Jak časta treba myć nohi z myłam?

Kali my myjemsia, to zvyčajna kancentrujemsia na padpachach, a voś nohi, asabliva stupni, časta zastajucca biez naležnaj uvahi. Tym nie mienš, na dumku ekśpiertaŭ, stupni zasłuhoŭvajuć jak minimum takoha ž dahladu, kali nie bolšaha.

Jak piša BBC, stupni, asabliva skura pamiž palcami, — heta vilhotnaje i ciopłaje asiarodździe, idealnaje dla rostu mikrobaŭ. Bolšaść ludziej nosić škarpetki i abutak, što ŭtrymlivajuć vilhać i paharšajuć situacyju.

Na kvadratnym santymietry skury stupniaŭ žyvie ad 10 tysiač da miljona bakteryj. Asabliva časta tam sustrakajucca Staphylococcus i Corynebacterium, a taksama hrybki rodu Candida, Aspergillus, Trichosporon i inšyja. Na stupniach naohuł sustrakajecca najbolšaja raznastajnaść hrybkoŭ siarod usich častak cieła.

Heta ŭžo dastatkovaja pryčyna, kab nie hrebavać hihijenaj. U chodzie adnaho z daśledavańniaŭ vučonyja praanalizavali padešvy 40 dobraachvotnikaŭ. U tych, chto myŭ nohi dvojčy ŭ dzień, na kožnym kvadratnym santymietry skury znachodziłasia kala 8800 bakteryj. U tych, chto myŭ nohi cieraź dzień, — bolš za miljon.

Adnak važnaja nie tolki kolkaść, ale i typ bakteryj. Naprykład, stafiłakoki adkazvajuć za pieraŭtvareńnie aminakisłot u latučyja tłustyja kisłoty, siarod jakich izavaleryjanavaja — mienavita jana nadaje naham «syrna-kisły» pach.

U adnym daśledavańni 2014 vyśvietliłasia, što stafiłakoki składajuć 98,6% usioj bakteryjalnaj fłory padešvy noh. Uzrovień latučych kisłot, u pryvatnaści izavaleryjanavaj, byŭ značna vyšejšy na padešvie, čym na vierchniaj častcy stupni. Čym bolš hetych bakteryj — tym macniejšy pach.

Ale myć nohi treba nie tolki dziela pachu. Dobraja hihijena dapamahaje praduchilić hrybkovyja i bakteryjalnyja infiekcyi. Parušeńnie skurnaha barjera moža pryvieści da śvierbu, acioku, niepryjemnaha pachu i navat surjoznych infiekcyj skury.

Samaja raspaŭsiudžanaja prablema — epidermafityja stupni, jakaja źjaŭlajecca paviarchoŭnaj hrybkovaj infiekcyjaj skury na nahach. Jana vyklikaje łuščeńnie, vysypku, treščynki i śvierb. Akramia taho, navat zvyčajnyja bakteryi, takija jak Pseudomonas, mohuć pry traplańni ŭ kroŭ praz drobnuju ranu vyklikać naryvy i zapaleńni. Stupni asabliva ŭraźlivyja, bo ranki na ich hojacca pavolniej, čym na inšych častkach cieła.

Pavialičyć

Choć skurnyja infiekcyi mohuć uźniknuć navat kali vy vykonvajecie praviły hihijeny noh, rehularnaje ich myćcio pamianšaje kolkaść prysutnych bakteryj. Takim čynam, kali vy vypadkova parežaciesia, vakoł budzie mienš mikrobaŭ, jakija mohuć trapić u kroŭ.

Asabliva važna myć nohi štodzień ludziam z dyjabietam. U ich skura bolš uraźlivaja, a imunitet asłableny. Daśledavańni pakazvajuć, što na skury stupniaŭ u dyjabietykaŭ vyšejšaja dola patahiennych bakteryj, jakija čakajuć zručnaha momantu, kab vyklikać infiekcyju. Navat nievialikija rany ŭ ich mohuć nie haicca, pryvodziačy ŭ zapuščanych vypadkach da amputacyi.

Akramia taho, dyjabietyki mohuć tracić adčuvalnaść u nahach, z-za čaho nie zaŭvažajuć parezaŭ i raskolin. Myćcio noh dapamahaje svoječasova ich vyjavić.

Važna nie pierastaracca z myćciom

Choć štodzionnaje myćcio karysnaje dla niekatorych, nie ŭsim heta nieabchodna. Niekatoryja ekśpierty ličać, što zanadta častaje myćcio moža paškodzić naturalny mikrabijom skury. Karysnyja bakteryi dapamahajuć zachoŭvać jaje vilhotnaść i barjernyja funkcyi. Častaje vykarystańnie haračaj vady i ahresiŭnaha myła moža vyklikać suchaść, razdražnieńnie i navat ekzemu.

Taksama nie varta praźmierna vydalać mazali — jany słužać naturalnaj abaronaj. Antybakteryjnaje myła moža razburyć bałans mikrafłory, adkryvajučy šlach patahiennym i ŭstojlivym da antybijotykaŭ štamam.

Imunnaja sistema taksama maje patrebu ŭ «treniroŭcy» — kantakt ź mikraarhanizmami ŭ razumnych miežach spryjaje jaje narmalnamu raźvićciu. Niekatoryja navukoŭcy miarkujuć, što praźmiernaja hihijena, asabliva ŭ dziacinstvie, moža asłablać imunitet.

Dyk jak ža časta treba myć nohi z myłam? Usio zaležyć ad indyvidualnych asablivaściaŭ.

Kali ŭ vas dyjabiet — nohi treba myć kožny dzień.

Kali vy zdarovyja i nie zajmajeciesia fizičnaj aktyŭnaściu, dastatkova 2—3 razy na tydzień.

Ale kali vy biehajecie, trenirujeciesia abo časta paciejecie — myjcie nohi čaściej.

Pry hetym važna nie tolki jak časta, ale i jak: abaviazkova sušyć, asabliva miž palcami.

• 19
• 0
• 0
• 3
• 0
• 0
• 0
• 1