abłvykankam, kab udakładnić, što adbyłosia z čynoŭnicaj, piša «Fłahštok».
Supracoŭnica Kiravańnia spravami abłvykankama, jakaja padniała trubku, adkazała, što nazaŭtra paśla zvalnieńnia Alena Kličkoŭskaja nibyta znachodzicca ŭ kamandziroŭcy:
«U jaje siońnia apošni dzień. A potym jaje ŭžo nie budzie. Jana pajšła ŭ prafsajuzy».
Supracoŭnica nie ŭdakładniła, u jakim mienavita prafsajuzie budzie pracavać Kličkoŭskaja, skazaŭšy tolki, što jana stanie jaho staršynioj.
Vierahodna, čynoŭnica zojmie pasadu staršyni Homielskaha abłasnoha abjadnańnia prafsajuzaŭ, jakaja zastavałasia vakantnaj paśla adstaŭki Piatra Kiryčenki, eks-kiraŭnika Homielskaha harvykankama.
«Fłahštok» datelefanavaŭsia da abłasnoha abjadnańnia prafsajuzaŭ — tam adkazali, što staršynia jašče nie pryznačany, ale z razmovy stała zrazumieła, što na hetuju pasadu čakajuć mienavita Kličkoŭskuju.
Supracoŭnica vykankama, jakaja razmaŭlała z błohieram, zapeŭniła, što čynoŭnicu nie zvolnili — jana «sama zachacieła», i sa snom na inaŭhuracyi Łukašenki heta nijak nie źviazana: «Čałaviek užo miesiac uzhadniajecca na pasadu».
Źviestki pra toje, što Kličkoŭskaja dramała padčas inaŭhuracyi Alaksandra Łukašenki, vyklikali šyrokaje abmierkavańnie. Pavodle infarmacyi, padčas tranślacyi režysioru daviałosia pieraklučyć kamieru, kab nie pakazvać čynoŭnicu, jakaja «kluje nosam».
Što da novaha kiraŭnika spraŭ Homielskaha abłvykankama, to krynica, źviazanaja z abłvykankamam, paćvierdziła: razmovy pra toje, što kiraŭnika administracyi Navabielickaha rajona Alaksieja Vasiučenku pavysiać, chadzili daŭno:
«Toje, što Kličkoŭskuju płanava zamianili paśla snu na inaŭhuracyi, cudoŭna supała. Inšyja čynoŭniki napružylisia, a ŭ abłvykankamie rassłabilisia — Kiraŭnictva spravami mocna napružvała kalehaŭ».
Ciapier čytajuć
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska1
Kamientary