Na telekanale ANT pakazvajuć cykł prymusovych intervju palitźniavolenych eks-supracoŭnikaŭ «Radyjo Svaboda» — Andreja Kuźniečyka, Ihara Łosika i Ihara Karnieja, — a taksama biełaruska-amierykanskaha advakata Juryja Ziankoviča. Adzin z byłych palitźniavolenych paznaŭ miesca, u jakim ich zdymali, i raskazaŭ pra heta «Našaj Nivie».
Dziaržaŭnyja telekanały i raniej pakazvali padobnyja intervju z palitviaźniami — ale zvyčajna prapahandysty pryjazdžali da ich u kałonii. Tak, u Škłovie zdymali Dźmitryja Łukšu, u Homieli — Palinu Šarendu-Panasiuk i Darju Łosik.
Ciapier ža Andreja Kuźniečyka i Ihara Łosika pryvieźli dla zdymkaŭ u SIZA KDB. Raniej ich utrymlivali ŭ kałonii ŭ Navapołacku.
Na videa bačna, jak Andreja Kuźniečyka viaduć praź pierachod pa vulicy pamiž śledčymi kabinietami i kamierami, taksama ŭ kadry źjaŭlajecca draŭlanaja padłoha — a na Vaładarcy, naprykład, pieravažna lažała plitka.
«Paśla iduć kadry, dzie, nibyta, jany (Kuźniečyk i prapahandyst ANT — NN) razmaŭlajuć va ŭnutranym dvoryku dla prahułak, ale tut stopracentna skazać nie mahu, bo nie razumieju, adkul tam kletka za prapahandystam, — raskazvaje były palitviazień, jaki prajšoŭ u SIZA KDB, i Vaładarku, i inšyja śledčyja izalatary. —
Na apošnich kadrach, dzie Andreja Kuźniečyka vyvodziać, taksama vielmi padobna da SIZA KDB. Tak vadzili ŭ śledčyja kabiniety», — raskazvaje jon.
Źviartaje ŭvahu na siabie i vychad ź SIZA na vulicu. Spačatku treba spuścicca pa vintavoj leśvicy, a paśla praz bakavy kalidor vyvodziać u dvoryk.
«Tolki ŭ maich uspaminach jana bolš krutaja, unizie tam na videa bačnyja zialonyja ścieny. Jany takimi i pry mnie byli.
Jašče z maich nazirańniaŭ: na Vaładarcy achoŭniki chadzili ŭ inšaj formie, a hetaja padobnaja na tuju, jakuju šyjuć mienavita dla KDB», — kaža eks-palitviazień.
«Aproč taho, na Vaładarcy raźbity asfalt na vulicy, a na videa jon narmalny, tamu dakładna KDB», — padsumoŭvaje jon.
Kamientary