U ahraharadku pad Maładziečnam z-za pierabojaŭ z elektryčnaściu zaharajucca aciaplalnyja katły?

Unačy 19 śniežnia ŭ Pałačanach na Savieckaj vulicy ŭ kacielni pryvatnaha doma zahareŭsia kacioł na ćviordym palivie. Pavodle asnoŭnaj viersii ratavalnikaŭ MNS, pryčynaj pažaru stała adsutnaść cyrkulacyi vady ŭ sistemie aciapleńnia.

U hetuju ž noč tam ža, na Savieckaj vulicy, pa toj ža pryčynie ledź nie zahareŭsia kacioł Dźmitryja. Mužčyna śćviardžaje, što jaho ad pažaru vyratavała ŭstanoŭlenaja ŭ sistemie hrupa biaśpieki, jakaja praduchiliła zaharańnie katła. Ale Dźmitryj usio ž vyklikaŭ da siabie ratavalnikaŭ, kab paviedamić pra prablemu.

— Sistema aciapleńnia z katłom na ćviordym palivie zroblena tak, što cyrkulacyjnaja pompa, jakaja pracuje ad elektryčnaści, pierapampoŭvaje vadu, što idzie pa trubach aciapleńnia. U mianie, naprykład, ustalavanyja try pompy, — raspaviadaje Dźmitryj. — U nas pastajanna zdarajucca pierapady napružańnia. Dumaju, što elektryčnaść pieryjadyčna adklučajecca mienavita z-za hetaha. Adpaviedna, spyniajecca cyrkulacyjnaja pompa. Spyniajecca ruch vady, jakuju jana pierapampoŭvaje. Vada pierastaje cyrkulavać, pačynaje kipieć. Kacioł masaj 300 kiłahramaŭ trasiecca, jon hatovy vybuchnuć.

Pavialičyć

Tak było nočču 19 śniežnia. U mianie hrupa biaśpieki. Jana praduchiliła pažar, ale ja vielmi mocna napałochaŭsia. Ratavalniki tušyli pažar u domie na našaj vulicy, dzie jon pačaŭsia pa hetaj ža pryčynie. Ja zaprašaŭ ich da siabie.

Dźmitryj adznačaje, što ŭ mnohich žycharoŭ Pałačan takaja ž sistema aciapleńnia, prynamsi, u toj častcy ahraharadka, dzie niama padviedzienaha pryrodnaha hazu. Na Savieckuju vulicu haz nie padvodziać.

— Hazaviki śćviardžajuć, što niemahčyma pravieści adkryty hazapravod, a pad ziamloj jaho nie praviadzieš, bo pa technałohii nielha kapać tranšei z-za taho, što zanadta blizka prajaznaja častka, — raspaviadaje Dźmitryj. — Abahravacca nam zastajecca tolki ad katła, jaki moža zaharecca z-za raptoŭnaha adklučeńnia elektryčnaści. Anałahičny vypadak u mianie zdaryŭsia 6 śniežnia. Tady enierhietyki sami adklučali elektryčnaść, nie papiaredziŭšy nas. Ja patelefanavaŭ majstru elektryčnych sietak. Elektryčnaść viarnuli, usio abyšłosia.

Dźmitryj raspaviadaje, što nabyŭ dom u Pałačanach na Savieckaj vulicy vosiem hadoŭ tamu. U hetym hodzie z žonkaj pierajechaŭ žyć siudy pastajanna. Ź imi žyvie jašče maci žonki Dźmitryja. Akramia pierapadaŭ napružańnia, mužčyna skardzicca na adsutnaść internetu na Savieckaj vulicy. Kaža, što źviartaŭsia ŭ «Biełtelekam». Tam adkazali: «Linii niama». Sa svaimi prablemami Dźmitryj u paniadziełak, 23 śniežnia, chadziŭ u sielsaviet.

Staršynia Pałačanskaha sielskaha vykanaŭčaha kamiteta Anastasija Joda raspaviała:

— U aŭtorak, 24 śniežnia, my napisali zapyty ŭ «Biełtelekam» i ŭ hazavuju słužbu. Praz dva tydni spadziajomsia atrymać adkazy z hetych instancyj. Pytańnie nakont adklučeńnia elektryčnaści na Savieckaj vulicy nie ŭvachodzić u našu kampietencyju.

Dźmitryj skazaŭ, što sam budzie pisać aficyjny list u «Maładziečanskija elektryčnyja sietki» i čakać aficyjnaha adkazu. Tak jamu paraili zrabić u sielsaviecie.

Pavialičyć

• 0
• 1
• 1
• 1
• 0
• 1
• 0
• 0