Dziaržsakratar ZŠA zaklikaŭ da «aściarožnaha aptymizmu» adnosna pieramirja pamiž Ukrainaj i Rasijaj

Dziaržsakratar ZŠA Marka Rubia zaklikaŭ da «aściarožnaha aptymizmu» ŭ pieramovach ab spynieńni ahniu pamiž Ukrainaj i Rasijaj, adnačasova ŭzhadaŭšy pra «pazityŭnaje ŭzajemadziejańnie» śpiecyjalnaha pasłańnika Uitkafa i Uładzimira Pucina. Pra heta kiraŭnik amierykanskaj źniešniepalityčnaj słužby zajaviŭ padčas pres-kanfierencyi ŭ kanadskim horadzie Šarlevua paśla sustrečy ministraŭ zamiežnych spraŭ krain «Vialikaj siamiorki», paviedamlaje «Hołas Amieryki».

Vystupajučy pierad žurnalistami, Rubia taksama pryznaŭ «składanaść situacyi» i nieabchodnaść praciahvać namahańni ŭ hetym kirunku, adznačyŭšy, što prezident Tramp «budzie prymać rašeńni paśla detalovaha vyvučeńnia» ŭsich aśpiektaŭ.

«Pytańnie ŭ tym, ci sapraŭdy my ruchajemsia da spynieńnia ahniu, ci heta tolki taktyka zaciahvańnia? Dumaju, my daviedajemsia pra heta chutčej rana, čym pozna, i šmat budzie zaležać ad učarašniaj razmovy ambasadara Uitkafa i inšych faktaraŭ, jakija ŭpłyvajuć na chod hetaj partyi, ale pakul my jašče nie dajšli da hetaha momantu, — skazaŭ Rubia. — Ale my, biezumoŭna, havorym pra mir, prynamsi ŭpieršyniu za try hady».

Dziaržsakratar ZŠA taksama zajaviŭ, što sadzicca za stoł pieramovaŭ dla abmierkavańnia doŭhaterminovaj biaśpieki niemahčyma biez spynieńnia aktyŭnych bajavych dziejańniaŭ.

«My nie zmožam pierajści da druhoha etapu, pakul nie projdziem pieršy, — skazaŭ Rubia. — My ličym, što vielmi ciažka vieści pieramovy ab tryvałym miry i biaśpiecy ŭ razhar tatalnaj vajny, tamu my pavinny pasprabavać panizić hety ŭzrovień, kab źjaviłasia mahčymaść pierajści da druhoj fazy».

Dziaržsakratar taksama adznačyŭ, što ŭ vyniku pieramovaŭ jak Ukraina, tak i Rasija pavinny buduć pajści na sastupki, adnak nie staŭ udakładniać, jakija mienavita.

«Idzie vajna, jakaja nie maje vajskovaha rašeńnia, i ni Rasija, ni Ukraina nie mohuć dasiahnuć svaich maksimalisckich vajennych metaŭ, — skazaŭ Rubia. — Adziny sposab spynić hetuju vajnu — heta pieramovy. Pieramovy — niachaj heta budzie ŭ biźnieesie, handli abo hieapalitycy — praduhledžvajuć, što abodva baki robiać peŭnyja sastupki… Jakija mienavita sastupki buduć zroblenyja, jašče treba vyśvietlić. Heta pavinna stać častkaj pieramoŭ, ale nam jašče nieabchodna dasiahnuć toj stadyi, kali hetyja pytańni buduć abmiarkoŭvacca, i ŭ vyniku, što b ni zdaryłasia, abodva baki pavinny buduć zhadzicca z hetym».

• 1
• 2
• 0
• 1
• 0
• 0
• 0
• 0