Rasijski tyktokier Azamat Ajtalijeŭ viarnuŭsia ŭ Minsk razdražniać biełarusaŭ: tančyć u vyšyvancy, šukaje žonku
Rasijski tyktokier-miljońnik Azamat Ajtalijeŭ, čyimi nie vielmi prystojnymi pavodzinami ŭ restaranach i aeraporcie aburalisia biełarusy, viarnuŭsia ŭ Minsk.
U hety raz Azamat užo paśpieŭ nabyć sabie vyšyvanku i čamuści achryściŭ siabie biełaruskim džyhitam. U takim vobrazie jon pajšoŭ tančyć pad «Kupalinku» kala Pałaca Respubliki.
Svoj imidž błohier rastłumačyŭ padpisčykam:
— Ci padabajecca vam moj novy vobraz? Pakolki ja znachodžusia ŭ Biełarusi, ja pavinien ciahać biełaruskaje adzieńnie.
Azamat nie zabyvaje nahadvać ab tym, što šukaje žonku. U Biełarusi jon takuju abjavu vyrašyŭ zapisać u basiejnie haścinicy Crowne Plaza.
— Pryhažun u majtkach Dolce&Gabbana. Volny, raźviedzieny i čakaju svaju adzinuju, jakaja budzie sa mnoj na stahodździ.
Raniej błohier ahučvaŭ svaje kryteryi da patencyjalnaj niaviesty: jana pavinna być pryhožaja, zdarovaja (tamu što Azamat užo choča dziaciej), a taksama pavinna padzialać luboŭ tyktokiera da vandrovak i ŭsiudy supravadžać jaho.
U Minsku tyktokier praciahvaje chadzić pa restaranach i krytykavać ježu. Naprykład, u davoli darahim restaranie Amo na vulicy Karła Marksa Azamat raskrytykavaŭ kuryny bulon z frykadelkami (kaštuje hetaja nie vielmi vytančanaja strava 35 rubloŭ). Jamu nie spadabałasia toje, što sup akazaŭsia zialonym — reč u tym, što tudy dadali zialony harošak i piesta. A aficyjant nie padumaŭ papiaredzić pra niestandartny recept.
A ŭ restaranie hatela «Minsk» błohier svaryŭsia z administrataram praz sałatu «Cezar», jakaja, pa słovach tyktokiera, pachła žudasna. Nie spadabałasia jamu i ciomnaja talerka — Azamat chacieŭ biełuju.
— Padača, jak ja zaŭsiody kažu, jak u stałoŭcy. Biez kryŭdaŭ.
Potym błohier rastłumačyŭ, što nie zaŭsiody byŭ bahatym — niekali ŭ jaho byli prablemy z hrašyma, tamu jon viedaje, što i jak u stałovych. Ale ž ciapier «jon usiaho dasiahnuŭ sam» i tamu patrabuje ad restaranaŭ, kudy niasie hrošy, jakaści.
U vyniku sałatu jamu pierarabili i talerku zamianili. Praŭda, u tyktoku najbolš papularnym kamientaryjam da hetaha videa staŭ: «Mahu paspračacca, jamu 100% plunuli ŭ sałatu».
Pa hołasie za kadram u inšym videa čuvać, što niervovyja kletki ŭ administratara kančajucca. Jon adkazvaje, što padača straŭ u ich standartnaja, a varyjantaŭ «jak u mišlenaŭskim restaranie» niama.
Pabyvaŭ Azamat i na śviatočnym kirmašy na Niamizie. Tam błohier morščyŭ nos, hledziačy na vuličnuju ježu, i chamiŭ pradaŭščycam.
— Heta niebiaśpiečna. Mnie zdajecca, paśla hetaj ježy kožny pojdzie ŭ prybiralniu. Heta ŭsio parušeńni. Ja nie viedaju, jak uvohule dapuskajuć takuju iežu?!
U hety raz Azamat u Minsku vyrašyŭ pryśviacić čas i dabračynnaści. Jon sustreŭsia ź siamjoj Padjałoŭskich z Mahilova, jakija źbirajuć hrošy dla svajho syna Arcioma. U jaho śmiarotnaje hienietyčnaje zachvorvańnie — mijapatyja Dziušena. Baćki Arcioma sprabujuć sabrać 2,9 miljona dalaraŭ na leki «Elevidys».
Azamat pryzvaŭ usich nie chajpavać na jaho imieni, a lepš zrabić dobruju spravu i dapamahčy Arciomu finansava. Sam tyktokier padaryŭ chłopčyku sałodki padarunak ad «Kamunarki» i zaprasiŭ siamju ŭ italjanski restaran Il Patio.
Ciapier čytajuć
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?15
Kamientary