Amierykancy zabrali ź biełaruskaj turmy žurnalista Andreja Kuźniečyka i jašče dvuch palitźniavolenych
Pra vyzvaleńnie palitźniavolenych paviedamiła Śviatłana Cichanoŭskaja.
Razam z Andrejem Kuźniečykam, supracoŭnikam «Radyjo Svabody», vyjšli na svabodu aktyvistka Alena Maŭšuk i hramadzianin ZŠA, imia jakoha nie raskryvajecca.
«Ja vielmi ŭdziačnaja Prezidentu Trampu, dziaržsakrataru Rubia i dziarždepartamientu ZŠA za supolnyja namahańni, jakija zrabili heta mahčymym», — adznačyła Cichanoŭskaja.
Usie troje ŭžo znachodziacca ŭ Litvie.
U telehram-kanale Cichanoŭskaj apublikavali videa z Alenaj Maŭšuk.
Andrej Kuźniečyk — žurnalist-fryłansier «Radyjo Svabody». Jaho zatrymali ŭ listapadzie 2021 hoda. 8 červienia 2022 Mahiloŭski abłasny sud pryhavaryŭ žurnalista da 6 hadoŭ kałonii.
U studzieni 2025 hoda dziaržaŭny kanał ANT vypuściŭ intervju sa źniavolenym žurnalistam.
Prezident i hienieralny dyrektar «Radyjo Svabodnaja Eŭropa/Radyjo Svaboda» Styvien Kapus prakamientavaŭ navinu pra vyzvaleńnie Andreja Kuźniečyka:
«Heta radasny dzień dla Andreja, jahonaj žonki i ich dvaich małych dziaciej. Paśla bolš čym troch hadoŭ rasstańnia hetaja siamja znoŭ razam dziakujučy prezidentu Trampu. My taksama ŭdziačnyja dziaržsakrataru Rubia i jahonaj kamandzie, i litoŭskamu ŭradu za ich padtrymku. My zachoŭvajem nadzieju, što naš žurnalist Ihar Łosik taksama budzie vyzvaleny, i spadziajemsia na dalejšaje lidarstva i kiraŭnictva administracyi Trampa».
Alenu Maŭšuk zatrymali 10 žniŭnia 2020 hoda ŭ Pinsku. U krasaviku 2021 hoda joj prysudzili 6 hod kałonii pa spravie ab masavych biesparadkach.
Ciapier čytajuć
«Byŭ upeŭnieny, što ja niedatykalnaja asoba dla rasijan». Pieršaje intervju Jurasia Ziankoviča na svabodzie18
Kamientary