Što budzie z zarobkami ŭ 2025-m? I ci adklučać jutub? Adkazvaje Čały
«Łahična było b paśla vybaraŭ admianić canavoje rehulavańnie. Ale heta pryviadzie da skačku cen».
Ekanamist Siarhiej Čały zaŭvažaje, što roznyja daśledavańni daŭno prademanstravali cykličnaść rostu zarobkaŭ u Biełarusi, źviazanuju jak z prezidenckimi, tak i z parłamienckimi vybarami. Nie staŭ vyklučeńniem i 2024 hod.
Jak patłumačyŭ ekanamist u efiry jutub-prahramy «Obyčnoje utro», akramia hetaha faktaru, rost zarobkaŭ byŭ abumoŭleny tym, što ekanomika krainy pieraklučyłasia na vytvorčaść pradukcyi dla vajennych metaŭ. Ale ŭ nastupnym hodzie rost realnych zarobkaŭ zapavolicca. Na heta buduć upłyvać niekalki faktaraŭ:
«Akramia «rynkavaha» składniku rostu zarabotnaj płaty, byŭ i administracyjny. Heta pavyšeńnie zarobkaŭ biudžetnikam, uklučajučy piensijanieraŭ. I heta było vielmi dakładna bačna. Ź inšaha boku [strymlivaŭsia] rost cen. (…)
Ja dumaju, što vializnuju kolkaść niehatyŭnych nastupstvaŭ ad canavoha rehulavańnia jany tam (ułady — NN) uśviedamlajuć. I z-za hetaha davodzicca zajmacca łuchtoj [kštałtu] «a davajcie my budziem licenzavać vyvaz usiaho, tamu što ŭ nas deficyt moža ŭtvarycca».
Łahična było b paśla vybaraŭ admianić canavoje rehulavańnie. (…) Ale heta pryviadzie da skačku cen. Tamu, chutčej za ŭsio, jany buduć ciahnuć niejki praciahły čas. U lubym vypadku sproba vybracca z tupiku, u jaki jany siabie zahnali, budzie».
Ci adklučać jutub u Biełarusi?
«U ich na internet vielmi šmat zaviazana. Vy ž nie možacie być krainaj, jakaja «stajała la vytokaŭ štučnaha intelektu i tyktoku» — i ŭziać usio heta i zabaranić. A jak jon budzie ŭ vas raźvivacca? Suvierenny niejki tyktok i internet?»,
— z humaram adkazaŭ Čały na pytańnie ab mahčymaści zabarony jutubu ŭ Biełarusi.
Kali ž kazać surjozna, to ekanamist nie vyklučaje takoha scenaryju:
«Łohika sapraŭdy [jość]. Viecier dźmie ŭ hety bok».
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej5
Kamientary