Amierykaniec, jaki šturmavaŭ Kapitolij i jakoha pamiłavaŭ Tramp, adkryŭ u Breście restaran
Uładalnik zakusačnaj nazyvaje siabie Evanam Džefiersanam, choć nasamreč jaho kličuć Evan Ńjuman, a jašče niadaŭna jon byŭ u vyšuku FBR, piša BGmedia.
U Breście adkryłasia «pieršaja amierykanskaja zakusačnaja» pad nazvaj «Route 66». Vałodaje joj amierykaniec Evan Ńjuman. Niekatoryja žychary horada znajomyja ź im asabista, bo jon vykładaje anhlijskuju movu ŭ škole My Baby. Mužčyna ŭdzielničaŭ u šturmie Kapitolija ŭ studzieni 2021 hoda, byŭ abjaŭleny ŭ vyšuk FBR, uciok z ZŠA i atrymaŭ palityčny prytułak u Biełarusi.
Ustanova nazyvajecca «Route 66» i znachodzicca na praśpiekcie Mašerava.
«Skažu pa sakrecie, hatuje sam haspadar-amierykaniec u kaŭbojskim kapielušy. Tamu budzie vielmi horača i smačna», — kaža ŭ ahladzie na «pieršuju amierykanskuju zakusačnuju» praŭładny fud-błohier Uładzisłaŭ Alšeŭski.
U mieniu zakusačnaj — kłasičnaja amierykanskaja kuchnia: burhiery, sendvičy, stejki, harniry, supy, sałaty i desierty. Pa słovach błohiera, ceny «demakratyčnyja».
Alšeŭski zapisaŭ karotkaje intervju z uładalnikam zakusačnaj Evanam Ńjumanam. Toj raspavioŭ, što rodam z Kalifornii, a ciapier žyvie ŭ Breście i vykładaje anhlijskuju movu ŭ My Baby.
Padobna, amierykaniec źmianiŭ pracu, bo ŭ traŭni 2023 hoda vydańnie «Novy Čas» pisała, što Evan Ńjuman pracuje ŭ pryvatnaj škole zamiežnych moŭ International Language House i pa vychodnych vykładaje anhlijskuju padletkam.
Darečy, na staroncy ŭstanovy «Route 66» u Instagram Evan Ńjuman nazvaŭ siabie Evanam Džefiersanam. Krynica «Novaha Času» kazała, što ŭ Breście Evan Ńjuman taksama pradstaŭlajecca pry znajomstvie jak Styvien.
Chto taki Evan Ńjuman i čamu ŭciok z ZŠA
Evan Ńjuman trapiŭ u Biełaruś praz Ukrainu ŭ vieraśni 2021 hoda. Da niadaŭniaha času ŭ ZŠA jaho šukali jak aktyŭnaha ŭdzielnika šturmu Kapitolija, jaki ŭ studzieni taho ž hoda zrabili prychilniki Donalda Trampa.
Amierykancu vystavili abvinavačańnie ŭ 14 złačynstvach, u tym liku «napad, supraciŭ abo pieraškoda aficeram». Pavodle abvinavačańnia, Ńjuman na praciahu dnia napaŭ na čatyroch palicyjantaŭ, užyŭšy kułaki, a taksama schapiŭ mietaličnuju aharodžu i prataraniŭ joju šerah palicyjantaŭ.
Evan Ńjuman znachodziŭsia ŭ vyšuku FBR da 22 studzienia 2025 hoda. Na sajcie FBR paznačana, što jon biŭsia z palicyjaj Kapitolija ZŠA i supracoŭnikami haradskoha ŭpraŭleńnia palicyi Vašynhtona, «jaho treba ličyć uzbrojenym i niebiaśpiečnym».
22 sakavika 2022 hoda stała viadoma, što Evan Ńjuman atrymaŭ palityčny prytułak u Biełarusi. Dakumient sa statusam biežanca jamu ŭručyli va Upraŭleńni pa hramadzianstvie i mihracyi UUS Bresckaha abłvykankama.
U dzień inaŭhuracyi novy prezident ZŠA Donald Tramp svaim ukazam pamiłavaŭ udzielnikaŭ šturmu Kapitolija. Ciapier Evan Ńjuman maje mahčymaść viarnucca na radzimu da svaich rodnych.
Ciapier čytajuć
Stała viadoma, što za 200 tysiač jeŭra prapanoŭvali Siarhieju Cichanoŭskamu «biełaruskija biznesmieny»27
Kamientary