Umovy prapanavanaj ekanamičnaj damovy pamiž ZŠA i Ukrainaj vyhladajuć kabalnymi

Kali vieryć hetamu dakumientu, to patrabavańni Donalda Trampa adnosna «kampiensacyi» ad Ukrainy ŭ pamiery 500 młrd dalaraŭ vychodziać daloka za miežy kantrolu ZŠA nad žyćciova važnymi dla krainy karysnymi vykapniami. Damova achoplivaje ŭsio — ad partoŭ i infrastruktury da nafty i hazu, a taksama bolš šyrokaj resursnaj bazy krainy.

ZŠA, pavodle hetaj damovy, nibyta buduć atrymlivać 50% ciapierašnich dachodaŭ Ukrainy ad zdabyčy resursaŭ i 50% finansavaj vartaści «ŭsich novych licenzij, vydadzienych trecim asobam» dla budučaj manietyzacyi resursaŭ. 

«Hety punkt aznačaje «spačatku zapłacicie nam, a potym karmicie svaich dziaciej», — skazała krynica, blizkaja da pieramoŭ.

Prezident Ukrainy Uładzimir Zialenski sam prapanavaŭ ideju dać ZŠA pramuju dolu ŭ zdabyčy ŭkrainskich redkaziamielnych karysnych vykapniaŭ padčas vizitu ŭ ZŠA ŭ vieraśni minułaha hoda, spadziejučysia palehčyć šlach dla praciahvańnia pastavak zbroi.

«Kali my havorym pra ździełku, to davajcie zaklučać ździełku, my tolki «za», — skazaŭ jon.

Adnak naŭrad ci jon čakaŭ, što jamu vystaviać umovy, jakija zvyčajna staviać krainam-ahresaram, što paciarpieli parazu ŭ vajnie. 

Kali hety prajekt budzie pryniaty, piša The Telegraph, to patrabavańni Trampa zakranuć častku ŭkrainskaha VUP bolšuju, čym reparacyi, nakładzienyja kaliści na Hiermaniju pavodle ŭmoŭ Viersalskaj damovy. U toj ža čas Tramp, jak vyhladaje, hatovy całkam vyzvalić ad adkaznaści Rasiju.

Ukraina prosta nie moža vykanać patrabavańnie Trampa ab 500 miljardach dołaraŭ u razumny termin, nie kažučy ŭžo pra bolš važnaje pytańnie: ci spraviadliva tak abychodzicca z krainaj-achviaraj paśla taho, jak jana try hady ŭtrymlivała front zmahańnia za demakratyju, achviarujučy vielizarnymi resursami. 

«Moj styl zaklučeńnia ździełak davoli prosty i zrazumieły. Ja celusia vielmi vysoka, a potym prosta praciahvaju nastojvać, nastojvać i nastojvać, kab atrymać toje, što chaču», — piša Tramp u svajoj knizie «Mastactva zaklučeńnia ździełak».

Adnak ža ŭ sapraŭdnym biznesie druhi bok zvyčajna moža adyści ŭbok, kali ŭmovy jaho nie zadavalniajuć. Patrabavańnie ž Trampa — heta prymus žaleznymi kułakami słabiejšaj nacyi, zahnanaj u kut, adznačaje The Telegraph.

U vyniku Zialenskamu davodzicca faktyčna vybirać pamiž vajennym uvarvańniem Pucina i ekanamičnym uvarvańniem z boku ŭłasnaha sajuźnika.

Niezdarma na Miunchienskim forumie ŭkrainskim čynoŭnikam daviałosia aściarožna ruchacca pa minnym poli, sprabujučy vietliva ŭśmichacca i vykazvajučy nadzieju na padpisańnie pahadnieńnia ab zdabyčy karysnych vykapniaŭ, ale adnačasova śćviardžajučy, što ciapierašni tekst parušaje ŭkrainskaje zakanadaŭstva i patrabuje dapracoŭki. 

• 5
• 2
• 2
• 7
• 2
• 7
• 20
• 0