Умовы прапанаванай эканамічнай дамовы паміж ЗША і Украінай выглядаюць кабальнымі
Брытанскае выданне The Telegraph сцвярджае, што атрымала праект папярэдняй дамовы ЗША з Украінай, датаваны 7 лютага 2025 года. Умовы гэтага кантракту, які тыдзень таму нібыта трапіў у Офіс Уладзіміра Зяленскага, азначаюць эканамічную каланізацыю Украіны з боку ЗША, юрыдычна замацаваную на нявызначаны тэрмін.
Калі верыць гэтаму дакументу, то патрабаванні Дональда Трампа адносна «кампенсацыі» ад Украіны ў памеры 500 млрд даляраў выходзяць далёка за межы кантролю ЗША над жыццёва важнымі для краіны карыснымі выкапнямі. Дамова ахоплівае ўсё — ад партоў і інфраструктуры да нафты і газу, а таксама больш шырокай рэсурснай базы краіны.
ЗША, паводле гэтай дамовы, нібыта будуць атрымліваць 50% цяперашніх даходаў Украіны ад здабычы рэсурсаў і 50% фінансавай вартасці «ўсіх новых ліцэнзій, выдадзеных трэцім асобам» для будучай манетызацыі рэсурсаў.
«Гэты пункт азначае «спачатку заплаціце нам, а потым карміце сваіх дзяцей», — сказала крыніца, блізкая да перамоў.
Прэзідэнт Украіны Уладзімір Зяленскі сам прапанаваў ідэю даць ЗША прамую долю ў здабычы ўкраінскіх рэдказямельных карысных выкапняў падчас візіту ў ЗША ў верасні мінулага года, спадзеючыся палегчыць шлях для працягвання паставак зброі.
«Калі мы гаворым пра здзелку, то давайце заключаць здзелку, мы толькі «за», — сказаў ён.
Аднак наўрад ці ён чакаў, што яму выставяць умовы, якія звычайна ставяць краінам-агрэсарам, што пацярпелі паразу ў вайне.
Калі гэты праект будзе прыняты, піша The Telegraph, то патрабаванні Трампа закрануць частку ўкраінскага ВУП большую, чым рэпарацыі, накладзеныя калісьці на Германію паводле ўмоў Версальскай дамовы. У той жа час Трамп, як выглядае, гатовы цалкам вызваліць ад адказнасці Расію.
Украіна проста не можа выканаць патрабаванне Трампа аб 500 мільярдах долараў у разумны тэрмін, не кажучы ўжо пра больш важнае пытанне: ці справядліва так абыходзіцца з краінай-ахвярай пасля таго, як яна тры гады ўтрымлівала фронт змагання за дэмакратыю, ахвяруючы велізарнымі рэсурсамі.
«Мой стыль заключэння здзелак даволі просты і зразумелы. Я цэлюся вельмі высока, а потым проста працягваю настойваць, настойваць і настойваць, каб атрымаць тое, што хачу», — піша Трамп у сваёй кнізе «Мастацтва заключэння здзелак».
Аднак жа ў сапраўдным бізнэсе другі бок звычайна можа адысці ўбок, калі ўмовы яго не задавальняюць. Патрабаванне ж Трампа — гэта прымус жалезнымі кулакамі слабейшай нацыі, загнанай у кут, адзначае The Telegraph.
У выніку Зяленскаму даводзіцца фактычна выбіраць паміж ваенным уварваннем Пуціна і эканамічным уварваннем з боку ўласнага саюзніка.
Нездарма на Мюнхенскім форуме ўкраінскім чыноўнікам давялося асцярожна рухацца па мінным полі, спрабуючы ветліва ўсміхацца і выказваючы надзею на падпісанне пагаднення аб здабычы карысных выкапняў, але адначасова сцвярджаючы, што цяперашні тэкст парушае ўкраінскае заканадаўства і патрабуе дапрацоўкі.
Як Украіну шантажавалі ў Мюнхене і чаму сарвалася здзелка з ЗША
ЗША могуць вывесці сваіх вайскоўцаў з краін Балтыі на фоне перамоў з Расіяй — Financial Times
ЗША правядуць двухбаковыя перамовы з Расіяй і Украінай, а ўжо потым — сумесныя
Пяць высноў з Мюнхенскай канферэнцыі па бяспецы, якая ўвойдзе ў гісторыю
Каментары