Stała viadoma, kudy ŭładkavaŭsia na pracu Uładzimir Čudziancoŭ

Były žurnalist Uładzimir Čudziancoŭ pravioŭ za kratami kala piaci hadoŭ. Jaho aryštavali jašče ŭ 2019-m, kali mužčyna jechaŭ ciahnikom u Polšču. Tady Čudziancova abvinavacili ŭ zachoŭvańni narkotykaŭ, sprobie pieravozu ich praź miažu, a taksama ŭ raspaŭsiudzie porna zaviedama niepaŭnaletniamu. Niekatoryja ličyli jaho zatrymańnie palityčna matyvavanym. Čudziancovu dali 5,5 hoda kałonii i adpravili adbyvać pakarańnie ŭ mahiloŭskuju kałoniju.

Čudziancoŭ — čałaviek pakručastaha losu. U 1990-ja jon byŭ łukašenkaŭskim prapahandystam (tady jon nasiŭ proźvišča Zujeŭ) i pryznavaŭsia, što atrymlivaje materyjały dla publikacyi ad KDB.

U 2000-ja prapaŭ z žurnalistyki — tady jon uładkavaŭsia kačaharam u kacielniu ŭ adnu sa škoł-internataŭ dla dziaciej z asablivaściami raźvićcia. Śledčy kamitet pravodziŭ pravierku pa hetym fakcie, a taksama vyśviatlaŭ, navošta Čudziancoŭ šukaŭ niepaŭnaletnich na sajtach znajomstvaŭ.

U pačatku 2010-ch Čudziancoŭ viarnuŭsia ŭ žurnalistyku pad svaim novym proźviščam, staŭ reparcioram Tut.by. Zajaŭlaŭ, što palitviaźni sami vinavatyja ŭ svaim źniavoleńni. Paśla skandału byŭ zvolnieny.

Stvaryŭ sajt klikbejtnych navinaŭ, tady ž zaniaŭ rezkuju antyrasijskuju pazicyju. Paśla spryčyniŭsia da stvareńnia prajekta Nexta, jaki zdabyŭ papularnaść pieradusim za košt źlivaŭ ź milicejskaj sistemy.

Ananimnyja kalamilicejskija telehram-kanały zajaŭlali ŭ 2020-m, što Čudziancoŭ pracavaŭ pad prykryćciom KDB, tamu, maŭlaŭ, milicyja nie mahła pryciahnuć jaho da kryminalnaj adkaznaści pa spravach, źviazanych z seksualnaj niedatykalnaściu niepaŭnaletnich.

Urešcie Čudziancoŭ usio ž apynuŭsia za kratami. Niekalki palitviaźniaŭ, jakija byli jaho susiedziami, raskazvali, što jon aktyŭna supracoŭničaŭ z administracyjaj i byŭ u adnosna pryvilejavanym stanoviščy.

«Administracyja jaho lubiła, heta pieršy čałaviek z ekstremisckim prafiłaktyčnym ulikam, jaki źniaŭ status złosnaha parušalnika, usio ŭ jaho tam fajna», — kazaŭ palitviazień Viktar Pancialejeŭ. Tym nie mienš Čudziancoŭ adbyŭ pryznačanaje pakarańnie całkam.

U źniavoleńni Čudziancoŭ abiacaŭ «vyrašyć pytańnie z Nexta». Što pad hetym miełasia na ŭvazie, nieviadoma.

Na svabodzie Uładzimir Čudziancoŭ apynuŭsia ŭ kastryčniku 2024 hoda. Tady ž Raman Pratasievič, jaki raniej byŭ adnym z redaktaraŭ Nexta, paabiacaŭ apublikavać vialikaje intervju z «realnym stvaralnikam prajekta Nexta». Namiok na Čudziancova byŭ vidavočny. Tym bolš mienavita Pratasievič, jakomu Čudziancoŭ dapamahaŭ rabić pieršyja kroki ŭ žurnalistycy i navat klikaŭ žyć da siabie, padzialiŭsia śviežym fota byłoha žurnalista paśla jaho vyzvaleńnia.

Ale ž u vyniku nijakaj siensacyi nie atrymałasia. Ci to Pratasievič zabyŭsia apublikavać źniaty materyjał, ci to vielmi byŭ zaniaty na asnoŭnaj pracy zvarščykam.

Čudziancoŭ taksama zaniaŭsia prostaj pracaj. Jak stała viadoma «NN», jon uładkavaŭsia harderobščykam u 20-ju haradskuju palikliniku Minska.

• 0
• 0
• 16
• 12
• 1
• 2
• 0
• 0