«Chłuślivaja istota». U adkaz na słovy Trampa ŭkrainskaje hramadstva zhurtavałasia vakoł Zialenskaha
Ukrainskaje hramadstva prademanstravała redkaje adzinstva ŭ adkaz na sproby prezidenta ZŠA Donalda Trampa ŭmiašacca va ŭnutranuju palityku Ukrainy, piša aŭtar «Našaj Nivy» z Ukrainy Cimur Radčanka. Voś reakcyi palitykaŭ, sacsietak i hramadskich dziejačaŭ, a taksama miemy.
Ukrainskaje hramadstva pakazała redkaje adzinstva ŭ adkaz na sproby prezidenta ZŠA Donalda Trampa ŭmiašacca va ŭnutranuju palityku Ukrainy. Mnohija ŭkraincy čakali prychodu Trampa, stamiŭšysia ad vajny i imknučysia da jaje chutčejšaha zakančeńnia. Adnak paśla šerahu zajaŭ z boku Trampa i jahonaha asiarodździa simpatyja źmianiłasia na niepryjaznaść.
Pakazalna, što navat zaklatyja palityčnyja praciŭniki Zialenskaha stali na jaho abaronu.
Kansalidavanaje stanovišča palityčnych sił
Lidarka partyi «Baćkaŭščyna» Julija Cimašenka ŭ svaim dopisie ŭ Facebook vyrazna akreśliła pazicyju apazicyi:
«Ukraina — suvierennaja dziaržava! Uładzimir Zialenski — Prezident Ukrainy, lehitymny, pakul nie abrany inšy. Tolki ŭkraincy majuć prava vyrašać, kali i pry jakich umovach im źmianiać svaju ŭładu».
Jana taksama padkreśliła niemahčymaść praviadzieńnia vybaraŭ biez udziełu vajskoŭcaŭ, bo takija vybary nie buduć pryznanyja lehitymnymi.
Mer horada Dniapro Barys Fiłataŭ tradycyjna hruba adreahavaŭ na zajavy:
«Nam moža padabacca Zialenski, a moža i nie padabacca. My možam łajać jaho, a možam chvalić. My možam asudžać jaho ŭčynki, a možam im apładziravać. Bo jon — NAŠ Prezident. Taki, jaki jość. Niama roźnicy — drenny jon ci nie. I nijakaja chłuślivaja istota ani ŭ Maskvie, ani ŭ Vašynhtonie, ani dzie-niebudź, nie maje prava adkryvać na jaho svoj rot».
Deficyt rakiet
Uładzisłaŭ Faraponaŭ, kiraŭnik «Instytuta amierykanistyki», patłumačyŭ matyvy Trampa ŭ telemarafonie «Adzinyja naviny»:
«Ja dumaju, što historyja pra tak zvany rejtynh prezidenta Zialenskaha pastupova pačynaje śviedčyć pra toje, što chtości vielmi pa-majstersku i ŭzvažana pačynaje naviazvać Trampu rasijskuju dezynfarmacyju».
Pa jahonych słovach, krytyka Trampa pierš za ŭsio nakiravanaja na byłuju administracyju prezidenta Bajdena, a Zialenski trapiŭ «pad ruku» vypadkova.
Vajskovy ekśpiert, hałoŭny redaktar Defence Express Aleh Katkoŭ źviarnuŭ uvahu na praktyčnyja nastupstvy pazicyi Trampa. Jon adznačyŭ, što Ukraina ŭžo sutykajecca z deficytam rakiet dla sistem Patriot, bo z 22 studzienia kraina bolš nie atrymlivaje ad ZŠA novyja pakiety ŭzbrajeńnia.
Dyskusija adnosna finansavaj dapamohi
Asablivy rezanans nabyła sprečka adnosna abjomaŭ amierykanskaj dapamohi. Tramp zajaviŭ pra nadańnie Kijevu kala $350 miljardaŭ, patrabujučy spravazdačy ab ich vykarystańni. U adkaz prezident Ukrainy Zialenski padaŭ jasnyja ličby: ahulnaja vartaść vajny dla Ukrainy skłała $320 miljardaŭ, ź jakich $120 miljardaŭ — srodki ŭkrainskich padatkapłacielščykaŭ, a $200 miljardaŭ — dapamoha ZŠA i Jeŭrapiejskaha Sajuza ŭ vyhladzie zbroi.
«Ukraina — nie karparacyja»
Ekśpiertnaje asiarodździe aktyŭna adreahavała na zajavy Trampa. Dyrektar Instytuta suśvietnaj palityki Jaŭhien Mahda padkreśliŭ, što Tramp «hienieruje ličby z pavietra», ale hałoŭnaja prablema zaklučajecca ŭ składanaści niejtralizacyi jaho infarmacyjnaha ŭpłyvu.
Hałoŭnaja redaktarka «Ukrainskaj praŭdy» Sieŭhil Musajeva praviała paraleli z Vjetnamskaj vajnoj, paraŭnaŭšy dziejańni Trampa z historyjaj Lindana Džonsana i jahonaha ministra abarony Robierta Maknamary:
«Administracyja Trampa zaraz robić toje ž samaje: sproščvaje składanyja pracesy, ihnarujučy histaryčnyja ŭroki. Vajna — heta nie biznes, a Ukraina — nie karparacyja, jakuju možna pierakanać achviaravać terytoryjaj dziela «ździełki».
Ukrainskaje hramadstva adkazała mocnaj chvalaj tvorčaha supracivu. Ukrainski mastak i ilustratar Maksim Palenka stvaryŭ iraničnuju rabotu, dzie źmiaściŭ raśpiaćcie Isusa Chrysta i Donalda Trampa, jaki pierakonvaje, što Isus by nie pamior, kali b heta było pry kadencyi Trampa.
Tielehram-kanały nasyčanyja miemami.
Reakcyi telekamunikacyjnych kanałaŭ na naviny taksama pakazalnyja ŭ svajoj bolšaści.
«Chto ŭ nas dyktatar»
Vałancior i palityk Siarhiej Prytuła vykazaŭ pazicyju, jakaja rezanuje z dumkaj bolšaści ŭkraincaŭ: «Tolki my — narod Ukrainy — vyznačajem, chto ŭ nas dyktatar, a chto nie. Tolki my va Ukrainie vyznačajem, kali ŭ nas buduć vybary i jakija».
Aktyvist Ihar Łačenka padkreśliŭ:
«My možam krytykavać našaha prezidenta. Nie pahadžacca ź im. Ale dakładna nichto z-za miažy nie moža kazać nam, chto budzie kiravać dziaržavaj. My sami heta vyznačym, kali pryjdzie čas dla vybaraŭ. Zaraz ža lubyja vybary stanuć śmiarotnymi dla Ukrainy. Heta toje, čaho choča dasiahnuć Pucin. A ciapier užo i Tramp».
Zhodna z danymi Kijeŭskaha mižnarodnaha instytuta sacyjałohii, pa stanie na pieršuju pałovu lutaha 2025 hoda ŭzrovień davieru da prezidenta Ukrainy Zialenskaha składaje 57%, u toj čas jak nie daviarajuć jamu 37%. Bałans davieru-niedavieru zastajecca pazityŭnym na ŭzroŭni +20%. Takomu mohuć pazajzdrościć bolšaść kiraŭnikoŭ dziaržaŭ — u tym liku i Tramp.
Takaja kansalidavanaja reakcyja ŭkrainskaha hramadstva demanstruje stałaść palityčnaj nacyi, jakaja, niahledziačy na ŭnutranyja razychodžańni, zdolnaja abjadnacca pierad sprobaj zamiežnaha ŭmiašańnia ŭ suvierennyja spravy dziaržavy.
Niahledziačy na stomu ad vajny, ukraincy nastojliva supraćdziejničajuć kožnamu, chto šturchaje Ukrainu ŭ abdymki Pucina. Navat kali heta prezident ZŠA.
«Spadar prezident, nie Ukraina pačała hetuju vajnu». Zajavy Trampa ab Ukrainie i jaho kanflikt ź Zialenskim šakavali mnohich respublikancaŭ
Tramp nazvaŭ Zialenskaha «dyktataram biez vybaraŭ» i «siarednim pa paśpiachovaści komikam»
Džej Dzi Vens pahražaje Zialenskamu za kiepskija słovy pra Trampa
«Heta niemahčyma». Zialenski adkazaŭ Trampu na mahčymaść praviadzieńnia zaraz vybaraŭ
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ5
Kamientary