Łatuška: Ryžankoŭ maryć stać prezidentam Biełarusi i nienavidzić Łukašenku. Jon nie projdzie detektar chłuśni
U novym vypusku TOKu były pasoł i ministr kultury Biełarusi, a ciapier adzin ź lidaraŭ apazicyi Pavieł Łatuška daŭ svaju acenku ministra zamiežnych spraŭ Biełarusi Maksima Ryžankova.
«Maja pieršaja žonka źjaŭlajecca jaho žonkaj. I za heta jon mnie pomściŭ. Nu dziŭnaja reč. Moža, ty ščaście atrymaŭ? Kali ščaście, to našto pomścić?» — zaŭvažyŭ Łatuška nakont Maksima Ryžankova.
Pa słovach palityka, siońniašni ministr zamiežnych spraŭ — vielmi ambicyjny čałaviek:
«Heta toj čałaviek, jaki maryć pra toje, kab stać prezidentam Biełarusi. Hetaja mara ŭ jaho isnavała, i dumaju, što jana isnuje da hetaha momantu. Heta nie aznačaje, što siońnia heta toj čałaviek, jaki moža arhanizavać zmovu z metaj adchileńnia Łukašenki ad ułady. Ale toje, što ŭ jaho hetyja dumki jość, pierakanany. Jon budzie rychtavacca da hetaj situacyi.
Pa-druhoje, Ryžankoŭ nienavidzić Łukašenku. Jaho nianaviść abhruntavanaja trahiedyjaj, jakaja, na žal, napatkała jaho siamju. Jana źviazana ź jaho baćkam. Jon ličyć Łukašenku vinavatym u śmierci baćki — tady toj zajmaŭ pasadu ministra sportu»,
— raskazaŭ Łatuška i zaŭvažyŭ: «Moža, kaliści pryjdzie čas, i Ryžankoŭ sam pra heta raskaža, kali budzie mieć śmiełaść».
Łatuška vykazaŭ upeŭnienaść, što Ryžankoŭ nie zmoža siońnia prajści detektar chłuśni:
«Jon nie projdzie jaho. Jon nie prychilnik Łukašenki. Ja ŭ hetym pierakanany. Tak što ŭ Łukašenki jość šaniec — niachaj pravieryć, ci jaho ministr zamiežnych spraŭ tak addany jamu».
Viadučaja Nasta Roŭda nahadała adnu z krasamoŭnych i haniebnych historyj, źviazanych z baćkam Maksima Ryžankova. Padčas «Minskaj łyžni» pry publicy jon, tady ministr sportu, musiŭ prysieści i dapamahčy Łukašenku źniać łyžy.
Na pytańnie, ci zaraz Ryžankoŭ-małodšy ŭ takim ža stanoviščy, Łatuška adkazaŭ:
«Ja dumaju, što jon paŭtaraje hetuju historyju svajho baćki. Usie tyja, chto nabližany da Łukašenki, musiać prachodzić praz heta kožny dzień albo čas ad času, asabliva siońnia. I Ryžankoŭ taksama ŭ hetaj situacyi».
«Jon razumny čałaviek. Jon adukavany čałaviek. Jon vielmi načytany čałaviek. Jon vielmi dobra viedaje historyju. Jon pracavaŭ dypłamatam u Izraili. Jon raźbirajecca ŭ situacyi vakoł Izraila, u hetym kanflikcie. Jon padrychtavany da taho, kab być ministram zamiežnych spraŭ.
Ale prablema ŭ tym, što rysy jaho charaktaru — psichałahičnaja niaŭstojlivaść, praźmiernaja emacyjanalnaść, vysokija ambicyi, toje, što jon vielmi havarki — heta ŭsio, što minusuje jamu na pasadzie ministra zamiežnych spraŭ Biełarusi».
Ciapier čytajuć
Na pieradśmiarotnym videa z kałonii nasamreč byŭ nie Vitold Ašurak. Źjavilisia novyja padrabiaznaści śmierci palitviaźnia28
Kamientary