Makron: Zialenski byŭ demakratyčna abrany, u adroźnieńnie ad Pucina, jaki zabivaje svaich apanientaŭ i manipuluje vybarami

Prezident Francyi Emanuel Makron zajaviŭ, što ŭkrainski lidar Uładzimir Zialenski byŭ demakratyčna abrany, u adroźnieńnie ad Uładzimira Pucina, jaki «zabivaje svaich apanientaŭ i manipuluje vybarami». Takim čynam jon adreahavaŭ na słovy Donalda Trampa, jaki napiaredadni nazvaŭ Zialenskaha «dyktataram biez vybaraŭ», piša Bi-bi-si.

«Jon prezident, abrany ŭ svabodnaj sistemie. Hetaha nielha skazać pra Uładzimira Pucina, jaki ŭžo daŭno zabivaje svaich apanientaŭ i manipuluje vybarami», — adznačyŭ Makron, adkazvajučy na pytańni karystalnikaŭ internetu.

Makron taksama paviedamiŭ, što ŭ najbližejšy čas naviedaje Vašynhton, kab pasprabavać pierakanać Trampa, što intaresy ZŠA supadajuć ź intaresami jeŭrapiejskich sajuźnikaŭ. Pavodle jaho słoŭ, prajaŭleńnie słabaści pierad Pucinym moža ŭskładnić adnosiny z Kitajem i Iranam.

Makron zajaviŭ, što niavyznačanaść u dziejańniach Trampa adnosna trochhadovaha ŭvarvańnia Rasii va Ukrainu vyklikaje zaniepakojenaść, ale adnačasova stvaraje niapeŭnaść i dla Pucina, što možna vykarystać dla spryjańnia pieramovam.

Francuzski lidar adkazvaŭ na pytańni karystalnikaŭ sacyjalnych sietak u ramkach inicyjatyvy francuzskaha ŭrada pa pavyšeńni abaznanaści ludziej ab uździejańni vajny va Ukrainie, roli Francyi i źmienach u palitycy ZŠA paśla ŭstupleńnia Trampa na pasadu.

Miž tym pres-sakratarka Biełaha doma Keralin Levit u čaćvier paćvierdziła, što ŭ paniadziełak Tramp praviadzie sustreču z Makronam, a ŭ čaćvier sustreniecca z premjer-ministram Vialikabrytanii Kiram Starmieram.

Taksama Makron zajaviŭ, što nie prymaŭ rašeńnia ab nakiravańni vojskaŭ va Ukrainu «zaŭtra», a tolki ŭ vypadku spynieńnia ahniu.

«Ja nie prymaŭ rašeńnia nakiroŭvać vojski va Ukrainu ŭžo zaŭtra — nie. Toje, što my razhladajem, — heta adpraŭka sił dla harantavańnia miru, jak tolki budzie dasiahnuta adpaviednaje pahadnieńnie», — skazaŭ jon.

Ananimnaja krynica francuzskaha ahienctva AFP u čaćvier častkova paćvierdziła paviedamleńni brytanskaj presy ab tym, što Vialikabrytanija i Francyja rychtujuć płan pa raźmiaščeńni adnosna nievialikaha suchaputnaha kantynhientu ŭ tyle Ukrainy pry mahutnaj padtrymcy avijacyi.

«My havorym pra razhortvańnie, jakoje adbudziecca paśla spynieńnia ahniu, — skazaŭ surazmoŭca ahienctva. — Ideja zaklučajecca ŭ tym, kab raźmiaścić sałdat na druhoj linii, a nie na froncie nasuprać rasijskich vojskaŭ. Heta budzie spałučacca z šmatnacyjanalnaj apieracyjaj, u jakoj prymuć udzieł nie tolki jeŭrapiejskija kantynhienty, ale i siły ź inšych rehijonaŭ, jakija buduć znachodzicca na pieradavoj».

Pavodle krynicy, akramia Vialikabrytanii i Francyi, u hetaj apieracyi mohuć udzielničać vojski z Danii i krain Bałtyi.

• 13
• 0
• 0
• 0
• 0
• 0
• 0
• 1