Afryka moža razłamacca na dźvie častki chutčej, čym čakali navukoŭcy
Afryka moža raskałocca na dźvie častki pa raskolinie daŭžynioj bolš za 3200 km i, miarkujučy pa ŭsim, chutčej, čym mierkavałasia. Vinoj tamu zrušeńnie tektaničnych plit.
Pieršyja prykmiety hetaha pracesu źjavilisia ŭ 2005 hodzie — raskolina bolš za 50 km źjaviłasia ŭ Efiopii. U 2018 hodzie ziamla raskałołasia i ŭ Kienii, piša Bild.
Hetyja razłomy ŭ ziamli znachodziacca nad tak zvanaj Vialikaj ryftavaj dalinaj, jakaja ŭźnikła 30 młn hadoŭ tamu, kali raskałołasia Afrykanskaja plita. Ciapier my prosta nazirajem nastupstvy hetaj padziei na pavierchni.
Da niadaŭniaha času hieołahi ličyli, što dla razłomu Afryki na dźvie častki spatrebicca ad 5 da 10 młn hadoŭ. Adnak, pavodle apošnich danych, heta zdarycca našmat raniej. Sincija Ebinhier, hieafizik z Tulejnskaha ŭniviersiteta, raskazała płatformie Dailygalaxy:
«My skaracili prahnoz da 1 młn hadoŭ, mahčyma, [spatrebicca] navat udvaja mienš».
Razłom pavialičvajecca na 0,8-2,5 sm u hod, adnak praces moža paskorycca z-za ziemlatrusaŭ, i heta robić dakładnaje prahnazavańnie składanym. U vyniku Samali, Efiopija, Tanzanija i pałova Kienii ŭtvorać hihancki vostraŭ la ŭźbiarežža Afryki.
Ruch tektaničnych plit i ziamnoj kary źviazany z patokami mahmy pad joj. Pad Efiopijaj, da prykładu, nadzvyčaj haračaja vadkaja paroda padymajecca na hłybiniu ŭsiaho kala 10 km pad pavierchniaj i asłablaje ziamnuju karu.
Ciapier čytajuć
«Dzieci rastuć z adčuvańniem, što być biełarusam pačesna, jak vypusknikom Harvarda». U Batumi dziejničaje biełaruskamoŭnaja škoła — voś jak heta pracuje88
Kamientary