Tramp zajaviŭ pra stvareńnie amierykanskaha źniščalnika novaha pakaleńnia
Prezident ZŠA Donald Tramp zajaviŭ na pres-kanfierencyi, praviedzienaj u Biełym domie razam z kiraŭnikom Pientahona Pitam Chiehsietam, što ŭ ZŠA vypraboŭvajecca novy amierykanski źniščalnik šostaha pakaleńnia, jaki budzie nazyvacca F-47.
Tramp raskazaŭ, što takija źniščalniki budzie vyrablać kampanija Boeing. Pa jaho słovach, ekśpierymientalnaja viersija F-47 «užo lotaje piać hadoŭ», a kančatkovaja budzie pieraŭzychodzić usie astatnija samaloty.
«F-47 budzie samym daskanałym, samym mahutnym i śmiertanosnym samalotam z kali-niebudź pabudavanych. Jon budzie abstalavany samaj sučasnaj technałohijaj utojenaści. Jon amal nieprykmietny i vałodaje biesprecedentnaj mahutnaściu. Jon maje najbolšuju mahutnaść siarod usich reaktyŭnych samalotaŭ takoha typu, kali-niebudź stvoranych», — zajaviŭ prezident ZŠA.
Jon taksama padkreśliŭ, što «vorahi Amieryki nikoli nie ŭbačać jaho», i dadaŭ, što ZŠA mohuć pradavać sproščanuju viersiju hetaha samalota krainam Jeŭrasajuza.
«Nikoli nie było ničoha navat blizkaha da jaho, ad chutkaści da manieŭranaści, da mahčymaj karysnaj nahruzki. I hetaja raspracoŭka viałasia na praciahu doŭhaha pieryjadu času. Paśla surovaj i mocnaj kankurencyi pamiž niekatorymi viadučymi amierykanskimi aerakaśmičnymi kampanijami VPS majuć namier prysudzić Boeing kantrakt na płatformu dla daminavańnia ŭ pavietry nastupnaha pakaleńnia», — adznačyŭ Tramp.
Kantrakt z Boeing na sumu bolš za 20 miljardaŭ dalaraŭ achoplivaje etap inžyniernaj i vytvorčaj raspracoŭki.
Ministr abarony ZŠA Pit Chiehsiet, u svaju čarhu, zajaviŭ, što Amieryka budzie mieć «pakaleńnie budučaha pavietranaha panavańnia dziakujučy hetamu źniščalniku šostaha pakaleńnia».
Vydańnie The New York Times vykazała mierkavańnie, što numar 47 (jaki Tramp u svajoj pramovie nazvaŭ «pryhožaj ličbaj») «vidavočna abrany ŭ pamiać pra jaho prezidenctva», bo Tramp u svoj druhi termin staŭ 47-m pa liku prezidentam ZŠA.
Kamientary