Bajden źbirajecca na raźvitańnie ŭvieści pakiet sankcyj suprać «cieniavoha fłotu» Rasii
U apošnija tydni svajho znachodžańnia na pasadzie prezident ZŠA Džo Bajden razhladaje mahčymaść uviadzieńnia novych maštabnych sankcyj suprać enierhietyčnaha siektara Rasii. Hazieta The Washington Post paviedamiła pra heta 24 śniežnia sa spasyłkaj na čatyroch čynoŭnikaŭ, znajomych z pytańniem.
Novyja sankcyi mohuć dać novaj administracyi abranaha prezidenta Donalda Trampa bolš ryčahoŭ u pieramovach z Uładzimiram Pucinym pa spynieńni vajny suprać Ukrainy, adznačajuć krynicy.
Asnoŭnaja ideja hetych sankcyj — u tym, kab nanieści ŭdar pa tak zvanym «cieniavym fłocie» mižnarodnych sudnaŭ, jakija transpartujuć rasijskuju naftu ŭ krainy za miežami zachodniaha błoka, a taksama pa rasijskich eksparciorach nafty, jakija raniej nie padviarhalisia sankcyjam.
Sa słoŭ krynic, siarod inšych varyjantaŭ razhladajecca skasavańnie licenzij, jakija dazvalajuć bankam pravodzić apieracyi, źviazanyja z rasijskim enierhietyčnym siektaram. Kali hetyja miery buduć realizavanyja, jany mohuć sfarmavać ekanamičnuju i zamiežnapalityčnuju spadčynu Bajdena pierad inaŭhuracyjaj Trampa.
«Metaj novych bujnych sankcyjnych zachadaŭ pavinna być skaračeńnie dachodaŭ Rasii ad ekspartu na dvuchznačnyja pakazčyki ciaham šaści-dvanaccaci miesiacaŭ», — zajaviŭ Piter Chareł, były staršy dyrektar u mižnarodnaj ekanomicy ŭ administracyi Bajdena.
Vysokapastaŭleny pradstaŭnik administracyi Bajdena na ŭmovach ananimnaści patłumačyŭ, što hetyja miery nieabchodnyja dla nadańnia Ukrainie «lepšaj mahčymaści» dla abarony i viadzieńnia pieramovaŭ ab miry na spraviadlivych umovach.
21 listapada Złučanyja Štaty ŭviali sankcyi suprać Hazprambanka — adnaho ź niamnohich bujnych rasijskich bankaŭ, jakija raniej nie byli ŭklučanyja ŭ sankcyjny śpis, — kab abmiežavać zdolnaść Kramla finansavać vajennyja dziejańni.
ES rychtuje novyja sankcyi suprać RF da treciaj hadaviny ŭvarvańnia
Rasijskaje hramadstva choča vajny, pakazvajuć apytańni
ZŠA patracili $30 miljonaŭ na absłuhoŭvańnie aryštavanaj jachty rasijskaha aliharcha Kierymava. U joj pamianiali navat joršyki ŭ prybiralni
Vialikabrytanija ŭviadzie šyrokamaštabnyja sankcyi suprać «cieniavoha fłotu» Rasii
My zdabyli ličby impartu rasijskaj nafty. Ź ich jasna, jak Łukašenka kampiensuje straty ad sankcyj
Kamientary