Vialikaja francuzskaja miedyjahrupa ŭstała na prarasijskija pazicyi
Upłyvovyja francuzskija ŚMI, jakija naležać viadomamu miedyjamahnatu Vensanu Balare, usio bolš tranślirujuć prarasijskija naratyvy.
Jak piša Le Monde, u Francyi rezka abvastrylisia adnosiny pamiž Jelisiejskim pałacam i hrupaj ŚMI, jakija naležać kansiervatyŭnamu miljarderu Vensanu Balare (Vincent Bolloré).
Praz čatyry dni paśla zvarotu Makrona, u jakim jon vykazaŭ svaju zakłapočanaść mahčymymi nastupstvami źmienaŭ mižnarodnaha stanovišča dla Francyi i Jeŭropy, štotydniovik Le Journal du dimanche (JDD) pryśviaciŭ svaju vokładku vajnie va Ukrainie.
Pad zahałoŭkam «Eskałacyja strachu» byŭ raźmieščany zdymak Makrona. U svaim materyjale hazieta apisała prezidenta jak palityka, jakija «pierabolšvaje rasijskuju pahrozu» i «raździmaje strachi, kab adciahnuć uvahu».
9 sakavika administracyja prezidenta Francyi zaklikała vydańnie «ŭ hety składany pieryjad» i «pierad tvaram rasijskaj niebiaśpieki» «prytrymlivacca poŭnaj dakładnaści faktaŭ».
Miedyja-hrupa Balare, u jakuju akramia JDD uvachodziać telekanały CNews i Europe 1, užo daŭno raspaŭsiudžvaje prarasijskija naratyvy i achvotna daje słova palitykam, jakija simpatyzujuć Kramlu.
Niadaŭna televiadučaja Larans Ferary (Laurence Ferrari) abvinavaciła ŭrad Francyi ŭ imknieńni «pačać vajnu suprać Rasii» ŭ toj momant, kali «Ukraina jak nikoli blizkaja da miru».
Heta vyklikała rezkuju reakcyju premjer-ministra Fransua Bejru, jaki nahadaŭ, što padobnyja śćviardžeńni ŭžo hučali ŭ 1930-ch hadach i pryviali da najhoršych nastupstvaŭ.
Vydańnie adznačaje, što raniej Jelisiejski pałac nie kanfliktavaŭ ź miedyja Balare, niahledziačy na ich pravy ŭchił i prarasijskuju rytoryku. Makron paźbiahaŭ publičnaha asudžeńnia haziety, ministry i deputaty ad prezidenckaj partyi da apošniaha času rehularna źjaŭlalisia ŭ efirach hetych ŚMI. Adnak ciapier častka makranistaŭ patrabuje «sanitarnaha kardonu» vakoł hetych miedyja, abvinavačvajučy ich u stvareńni «alternatyŭnaj realnaści».
U svaju čarhu sienatar Kłod Malure (Claude Malhuret) nazvaŭ dziejnaść miedyja Balare «taksičnaj», zajaviŭšy, što jany «prasoŭvajuć idei najbolš ekstremisckich pravych, prapucinskich sił», što ŭjaŭlaje saboj sapraŭdnuju pahrozu dla demakratyi.
Jak adznačaje Le Monde, niahledziačy na rost prarasijskaj rytoryki ŭ miedyjahrupie Balare, bolšaść francuzaŭ, pavodle apytańniaŭ, padzialajuć zaniepakojenaść Makrona nakont rasijskaj pahrozy, a palitołahi papiaredžvajuć, što luby budučy kandydat u prezidenty, jaki pasprabuje pieramienšyć hetuju pahrozu, ryzykuje stracić padtrymku hramadstva.
Ciapier čytajuć
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im14
Kamientary