Ad rehi da dyska: karol Karł III pradstaviŭ publicy svoj asabisty muzyčny płejlist
Karol Vialikabrytanii Karł III zapuskaje svoj asabisty płejlist z muzykaj, jakaja, pavodle jaho słoŭ, padymaje jamu nastroj i źviazanaja z važnymi ŭspaminami.
Muzyčnyja pieravahi brytanskaha manarcha vielmi raznastajnyja — ad rehi da dyska. Siarod inšaha, u jahony płejlist uvajšli chity Boba Marli, Kajli Minoŭh i Hrejs Džons, piša Bi-bi-si.
Poŭny płejlist z padrabiaznymi kamientaryjami Karła III budzie pradstaŭleny publicy ŭ paniadziełak — u Dzień Sadružnaści nacyj.
Mienavita da hetaj daty prymierkavany prajekt «Muzyčny sałon karala» (King's Music Room), jaki pryśviečany muzyčnaj raznastajnaści krain Sadružnaści nacyj.
Płejlist adlustroŭvaje muzyčnyja intaresy Karła III na praciahu ŭsiaho jahonaha žyćcia — ad estradnych vykanaŭcaŭ 1930-ch hadoŭ da sučasnych zorak afrabitu.
U svaich kamientaryjach Karł III padzielicca historyjami pra lubimych artystaŭ, asabliva tych, kaho jon mieŭ mahčymaść pačuć užyvuju.
Siarod vykanaŭcaŭ u płejliście: rehi Boba Marli, tancavalnaja muzyka Kajli Minoŭh, sinhły amierykanskaha śpievaka nihieryjskaha pachodžańnia Davida, a taksama kampazicyi brytanskaha vykanaŭcy i aŭtara piesień Rej.
Cikavy fakt: Karol upieršyniu pačuŭ Reja na kancercie, jaki adbyŭsia na kaladnym kirmašy ŭ budynku byłoj łondanskaj elektrastancyi Batersi, dzie ciapier znachodzicca štab-kvatera Apple.
Karł III nazyvaje hety płejlist saŭndtrekam svajho žyćcia. Prajekt byŭ realizavany ŭ partniorstvie z Apple Music.
Dla jaho rekłamy Karł III sfatahrafavaŭsia ŭ Bukinhiemskim pałacy za stałom z tabličkaj «u efiry», što, na dumku aŭtaraŭ zdymka, nadaje jamu vobraz sapraŭdnaha dy-džeja.
U videaroliku, jaki vyjšaŭ napiaredadni prezientacyi płejlista, źmiena karaleŭskaj varty la karaleŭskaha pałaca prachodzić pad pieśniu Boba Marli Could You Be Loved.
Karł III daŭno cikavicca tvorčaściu Marli i navat naviedvaŭ były dom śpievaka na Jamajcy, jaki ciapier pieratvorany ŭ muziej.
«Ja chacieŭ asabliva padzialicca tymi pieśniami, jakija prynosili mnie radaść. Muzyka zaŭsiody šmat značyła dla mianie», — kaža Karł III ŭ videa, pryśviečanym zapusku prajekta.
«Jana maje zdolnaść vyklikać ščaślivyja ŭspaminy, jakija padymajucca z samych dalokich kutkoŭ pamiaci, suciašajuć nas u časy smutku i pieranosiać u roznyja miescy», — dadaje jon.
Adnak, na dumku karala, samaje hałoŭnaje pryznačeńnie muzyki — uzdymać nastroj, prynosić radaść i abjadnoŭvać ludziej u śviatkavańni žyćcia.
Tradycyjna karaleŭskaja siamja ŭ hety dzień źbirajecca na słužbu ŭ Viestminstarskim abactvie.
«Mnie padałosia, što [vypusk płejlista] moža stać cikavym i inavacyjnym sposabam adznačyć Dzień Sadružnaści sioleta», — padkreśliŭ Karł III.
Vialikaja hutarka z Franakam Viačorkam — pra kruhły stoł z Łukašenkam, pamyłki, chejtaraŭ i hałoŭnaje dasiahnieńnie26
Kamientary