ZŠA patracili $30 miljonaŭ na absłuhoŭvańnie aryštavanaj jachty rasijskaha aliharcha Kierymava. U joj pamianiali navat joršyki ŭ prybiralni

WP atrymała dostup da 1300 staronak finansavaj infarmacyi ab jachcie pa zakonie ab svabodzie infarmacyi. U hetych dakumientach apisvajucca vydatki na ŭtrymańnie jachty z krasavika 2022 hoda, kali jana była aryštavanaja na Fidžy. Praanalizavaŭšy hetyja dakumienty, vydańnie vyznačyła ahulnuju sumu vydatkaŭ. Viernaść raźlikaŭ paćvierdziŭ Miniust ZŠA.

Vydańnie pieraličvaje častku vydatkaŭ, ź jakich składajecca vynikovaja suma ŭ 30 młn dalaraŭ:

— 12 458 dalaraŭ pajšło ŭ červieni 2022 hoda na ačystku korpusa supieriachty,

— 52 717 dalaraŭ tady ž vydatkavali na miasa, rybu, małočnyja pradukty, chleb, śpiecyi i inšyja pradukty charčavańnia dla 30 členaŭ ekipaža,

— 277 200 dalaraŭ ułady ZŠA zapłacili na paliva na pierachod jachty ź Fidžy ŭ San-Dyjeha,

— nie mienš za 3000 dalaraŭ na avijapieraloty;

— bolš za 4000 dalaraŭ było vydatkavana na numary ŭ hateli Wailoaloa Seascape na Fidžy;

— tysiačy dalaraŭ pajšli na arendu aŭtamabilaŭ na Fidžy;

— nienazvanyja sumy syšli na padtrymańnie basiejna, šaŭkovych dyvanoŭ i mebli z šaŭkovaj abiŭkaj «u pastajanna kandycyjanujucca asiarodździ», rehularnuju płanavuju myjku jachty, absłuhoŭvańnie jachty śpiecyjalizavanaj kamandaj z apłataj pražyvańnia;

— bolš za 1000 dalaraŭ kaštavaŭ iPhone 11 dla kapitanskaha mastka karabla;

— 988 dalaraŭ kaštavała ŭniforma dla ekipaža;

— 1216 dalaraŭ było vydatkavana ŭ lutym 2023 hoda na tualetnyja joršyki i trymalniki śpiecyjalnaha pamieru.

Pry hetym ułady ZŠA nie mohuć kanfiskavać Amadea abo inšyja aktyvy rasijskich aliharchaŭ, jakija znachodziacca pad sankcyjami, kali sud nie pastanović, što jany vykarystoŭvalisia ŭ ramkach fiederalnaha złačynstva, tłumačyć WP.

Vydańnie ŭdakładniła, što razhlad pytańnia ab kanfiskacyi takich aktyvaŭ moža zaniać hady. Pakul ža rašeńnia niama, apłačvać utrymańnie jachty pavinny ŭłady ZŠA. Mahčymaja navat situacyja, pry jakoj Złučanyja Štaty buduć vymušanyja viarnuć jachtu Kierymavu bieź jakoj-niebudź kampiensacyi, havorycca ŭ publikacyi.

Niahledziačy na vialikija vydatki, košt aktyvu padaje. Na momant aryštu jachta aceńvałasia ŭ 325 młn dalaraŭ. Pavodle dakumientaŭ Fiederalnaha suda, jaje apošniaja acenka — užo 230 młn dalaraŭ. 

Aryštavanyja paśla pačatku vajny va Ukrainie jachty rasijskich miljarderaŭ stali prablemaj nie tolki dla ZŠA, dzie akramia prynaležnaj Kierymavu Amadea ŭłady vymušanyja ŭtrymlivać jachtu Viktara Vieksielbierha Tango.

Kala 32 młn jeŭra da maja 2024 hoda na absłuhoŭvańnie jacht rasijskich miljarderaŭ patracili ŭłady Italii, dzie, u pryvatnaści, aryštavanyja Lady M Alaksieja Mardašova i źviazanaja z Uładzimiram Pucinym «Šachieriezada».

• 0
• 0
• 4
• 12
• 4
• 0
• 1
• 0