Štat biełaruskich kampanij u Litvie źmienšyŭsia na 10% za hod. Chutčej za ŭsio skaračajucca šerahi ŭ EPAM
Viadomyja IT-kampanii ź biełaruskimi karaniami za minuły hod skaracili kolkaść supracoŭnikaŭ u litoŭskich ofisach bolš čym na 10%. Pra heta śviedčać danyja rejestra jurydyčnych asob rekvizitai.vz.lt, piša Devby.io.
Jašče na pačatak 2024 hoda ŭ 20+ viadomych IT-kampanijach ź biełaruskimi karaniami ŭ Litvie pracavała amal 3,9 tysiačy supracoŭnikaŭ. Na siońniašni dzień u litoŭskich ofisach zarehistravana tolki 3,4 tysiačy śpiecyjalistaŭ.
Najbolšy adtok supracoŭnikaŭ adbyŭsia ŭ EPAM — najbujniejšaj pa kolkaści IT-kampanii ź biełaruskimi karaniami ŭ Litvie. Za minuły hod litoŭskaja kamanda skaraciłasia amal na 180 čałaviek (minus 12,5%).
Top-10 IT-kampanij ź biełaruskimi karaniami pa kolkaści supracoŭnikaŭ u Litvie
studzień 2024 / studzień 2025
Ciapier u dvuch filijałach (u Vilni i Koŭnie) zarehistravana krychu bolš za 1,2 tysiačy supracoŭnikaŭ. Na pačatak minułaha hoda ich było bolš za 1,4 tysiačy.
Na praciahu minułaha hoda praciahvaŭ skaračać kamandu ŭ Litvie jašče adzin bujny hulniavy raspracoŭščyk — Wargaming. Kali ŭ studzieni minułaha hoda ŭ litoŭskim ofisie kampanii było zarehistravana 914 śpiecyjalistaŭ, to ciapier — 835. Za hod kamanda skaraciłasia amal na 10%.
U top-3 pa adtoku śpiecyjalistaŭ u Litvie trapiŭ jašče adzin pradstaŭnik hiejmdeva — MA Lithuania (eks-Melsoft). Za minuły hod kamanda skaraciłasia na 60+ čałaviek (minus 25%).
Tolki niekalki IT-kampanij zdoleli nie tolki zachavać kolkaść supracoŭnikaŭ, ale i pavialičyć kamandu.
U pryvatnaści, litoŭski ofis Gurtam vyras na 20 śpiecyjalistaŭ (plus 10%). Raspracoŭščyk dadatku dla žanočaha zdaroŭja Flo pavialičyŭ štat na 10 čałaviek (plus 4%).
U inšych kampanijach za hod štat vyras usiaho na 1-2 čałavieki.
A voś tak źmianiałasia kolkaść supracoŭnikaŭ u litoŭskich IT-kampanijach ź biełaruskimi karaniami za apošnija try hady. Jak bačym, paśla rezkaha rostu kamand u 2022 hodzie padčas druhoj chvali rełakacyi (praz vajnu va Ukrainie) u mnohich kampanijach adbyvajecca adtok śpiecyjalistaŭ (z 2023 hoda).
IT-kampanii ź biełaruskimi karaniami pa kolkaści zarehistravanych supracoŭnikaŭ u Litvie
Čamu ajcišnikaŭ u litoŭskich ofisach stanovicca mienš?
Adna z mahčymych pryčyn — aptymizacyja IT-kampanijami vydatkaŭ na piersanał va ŭmovach niestabilnaha popytu na rynku pasłuh, deficytu prajektaŭ i rostu bienča. Adnych supracoŭnikaŭ kampanii zvolnili, inšych pieraviali ŭ inšyja łakalitety. Akramia taho, ajcišniki mohuć vyjazdžać ź Litvy ŭ pošukach novaj pracy.
Taksama adtok ajcišnikaŭ, chutčej za ŭsio, źviazany ź niepaśladoŭnaj mihracyjnaj palitykaj Litvy. Sučasnyja vypadki anulavańnia DNŽ dla biełarusaŭ (u tym liku ajcišnikaŭ) užo nie redkaść.
Na hetyja faktary ŭkazvaŭ, u pryvatnaści, kiraŭnik asacyjacyi siektara ličbavych technałohij Infobalt Simonas Čarniaŭskas:
— U nas niama vypadkaŭ sychodu IT-kampanij, ale paskarajecca emihracyja biełaruskich supracoŭnikaŭ IT-kampanij ź Litvy ŭ inšyja krainy, naprykład, u Polšču, Hiermaniju, — jašče ŭ žniŭni minułaha hoda adznačaŭ jon.
Z adtokam supracoŭnikaŭ sutyknułasia kampanija Sam Solutions. Jaje kiraŭnik, Ramunas Adamonis, raspaviadaŭ u kamientary Delfi, što kadravaja situacyja ŭskładniajecca. Kampanija nie tolki nie pryciahvaje bolš supracoŭnikaŭ ź Biełarusi, ale i hublaje tych, što jość.
— Asnoŭnaja pryčyna — strach pierad anulavańniem časovaha dazvołu na žycharstva ŭ Litvie. U našaj kampanii ŭžo jość pieršy precedent — supracoŭnica, jakaja znachodziłasia ŭ dekrecie, straciła dazvoł, što razburyła płany ŭsioj siamji stroić budučyniu ŭ Litvie i prymusiła jaje i jaje muža (taksama našaha supracoŭnika) viarnucca ŭ Biełaruś jašče da naradžeńnia dziciaci.
Pa danych Departamienta mihracyi Litvy, za minuły hod kolkaść hramadzian Biełarusi, jakija majuć litoŭski dazvoł na žycharstva (luboha typu), skaraciłasia na 7,5% ci na 4,6+ tysiačy čałaviek.
Pry hetym asabliva rezki adtok adbyŭsia za apošni kvartał — u asnoŭnym za košt tych, chto maje časovy dazvoł na žycharstva. Kali ŭ pačatku kastryčnika biełarusaŭ z takimi dakumientami ŭ Litvie było amal 57,5 tysiačy, to na pačatak studzienia hetaha hoda — užo 53,5 tysiačy.
Usiaho ŭ Litvie na pačatak hetaha hoda pražyvała 57 511 hramadzian Biełarusi z DNŽ.
Ciapier čytajuć
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary