Ukraina naniesła rekordnuju kolkaść udaraŭ bieśpiłotnikami pa rasijskich NPZ

Za pieršy miesiac 2025 hoda BPŁA atakavali zavody siem razoŭ — bolš, čym u lubym miesiacy minułaha hoda.

Spynieńnie niekalkich NPZ moža spravakavać deficyt paliva na rasijskich zapraŭkach, adnak pakul situacyja vyhladaje kirujemaj rasijskimi ŭładami, miarkujuć ekśpierty, piša «Ahientstvo».

U studzieni drony atakavali naftapierapracoŭčyja zavody ŭ Vałhahradskaj, Nižaharodskaj (dva NPZ), Razanskaj, Sarataŭskaj abłaściach, a taksama ŭ Tatarstanie.

U śniežni BPŁA atakavali NPZ tolki adzin raz, u listapadzie — dva razy. U kastryčniku i žniŭni atak nie było, u vieraśni i červieni paviedamlałasia tolki pra adnu ataku za miesiac. Blizkaja da studzienia kolkaść atak była letaś tolki ŭ sakaviku i mai (pa šeść u kožnym miesiacy).

Pry analizie ŭličvalisia tolki vypadki, kali paviedamlałasia pra paškodžańni na terytoryi NPZ.

Jak minimum adzin atakovany zavod — Razanski NPZ — spyniŭ pierapracoŭku nafty paśla ataki. Pavodle acenak ekśpiertaŭ, paśla spynieńnia pracy hetaha zavoda abjomy pierapracoŭki nafty ŭ Rasii mohuć źnizicca da 5,2-5,3 młn barelaŭ u hod, što charakterna dla pieryjadaŭ viesnavych i asieńnich prafiłaktyčnych rabot.

Były top-menedžar «Hazpram nafty», a ciapier navukovy supracoŭnik Centra Karniehi miarkuje, što rasijskaja ekanomika i naftavaja pramysłovaść mohuć adnosna lohka vytrymać spynieńnie pracy niekalkich NPZ na niekalki tydniaŭ. Deficyt paliva praz spynieńnie Razanskaha NPZ mohuć kampiensavać zavody, raźmieščanyja ŭ Maskvie, Jarasłaŭli i Kstavie Nižaharodskaj vobłaści.

Ataki na NPZ stali častkaj bolš maštabnaj kampanii Ukrainy pa naniasieńni ŭdaraŭ pa rasijskaj naftavaj infrastruktury. Akramia zavodaŭ, atakam taksama padviarhajucca naftabazy i stancyi trubapravodaŭ.

Rezkaje ŭzmacnieńnie ŭdaraŭ pa rasijskim naftavym kompleksie moža być źviazana sa źmienami na suśvietnych rynkach. U sakaviku minułaha hoda ZŠA prasili Ukrainu spynić ataki na rasijskuju enierhietyku, pakolki aścierahalisia rostu suśvietnych cen na naftu.

Adnak ciapier, pavodle prahnozaŭ Mižnarodnaha enierhietyčnaha ahienctva, u hetym hodzie rynak moža sutyknucca ź liškam u 1 młn barelaŭ u dzień. Na hetym fonie ŭ pačatku studzienia ZŠA ŭžo ŭviali suprać rasijskaj naftahazavaj haliny najžorstkija sankcyi: pad abmiežavańni trapiła značnaja častka «cieniavoha fłotu» Rasii, «Hazpram nafta» i «Surhutnaftahaz».

• 15
• 0
• 1
• 0
• 0
• 0
• 0
• 1