Zabojstva Marka Ebiena adbyłosia 13 lutaha. Narkahandlar rodam ź Niderłandaŭ byŭ adnym z samych šukanych złačyncaŭ u śviecie.
Pavodle danych śledstva, jon šmat hadoŭ supracoŭničaŭ ź mieksikanskim kartelem Sinałoa — adnoj z samych žorstkich złačynnych arhanizacyj u śviecie, jakaja niasie adkaznaść za tysiačy zabojstvaŭ, piša Bild.
Paśla aryštu bosa Sinałoa Chaakina «El Čapa» Husmana ŭ 2017 hodzie ŭnutry kartela razharełasia baraćba za ŭładu. Ličycca, što Ebien staŭ na bok supiernika Husmana — Ismaela «El Majo» Zambady. Z taho času jamu davodziłasia ŭvieś čas aścierahacca napadu. Adnak za zabojstvam kakainavaha karala Ebiena, vierahodna, stajali jaho mierkavanyja siabry: jany daviedalisia, što mieksikanskaje padraździaleńnie pa baraćbie z narkotykami vysačyła niderłandca i źbirajecca jaho aryštavać.
I bandyty vyrašyli likvidavać taho, chto moh by vydać sakrety padčas dopytaŭ.
Zabojcy padpilnavali Marka Ebiena kala raskošnaj spartzały ŭ horadzie Atysapan-de-Sarahosa, niepadalok ad Miechika. Jaho zastrelili, kali jon stajaŭ litaralna ŭ kroku ad svajho braniravanaha Cadillac.
Pavodle zajavy mieksikanskich uładaŭ, apublikavanaj u haziecie Milenio, zabojcy apiaredzili vajskovuju palicyju ŭsiaho na 14 chvilin.
Na ciele Ebiena palicyja vyjaviła padroblenaje paśviedčańnie supracoŭnika amierykanskaha Upraŭleńnia pa baraćbie z narkotykami (DEA). Tam značyŭsia psieŭdanim «kakainavaha karala» — Chiesus Antonia Viełaskies Ryvas. Heta nie była jaho adzinaja falšyvaja asoba: u Rasii jon padarožničaŭ pad vyhladam dypłamata ES, u Brazilii — jak śpiecyjalny ahient Jeŭrapoła — taho samaha viedamstva, u čyj śpis samych šukanych jon trapiŭ za kantrabandu 400 kiłahramaŭ kakainu ŭ skrynačkach z-pad ananasaŭ.
Kamientary