«Nie dajcie šancu «ruskamu miru» praraści ŭ vas». Cichanoŭskaja źviarnułasia da biełarusaŭ z nahody hadaviny vajny va Ukrainie
Śviatłana Cichanoŭskaja vystupiła z nahody treciaj hadaviny pačatku poŭnamaštabnaj vajny Rasii suprać Ukrainy vystupiła z admysłovym zvarotam da biełarusaŭ.
«Abmiarkoŭvać vajnu niaprosta. Časam zdajecca, što skazać niešta novaje ŭžo niemahčyma. Z samaha dziacinstva nas vučać, što vajna — heta trahiedyja, i niama ničoha, što moža apraŭdać žorstkaje krovapralićcie, zrujnavanyja harady i biaskoncyja śmierci. U škołach i ŭniviersitetach nam raspaviadajuć pra kaštoŭnaść čałaviečaha žyćcia. Jak ža atrymałasia, što ŭžo try hady praciahvajecca poŭnamaštabnaja vajna va Ukrainie?
Rasija paźbiahaje słova «vajna». My nie pačujem ad pucinskaha režymu pra razbureńni i śmierci. Nie daviedajemsia pra bolš za 600 zabitych dziaciej i sotni ludziej, stałych i maładzionaŭ, jakija hinuć štodnia. Zamiest hetaha prapahanda raskazvaje pra «podźvihi» i «mužnaść». My znoŭ i znoŭ čujem bajki pra «abaronienaść» i «stabilnaść».
Ale davajcie pahladzim praŭdzie ŭ vočy. Raniej my dumali: «aby nie było vajny». Tym nie mienš, jana ŭžo idzie — i Rasija z kožnym dniom pamnažaje jaje žachi. My možam nie zaŭvažać bambardziroŭki žyłych damoŭ, ihnaravać hvałt u Bučy i Irpieni, paźbiahać navinaŭ, sprabavać žyć, jak zvyčajna, i abstrahavacca ad rečaisnaści. Ale ludzi nie pierastanuć pamirać.
Rasija ŭpiłasia karaniami ŭ našuju krainu i zrabiła saŭdzielnikami hetaj vajny. Ale biełarusy nie žadajuć takoha «paplečnika»: ni ŭ jakaści «starejšaha brata», ni ŭ jakaści kredytora, ni ŭ jakaści palityčnaha partniora.
My, biełarusy, — samadastatkovaja nacyja. My suprać vajny i imkniomsia vychoŭvać dziaciej, jakija šanujuć mir i volu, a nie adharodžvajucca ad inšych kalučym drotam.
Tamu ja źviartajusia da vas z zaklikam: nie dajcie šancu «ruskamu miru» praraści ŭ vas. Nie viercie nivodnamu słovu pra «nieabchodnyja straty» i «denacyfikacyju». Ciapier, kali na haryzoncie vidniejecca mahčymaść pieramovaŭ, my ŭsie spadziajomsia, što chutka va Ukrainie nastanie mir. Ale važna pamiatać, chto raźviazaŭ hetuju vajnu i na kim lažyć adkaznaść za sotni tysiač biessensoŭnych śmierciaŭ», — zajaviła Śviatłana Cichanoŭskaja.
Da treciaj hadaviny vajny va Ukrainie ŭ rasijskim internecie ŭpieršyniu źjaviŭsia antyvajenny rolik
Zialenski: Krokam da zaviaršeńnia vajny moža stać vyzvaleńnie ŭsich ukrainskich pałonnych
Udzielniki vajny z Ukrainaj, jakija viarnulisia z vajny, zabili ŭ Rasii jak minimum 240 čałaviek
U treciuju hadavinu vajny ŭ Kijeŭ pryjechała kiraŭnictva ES
Frydrych Mierc padtrymaŭ Zialenskaha
Kamientary