Milicyja raskazała, što rabić pry šantažy intymnymi fota ŭ Siecivie

Prablema, na žal, nie hublaje svajoj aktualnaści. Tolki ŭ Maskoŭskaje RUUS z pačatku hoda źviarnulisia troje čałaviek, jakich šantažavali publikacyjaj ich intymnych fota ŭ internecie.

— Adzin z paciarpiełych, 22-hadovy chłopiec, paznajomiŭsia na sajcie ź dziaŭčynaj, — apisvaje schiemu machlarstva Ja. Kazłoŭ. — Na praciahu tydnia maładyja ludzi pierapisvalisia i abmieńvalisia fatahrafijami. Kali spačatku heta byli zvyčajnyja sełfi, to paźniej dziaŭčyna prapanavała pierajści na «novy ŭzrovień» znosin i dasłać joj fota ŭ styli «niu». Chłopiec pahadziŭsia.

A praz tydzień sutyknuŭsia z prablemami: «kachanaja» pierapyniła znosiny i pačała pahražać jamu raspaŭsiudžvańniem atrymanych materyjałaŭ u internecie. Jana vystaviła patrabavańnie: 300 rubloŭ. Małady čałaviek admoviŭsia pieravodzić joj hrošy i źviarnuŭsia ŭ milicyju.

Jašče adnoj achviaraj stała 20-hadovaja dziaŭčyna. Bajučysia, što jaje fatahrafii patrapiać u sieciva, jana ledź nie pieraviała machlaru patrabavanuju sumu. Adnak svoječasova spyniłasia: zrazumieła, što paśla hetaha jon usio roŭna nie spynicca i praciahnie vymahać hrošy.

— Dziaŭčyna taksama źviarnułasia ŭ milicyju. Jana raspaviała, što paznajomiłasia z šantažystam niekalki hadoŭ tamu ŭ internecie. Na praciahu paŭhoda jany aktyŭna pierapisvalisia ŭ mesiendžary. Minčanka nikoli nie bačyła svajho surazmoŭcu na svaje vočy, ale za hety čas mocna da jaho pryviazałasia. Padčas doŭhich znosin maładyja ludzi abmieńvalisia nie tolki asabistymi pieražyvańniami, ale i intymnymi fotazdymkami.

Praź niekatory čas cikavaść maładoha čałavieka da dziaŭčyny pačała zhasać, i pierapiska syšła na ništo, — raspaviadaje milicyjanier.

Minčanka vydaliła ŭsie paviedamleńni ŭ mesiendžary, spadziejučysia, što takim čynam źniščyć i fota, jakija adpraŭlała.

Raźvitaŭšysia z kachańniem u internecie, na praciahu hoda jana žyła spakojna. Da taho momantu, pakul nie atrymała paviedamleńnie ź nieviadomaha numara z patrabavańniem pieravieści 500 rubloŭ.

U vypadku admovy joj paabiacali raspaŭsiudzić intymnyja fatahrafii, jakija jana raniej adpraŭlała virtualnamu kachanamu.

Ja. Kazłoŭ adznačaje: sprabavać vyrašyć prablemu samastojna i zhadžacca na pieravod hrošaj u takich situacyjach nie varta. Pavodle jaho słoŭ, heta moža tolki pahoršyć situacyju — jak praviła, paśla pieršaha płaciažu apietyty złačyncaŭ imkliva rastuć.

— Kali vy akazalisia ŭ takoj situacyi, nieadkładna źviartajciesia ŭ milicyju. Abaviazkova zrabicie skrynšoty ŭsich paviedamleńniaŭ z vymahańniem (heta ŭ dalejšym dapamoža pravaachoŭnikam). Nie ŭstupajcie ŭ doŭhuju pierapisku z machlarom, lepš uvohule ihnarujcie jaho, — raić pravaachoŭnik.

— Taksama rekamiendujecca napisać abo patelefanavać u techpadtrymku sacyjalnaj sietki, u jakoj adbyvałasia pierapiska. Administratary zabłakujuć ci vydalać vašu staronku abo akaŭnt šantažysta.

Pavodle Ja. Kazłova, upeŭnienaść machlaroŭ abhruntavana ich pierakananaściu, što achviara praz soram nie źvierniecca ŭ milicyju. Adnak zaručycca padtrymkaj milicyi — adzinaje pravilnaje rašeńnie dla biaśpiečnaha vyrašeńnia situacyi.

• 2
• 0
• 0
• 0
• 0
• 0
• 0
• 0